රජයේ අපරාධ නඩු කටයුතු සඳහා නීතිපති දෙපාර්තමේන්තුවෙන් වෙන් වූ රජයේ අභිචෝදක අධ්යක්ෂ කාර්යාලයක් (Office of the Director of Public Prosecutions – DPP) ස්ථාපිත කිරීමට එරෙහිව නීතිපති දෙපාර්තමේන්තුවේ නීතිඥ වෘත්තීය සංගමය ඒකමතික යෝජනාවක් සම්මත කරගෙන ඇත.
නීතිපති දෙපාර්තමේන්තු නීති නිලධාරීන්ගේ සංගමය සඳහන් කරන්නේ, වසර සිය ගණනක් තිස්සේ අපරාධ නඩු සහ සෙසු නඩු සාර්ථකව මෙහෙයවීමේ අත්දැකීම් බහුල නිලධාරීන් රැසක් දෙපාර්තමේන්තුවේ කටයුතු කරද්දී, අපරාධ නඩු සම්බන්ධයෙන් තවත් වෙනම ආයතනයක් ස්ථාපිත කිරීම අනවශ්ය බවයි.
සංගමයේ ලේකම් මිහිරි ද අල්විස් මහත්මිය විසින් නිකුත් කළ නිවේදනයේ දැක්වෙන්නේ, මෙම යෝජිත නව ආයතනයට සමාන ආයතනයක් 1970 දශකයේදී ද ස්ථාපිත කොට ඇති නමුත්, එය අසාර්ථක වූ බවට ඉතිහාසය සාක්ෂි දරන බවයි. එබැවින්, දැනට මෙවන් ආයතනයක් ස්ථාපිත කිරීම කාලෝචිත නොවන බව නීතිපති නිලධාරීන්ගේ මතය වී තිබේ.
නීතිපති දෙපාර්තමේන්තු නීති නිලධාරීන්ගේ සංගමය විසින් නොවැම්බර් 14 දින පැවැති විශේෂ මහා සභා රැස්වීමේදී ඒකමතිකව මෙම දැඩි විරෝධය පළ කිරීමේ තීරණය ගෙන ඇත.
නීතිපති දෙපාර්තමේන්තුවේ නීතිඥ වෘත්තීය සංගමය වැඩිදුරටත් පවසන්නේ, ඔවුන් සම්මත කරගත් මෙම යෝජනාව රජයට නිල වශයෙන් ඉදිරිපත් කිරීමට අපේක්ෂා කරන බවයි. එමඟින් රජයට දැනුම් දෙනු ලබන්නේ පවතින නීතිපති දෙපාර්තමේන්තුව තුළම අවශ්ය සියලුම අපරාධ නඩු කටයුතු සාර්ථකව මෙහෙයවීමට අත්දැකීම් බහුල නිලධාරීන් සිටින බැවින් තවත් නව ආයතනයක් පිහිටුවීම රටට සහ නීති පද්ධතියට අහිතකර බවයි.
අදාළ සංගමය සම්මත කරගත් යෝජනාව රජයට භාර දීමට නියමිතය.