ශ්රී ලාංකික සංක්රමණික සේවකයෙක් ඔහු සමඟ සේවය කරන පිරිසක් විසින් ඔහුව ෆෝක්ලිෆ්ට් යන්ත්රයක ගැටගසා අපහාස කිරීමෙන් මාස ගණනකට පසුවත් තමා කම්පනයෙන් පෙළෙන බව පවසා සිටියි. මෙම සිදුවීම සිදු වී ඇත්තේ දකුණු කොරියාවේ, දකුණු ජොල්ලා පළාතේ නාජු හි පිහිටි ගඩොල් කම්හලකදී ය. මෙම සිදුවීම ජාතික වශයෙන් දැඩි කෝපයක් ඇති කර ඇති අතර විදේශීය ශ්රමිකයන්ට එරෙහි හිංසනය සම්බන්ධයෙන් දකුණු කොරියානු රජයේ පරීක්ෂණයක් ද ආරම්භ කර ඇත.
ඉකුත් බ්රහස්පතින්දා (ජූලි 24) දුරකථන සම්මුඛ සාකච්ඡාවකට එක්වෙමින්, මෙම වසර මුලදී නාජු හි ගඩොල් කම්හලකදී සම සේවකයින් විසින් තමා ෆෝක්ලිෆ්ට් එකකට ගැටගසා අපහාස කිරීමෙන් ඇති වූ “කම්පනය හේතුවෙන් හිසරදයෙන් දිගින් දිගටම පීඩා විඳින” බව එම ශ්රී ලාංකික සේවකයා ජූංඇං ඉල්බෝ පුවත්පතට පවසා ඇති අතර මෙම සිදුවීමෙන් මාස ගණනකට පසුව, අදාළ වීඩියෝව මෙම සතියේ අන්තර්ජාලය ඔස්සේ වේගයෙන් ව්යාප්ත විය.
“ෆෝක්ලිෆ්ට් ක්රියාකරු මට අතිමහත් වේදනාවක් ඇති කළා. ඒ වෙලාවේ මට දැනුණු කම්පනය තවමත් මට හිසරදය ගෙන දෙනවා,” සේවකයා පැවසීය. “මට ලොකු අපහාසයක් වුණා. ඒ ගැන හිතන්නවත් මට ඕන නෑ.”
මෙම සිදුවීම පෙබරවාරි 26 දහවල් කාලයේදී සිදු වී ඇති අතර, එහිදී එම සේවකයා සුදු ප්ලාස්ටික් තහඩුවලින් ගැටගසා ෆෝක්ලිෆ්ට් එකකින් ඉහළට ඔසවා තබා ඇත. ජොන්නම් සංක්රමණික කම්කරුවන්ගේ මානව හිමිකම් ජාලය (Jeonnam Migrant Workers’ Human Rights Network) විසින් මෙම සිදුවීමේ තත්පර 58ක වීඩියෝවක් නිකුත් කර තිබේ. වීඩියෝවේ, සේවකයා සම්පූර්ණයෙන්ම අක්රීය කර ගඩොල් තොගයකට බැඳ ඇති ආකාරය දැක්වේ. සේවකයින් කිහිප දෙනෙකු සිනාසෙමින් තම දුරකථනවලින් දර්ශනය වීඩියෝ කරන අයුරු මෙහිදී පෙන්නුම් කෙරේ.
ඔහුව විනාඩි පහක් පමණ ෆෝක්ලිෆ්ට් එකට ගැටගසා තබා ගත් බවත්, මුදා හැරීමෙන් පසු තමාට දිගින් දිගටම වමනය පැමිණි බවත් සේවකයා පවසා ඇත. 2024 දෙසැම්බර් මාසයේදී රැකියා අවසර පත්ර ක්රමය යටතේ E-9 වීසා මගින් ඔහු කොරියාවට ඇතුළු වී ඇති අතර, සිදුවීම වන විට ඔහු මාස තුනක් පමණ කම්හලේ සේවය කරමින් සිට ඇත. ජොන්නම් සංක්රමණික කම්කරුවන්ගේ මානව හිමිකම් ජාලය අනුව, රැකියාවේ කිසිදු වරදක් නොකළද සේවකයා අපයෝජනයට ලක්ව ඇති බවත් ෆෝක්ලිෆ්ට් ක්රියාකරු වාර්තා කර ඇත්තේ, සේවකයා “අනෙක් ශ්රී ලාංකික සගයෙකුට ගඩොල් නිසි ලෙස ඔතන ආකාරය උගන්වා ගැනීමට අපොහොසත් වීම” සම්බන්ධයෙන් ඔහුට දොස් පැවරූ බවයි.
හිරිහැර කිරීම් දිගින් දිගටම පැවතීමෙන් පසු සේවකයා අවසානයේ මානව හිමිකම් කණ්ඩායම හා සම්බන්ධ වී උපකාර ඉල්ලා ඇත. දැනට කම්හලේ, මෙම සේවකයා ද ඇතුළුව, සේවකයින් 20 දෙනෙකු පමණ සේවය කරන බව වාර්තා වේ.
මොහු පවසන ආකාරයට ඔවුන් කිසි විටෙකත් ඔහුගෙන් කෙලින්ම සමාව නොගත් බවත්, ඔවුන් මාධ්යයට පමණක් ‘කනගාටු වන’ බව පැවසූ බවත් ය.
ජොන්නම් සංක්රමණික කම්කරුවන්ගේ මානව හිමිකම් ජාලය, සේවකයා ද සහභාගී වූ මාධ්ය සාකච්ඡාවක් නාජු නගර ශාලාවෙන් පිටත බ්රහස්පතින්දා පවත්වා ඇති බවට වාර්තා වේ.
ජනාධිපති ලී ජේ මියුං (Lee Jae Myung) ෆේස්බුක් ඔස්සේ මෙම සිදුවීම හෙළා දකිමින් “ මානව හිමිකම් උල්ලංඝනයකට තදින් ප්රතිචාර දක්වන” බව පවසා ඇති අතර වීඩියෝව බෙදාගැනීමෙන් පසු ඔහු මෙසේ ලියා ඇත. “මට මගේ ඇස් අදහා ගැනීමට නොහැකි විය. ප්රජාතන්ත්රවාදී රටක සහ සංස්කෘතික බලවතෙකු වන රටක මෙවැනි හිංසනයක් සිදුවිය හැකි යැයි මම කිසිදා නොසිතුවෙමි.” “මෙය සමාව දිය නොහැකි ප්රචණ්ඩකාරී ක්රියාවක් වන අතර සුළුතර හා අවදානමට ලක්විය හැකි පුද්ගලයෙකුට එරෙහිව මානව හිමිකම් පැහැදිලිව උල්ලංඝනය කිරීමකි. කිසිවෙකු සංක්රමණික සේවකයෙකුගේ අවදානම් තත්ත්වයෙන් ප්රයෝජන ගෙන ඔවුන්ව සූරාකෑමට හෝ අපයෝජනයට ලක් නොකරන බවට අපි වග බලා ගන්නෙමු. විදේශයන්හි සේවය කරන කොරියානු පුරවැසියන් අප අගය කරනවා සේම, සංක්රමණික සේවකයන්ගේ මූලික අයිතිවාසිකම් ආරක්ෂා කළ යුතුය.”
පොලිසිය සහ රැකියා හා කම්කරු අමාත්යාංශය පරීක්ෂණයක් ආරම්භ කර ඇති අතර කම්හල පිළිබඳව සවිස්තරාත්මක පරීක්ෂණයක් පවත්වන බවත්, සේවා ස්ථානයේ ප්රචණ්ඩත්වය, හිරිහැර කිරීම් හෝ නොගෙවූ වැටුප් පිළිබඳ වෙනත් අවස්ථා තිබේදැයි සොයා බලන බවත් අමාත්යාංශය පැවසීය.
“යම් නීති විරෝධී ක්රියාවක් අනාවරණය වුවහොත්, අපි දැඩි ලෙස ප්රතිචාර දක්වන්නෙමු,” රැකියා හා කම්කරු අමාත්ය කිම් යන්ග්-හූන් (Kim Young-hoon) පැවසීය. “විදේශීය කම්කරුවන් සේවය කරන සේවා ස්ථානවල පූර්ව ආරක්ෂක පරීක්ෂණ වැඩි දියුණු කර ඔවුන්ගේ කම්කරු අයිතිවාසිකම් වඩා හොඳින් ආරක්ෂා කිරීමට අපි පියවර ගන්නෙමු.”