ඇමරිකාව සහ ඊශ්රායලය එක්ව ඉරානයට එරෙහිව දියත් කර ඇති යුදමය ගැටුම අවසන් කිරීම අරමුණු කරගත් අවබෝධතා ගිවිසුමකට ඇමරිකානු ජනාධිපති ඩොනල්ඩ් ට්රම්ප් සහ ඉරාන ජනාධිපති මසූඩ් පෙසෙෂ්කියන් ඩිජිටල් ක්රමවේදය ඔස්සේ අත්සන් තබා ඇති බව ඉරාන විදේශ අමාත්යාංශය සහ ධවල මන්දිරය තහවුරු කර තිබේ.
ඉරාන විදේශ අමාත්යාංශ ප්රකාශක එස්මයිල් බගායි සඳහන් කළේ, ගිවිසුමට අදාළ ඉදිරි සාකච්ඡා සඳහා දෙරටේ නියෝජිත කණ්ඩායම් ලබන සිකුරාදා ස්විට්සර්ලන්තයේ ජිනීවා නුවරදී රැස්වන බවයි. කෙසේ වෙතත්, ගිවිසුම ඩිජිටල් ආකාරයෙන් අත්සන් කර ඇති බැවින් භෞතික අත්සන් තැබීමේ උත්සවයක් පැවැත්වීමට නියමිත නොවන බවද වාර්තා වේ.
ටෙහෙරානයේ න්යෂ්ටික වැඩසටහන සම්බන්ධයෙන් අවසන් එකඟතාවකට පැමිණීම සඳහා දැනට ක්රියාත්මක වන දින 60ක සාකච්ඡා කාලසීමාව තවදුරටත් බලපවත්වන නමුත් එය අවසන් තීරණයක් සඳහා අනිවාර්ය අවසන් දිනයක් නොවන බව ජනාධිපති ට්රම්ප් ප්රකාශ කර ඇත.
එසේ වුවද, ගිවිසුමේ කොන්දේසි අනුව ඉරානය කටයුතු කිරීමට අපොහොසත් වුවහොත් දැඩි හමුදා ක්රියාමාර්ග ගන්නා බවට ට්රම්ප් අනතුරු අඟවා තිබේ.
මේ අතර, ඉරානයේ ආර්ථික සහ යටිතල පහසුකම් ප්රතිසංස්කරණය සඳහා යෝජිත ඇමරිකානු ඩොලර් බිලියන 300ක අරමුදලක් සම්බන්ධයෙන්ද තොරතුරු අනාවරණය වී තිබේ. ඇමරිකානු නිලධාරීන් පවසන්නේ එම අරමුදල ඉරානයේ අසල්වැසි රටවල් සහ කලාපීය හවුල්කරුවන්ගේ මූල්ය දායකත්වයෙන් සැකසෙන බවයි.
ඉරාන බලධාරීන් ද එම ආයෝජන සැලැස්ම තහවුරු කර ඇති අතර, යටිතල පහසුකම් සංවර්ධනය, ප්රතිසංස්කරණ ව්යාපෘති සහ ආර්ථික පුනරුත්ථාපන වැඩසටහන් සඳහා එම අරමුදල් භාවිත කිරීමට අපේක්ෂා කරන බව සඳහන් කර ඇත.
මෙම අවබෝධතා ගිවිසුම මැද පෙරදිග කලාපයේ ආරක්ෂාව සහ ස්ථාවරත්වය සඳහා වැදගත් පියවරක් ලෙස සැලකෙන අතර, ඉදිරි ජිනීවා සාකච්ඡාවල ප්රතිඵල කෙරෙහි ජාත්යන්තර අවධානය යොමුවී තිබේ.