ගතවූ දශක 5ක ඉතිහාසය තුළ ඉන්දියාවේ තමිල්නාඩු මහ මැතිවරණයකදී සුවිශේෂී වෙනස්කමක් සිදුකිරීමට ජනප්රිය චිත්රපට නළුවෙකු මෙන් ම දේශපාලඥයෙකු වන ‘තලපති විජෙයි’ හෙවත් ජෝසෆ් විජෙයි චන්ද්රසේකර් ප්රමුඛ TVK පක්ෂයට හැකි විය.
ඉන්දීය මැතිවරණ කොමිසම විසින් නිකුත් කරන ලද ප්රතිඵලයට අනුව, TVK පක්ෂය මැතිවරණ කොට්ඨාස 105ක් ජයග්රහණය කළ තනි විශාලතම පක්ෂය බවට පත්වී සිටින නමුත්, මන්ත්රීවරුන් 234කින් යුත් සභාවේ බහුතරය වන මන්ත්රී ධූර 118 සීමාවට තවමත් ළඟා වී නොමැත.
තලපති විජෙයි මැතිවරණ කාල සීමාව තුළ දී දෙන ලද සුවිශේෂ පොරොන්දු කිහිපයක් කැපී පෙනෙන්ට පවතින අතර එම පොරොන්දු මෙසේය.
1. තමිල්නාඩු ප්රධාන අමාත්යවරයාගේ ඍජු අධීක්ෂණය යටතේ ක්රියාත්මක වන කාන්තාවන්, දරුවන් සහ වැඩිහිටියන්ගේ ආරක්ෂාව සඳහා කැපවූ දෙපාර්තමේන්තුවක් පිහිටුවීම.
2. මාතෘ මූලික පවුල් සඳහා (වයස අවුරුදු 60 දක්වා) රුපියල් 2,500ක මාසික ආධාරයක් ලබා දීම. මෙම ආධාර මුදල රජයේ සේවකයින් සිටින පවුල් වෙත හිමි නොවේ.
3. සෑම පවුලකට ම වසරකට LP ගෑස් සිලින්ඩර 06ක් නොමිලේ ලබා දීම.
4. විවාහ දිවියට එළඹෙන සෑම තරුණියක් සඳහා ම රත්තරන් ග්රෑම් අටක් සහ සිල්ක් සාරියක් ලබා දීම.
5. ළමුන් පාසල් හැරයාම වැළැක්වීම සඳහා මාතෘ මූලික පවුල් සඳහා වාර්ෂිකව රුපියල් 15,000ක මූල්ය ආධාරයක් ලබාදීම (1-12 වසර දක්වා ළමුන් සඳහා)
6. තමිල්නාඩුව පුරා කාන්තාවන් සඳහා නොමිලේ බස් සේවාවක් හඳුන්වාදීම.
7. කාන්තාවන්ට එරෙහි අපරාධ අවම කිරීම උදෙසා විශේෂ ඒකක ස්ථාපනය කිරීම.
8. කාන්තාවන්ට එරෙහි අපරාධ විමර්ශනය කිරීම සඳහා වෙන්වූ අධිකරණ පිහිටුවීම.
9. තමිල්නාඩු ප්රාන්තය තුළ අලුත උපන් සෑම බිළිඳෙකු සඳහා ම රන් මුද්දක් සහ ළදරු භාණ්ඩ කට්ටලයක් ලබාදීම.
10. දැඩි නීති, ප්රජා පොලිස් කටයුතු සහ පාසල් සහ විශ්වවිද්යාලවල මත්ද්රව්ය විරෝධී සංසද පිහිටුවීම තුළින් තමිල්නාඩුව මත්ද්රව්යවලින් තොර ප්රාන්තයක් බවට පරිවර්තනය කිරීම.
11. රුපියල් ලක්ෂ 20ක් දක්වා ඇප රහිත ණය (12 ශ්රේණියෙන් පසු ආචාර්ය උපාධිය දක්වා)
12. රැකියා විරහිත පුද්ගලයින් සඳහා මාසික ආධාර ලබා දීම: මාසිකව උපාධිධාරීන් සඳහා රුපියල් 4,000ක් සහ ඩිප්ලෝමාධාරීන් සඳහා රුපියල් 2,500ක්.
13. ව්යවසායකත්ව යෝජනා ක්රමය: රුපියල් ලක්ෂ 25ක් දක්වා ඇප රහිත ණය ලබාදීම.
14. තමිල්නාඩු ප්රාන්තයේ පොලිස් නිලධාරීන් සඳහා රු. 18,200 සිට රු. 25,000 දක්වා වැටුප් වැඩිවීමක්.