අප්රේල් 12 වනදා සිට මේ දක්වා කාලය තුළ දියේ ගිලීම් සහ මාර්ග අනතුරු හේතුවෙන් ශ්රී ලංකාවේ ජීවිත අහිමිවීම් සැලකිය යුතු ලෙස ඉහළ ගොස් ඇති බව වාර්තා වේ.
පොලිස් මාධ්ය ප්රකාශක සහකාර පොලිස් අධිකාරී එෆ්.යු. වුට්ලර් මහතා පැවසුවේ, එම කාලය තුළ පුරවැසියන් 20 දෙනෙකු දියේ ගිලී මියගොස් ඇති බවයි. අද (16) මාධ්ය වෙත අදහස් දක්වමින් ඔහු සඳහන් කළේ, පිහිනීමට නොහැකිවීම සහ අනාරක්ෂිත ස්ථානවල දිය නෑමට යාම මෙම අනතුරු වලට ප්රධාන හේතුව බවයි.
ඒ සමඟම, වැඩිහිටියන් සහ දෙමාපියන් විසින් වගකීම් නොසලකා හැරීමද මෙම අවාසනාවන්ත සිදුවීම් වැඩි වීමට හේතු වී ඇති බව ඔහු පෙන්වා දුන්නේය. බීමත්ව හෝ මත්ද්රව්ය භාවිතා කරමින් දිය නෑමට යාම, හුදකලා හා අනාරක්ෂිත ස්ථාන තෝරා ගැනීම මෙම අනතුරු වලදී පොදු ලක්ෂණයක් ලෙස හඳුනාගෙන ඇත.
එෆ්.යු. වුට්ලර් මහතා තවදුරටත් පෙන්වා දුන්නේ, “අපේ රටේ තරුණ පරපුර අකාලයේ ජීවිත අහිමිවීම අප සැමට දැරිය නොහැකි පාඩුවක්. දිය නෑමට වෙන් කර ඇති ආරක්ෂිත ස්ථාන පමණක් භාවිතා කරමින්, ජීවිත ආරක්ෂක කණ්ඩායම් සිටින ස්ථාන තෝරා ගැනීම අත්යවශ්යයි” යනුවෙනි.
මේ අතර, පසුගිය දින 5ක කාලය තුළ මාර්ග අනතුරු හේතුවෙන්ද පුද්ගලයින් 24 දෙනෙකු මියගොස් ඇති බව වාර්තා වේ. එමගින් සමාජයේ ආරක්ෂාව පිළිබඳ ගැටළු තවත් උද්ගත වී ඇති අතර, මාර්ග භාවිතා කරන සැමට වැඩි අවධානයක් අවශ්ය බව බලධාරීන් පෙන්වා දෙයි.
විශේෂයෙන් විනෝද චාරිකා සමය ආරම්භ වන මෙම කාලයේදී, ජනතාවට වගකීමෙන් හැසිරෙමින් ආරක්ෂිත උපදෙස් පිළිපැදීම අත්යවශ්ය බව පොලීසිය නැවත නැවතත් අවධාරණය කරයි.