ගාල්ල මහාධිකරණය විසින් 2015 වසරේදී 15 හැවිරිදි බාලවයස්කාර දැරියක් අපයෝජනය කිරීමේ චෝදනාවට වරදකරු වූ පුද්ගලයෙකුට වසර 17ක බරපතළ වැඩ සහිත සිරදඬුවමක් නියම කර තිබේ.
මෙම නඩුවේ තීන්දුව ප්රකාශයට පත් කරමින් පූර්ණිමා පරණගම මහත්මිය විත්තිකරු වන වෙල්ලගේ ජයවර්ධන සිල්වා නමැත්තාට රුපියල් 32,500ක දඩයක් ද නියම කළාය. එමෙන්ම වින්දිත දැරියට රුපියල් 400,000ක වන්දියක් සහ මෙම අපරාධය හේතුවෙන් උපත ලැබූ දරුවාට රුපියල් 600,000ක වන්දියක් ගෙවන ලෙසද නියෝග කර තිබේ.
නියමිත දඩය හෝ වන්දි මුදල් ගෙවීම පැහැර හරින්නේ නම්, ඒ සෑම එකක් සඳහාම අමතරව මාස හය බැගින් වූ සිරදඬුවම් විඳිය යුතු බවද අධිකරණය සඳහන් කළේය.
අධිකරණයේදී අනාවරණය වූයේ, අපරාධය සිදුවන අවස්ථාවේදී අහංගම ප්රදේශයේ කුරුඳු තළන්නෙකු ලෙස සේවය කළ 42 හැවිරිදි විත්තිකරු, ප්රේම සබඳතාවක් පවත්වන මුවාවෙන් අදාළ දැරිය රවටා කොග්ගල ප්රදේශයේ නිවසකදී මෙම අපයෝජනය සිදුකර ඇති බවයි.
වින්දිත දැරිය ගැබ් ගැනීමෙන් අනතුරුව පොලිසියට සිදුකළ පැමිණිල්ලකට අනුව විමර්ශන ආරම්භ කර ඇති අතර, උපත ලැබූ දරුවාගේ ජීව විද්යාත්මක පියා විත්තිකරු බව DNA පරීක්ෂණ මගින් නිසැකවම තහවුරු වී තිබේ.
මෙවැනි බරපතළ ළමා අපයෝජන සිද්ධීන් සම්බන්ධයෙන් වින්දිතයින්ට යුක්තිය ඉටු කිරීම සහ ළමා ආරක්ෂාව තහවුරු කිරීම සඳහා මෙම තීන්දුව වැදගත් පියවරක් ලෙස සලකන බව නීතිවේදීන් පෙන්වා දෙති.