විදේශ කටයුතු අමාත්‍ය අලි සබ්රි ජාත්‍යන්තර නාළිකාවත් සමඟ සම්මුඛ සාකච්ඡාවකට එක්වෙමින් ප්‍රකාශ කරන්නේ මාර්තු මස 31 වන දිනට පෙර ජාත්‍යාන්තර මුල්‍ය අරමුදලෙන් ඇමරිකානු ඩොලර් බිලියන 2.9ක විස්තීරණ ණය මුදල නොලැබුණහොත් මෙරට ආර්ථික‍ය යළි අස්ථාවරත්වයකට පත්විය හැකි බවයි.
ප්‍රශ්නය – අප වටහාගෙන ඇති පරිදි චීන එක්සිම් බැංකුව ශ්‍රී ලංකාව ලබාගෙන ඇති ණය යළි ගෙවීමේ කාලය වසර දෙකකින් පමා කිරීමට තීරණය කර තිබෙනවා. නමුත් ජාත්‍යන්තර මුල්‍ය අරමුදලට ණය මුදල නිදහස් කිරීම සඳහා එය ප්‍රමාණවත් නැහැ නේද ? ඔබට ඇතැම් විට චීනයෙන් ලබාගෙන ඇති අනෙකුත් ණය සම්බන්ධයෙන්ද සාකච්ඡා කිරීමට සිදුවී ඇතැයි සිතනවා. එය නිවැරදිද?
“ඇත්තෙන්ම වෙනත් ණය පහසුකම් සම්බන්ධයෙන් නොවෙයි.”
ප්‍රශ්නය – ඇතැම් විට වෙනත් කොන්දේසි සම්බන්ධයෙන්?
“ඇත්තෙන්ම අනෙකුත් ණය පහසුකම් සම්බන්ධයෙන් නොවෙයි. චීනය සමඟ අපේ සාකච්ඡා තවමත් අවසන් වී නැහැ. අපි බලාපොරොත්තු වෙනවා අවසන් එකඟතාවයක් සම්බන්ධයෙන් චීනය සමඟ එම සාකච්ඡා කඩිනමින් අවසන් වෙයි කියලා.”
ප්‍රශ්නය – මොනවාද එලෙස අවසන් වී නොමැති සාකච්ඡා. ජාත්‍යාන්තර මුල්‍ය අරමුදලෙන් ණය ලබාගැනීමට ඔබ චීනය සමඟ කොයි වගේ එකඟතාවයකට ඒමටද බලාපොරොත්තු වෙන්නේ ?
“දැන් ගැටලුව වී ඇත්තේ මුල්‍ය අරමුදල අපේක්ෂා කරන දේ සහ චීනය විසින් පිරිනමා ඇති දේ අතර විෂමතාවක් ඇතිවීමයි. ඉතින් අපි සෑම පාර්ශ්වයක්ම එක මේසයට කැඳවා සාකච්ඡා කළ යුතු වෙනවා. සියල්ලන්ම එකම සද්භාවයෙන් යුක්ත වූ විට අපට ඉදිරියට යාමට පුළුවන්. ඒ සඳහා සුළු කාරණා කිහිපයක් පමණයි කිරීමට ඉතිරිව ඇත්තේ. අප විශ්වාස කරනවා අපට එය කළ හැකියි කියලා.”
ප්‍රශ්නය – කොපමණ කාලයකින් එම විෂමතාවය අවසන් වේවිද ?
“ඉතා ඉක්මනින් එය අවසන් විය හැකියි. ඔබ හඳුන්වාදීමේදි කී පරිදි අපට මේ ණය මුදල අත්‍යවශ්‍යයි. රටට එය අත්‍යවශ්‍යයි.”
ප්‍රශ්නය – කොපමණ කාලයක් ශ්‍රී ලංකාවට ඒ සඳහා බලා සිටිය හැකිද ? ඔබ විදේශ මුදල් හිඟයකට, උද්ධමනයට, ආර්ථික අවපාතයකට ආදී ගැටලු රැසකට මුහුණ දී සිටිනවා. ඔබට දළ වශයෙන් ඔවුනට දවසක් ප්‍රකාශ කළ හැකිද ? මේ දිනය වනවිට අපට ණය මුදල නොලැබුනොත් ශ්‍රී ලංකාව දැඩි දුෂ්කර තත්ත්වයකට මුහුණ දීමට සිදුවෙයි කියලා.
“ ඔව් අප ඒ බව පැහැදිලිව ප්‍රකාශ කර තිබෙනවා. මේ වසරේ පළමු කාර්තුවට පෙර නොලැබුණොත්, මාර්තු මස 31 වෙනිදා වනවිට නොලැබුණොත බොහෝ දුරට අපට එතෙක් බලාසිටිය හැකියි. එබැවින් අපි ඊට පෙර යමක් ලබා ගැනීමට උත්සාහ දරනවා.”
– අද දෙරණ –