“මහර ගැටුමින් පසු සැමියා ගැන කිසිඳු තොරතුරක් නෑ” බිරිඳ මානව හිමිකම් කොමිසමට

රැඳවියන් එකොලොස් දෙනෙකුට දිවි අහිමි කරමින් සියයට අධික පිරිසක් තුවාල ලැබු  මහර  බන්ධනාගාරයේ රඳවා සිටි  සිය සැමියා සම්බන්ධ කිසිඳු තොරතුරක් ගැටුමින් පසුව දැනගන්නට නොමැති වීම සම්බන්ධයෙන් ඔහුගේ බිරිඳ ශ්‍රී ලංකා මානව හිමිකම් කොමිෂන් සභාව වෙත පැමිනිල්ලක් කර තිබේ.

දෙසැම්බර් 4 සිකුරාදා පැමිණිල්ල ඉදිරිපත් කිරීමෙන් පසුව ඇය මාධ්‍ය වෙත කියා සිටියේ සිය සැමියා සම්බන්ධයෙන් මහර බන්ධනාගාරයෙන් විමසුවද ඔවුන් කිසිවක් නොපවසන බවයි.

“මගේ මහත්තයා නෑ. මහර බන්ධනාගාරයට ගියා එහෙන් මුකුත් කියන්නෙත් නෑ. දැන් දවස් ගාණක් මං කියන්නේ මගේ මහත්තයා හොයලා දෙන්න කියලා. මොකක්ද වෙලා තියෙන්නේ කියලා කියන්න කියලා තමයි මම අහන්නේ. ”

මහර බන්ධනාගාරයේ ගැටුම හටගත් නොවැම්බර් 29 රාත්‍රියේ සිට මේ දක්වා සිය සැමියා සම්බන්ධයෙන් විමසා සිටියත්  කිසිදු තොරතුරක් නොමැති බව ඇය වැඩි දුරටත් විවිධ ප්‍රශ්න ඇසු මාධ්‍යවීදීන් හා කියා සිටියාය.

ගැටුමෙන් තුවාල ලබා රෝහල් ගත කළ රැදවියන්ගේ නාම ලේඛණය පරීක්ෂා කළද එහි තම සැමියාගේ නම සඳහන්ව නොතිබුන බව පවසන ඇය එහිදී තව දුරටත් කියා සිටියේ ඔහු වැලිකඩ බන්ධනාගාරයට රැගෙන ගිය බවට ආරංචි ලැබුනත් ඒ සම්බන්ධයෙන් නිශ්විත තොරතුරු නොමැති බවයි.

“අපිටත් ආරංචි වෙලා තියනවා වැලිකඩ බන්ධනාගාරයට ගෙනියලා කියලා. ඉතින් අපි අහන්නේ එහේ ඉන්නවද කොහේ ඉන්නවද මොනවද කරලා තියෙන්නේ මැරිලද තුවාද වෙලාද කියලයි අපි අහන්නේ. මන් අහන්නේ කාගෙන් හරි කමක් නැහැ මගේ මහත්තයව හොයලා දෙන්නයි කියලා”

පොලිස් මාධ්‍ය ප්‍රකාශක කාර්යාලය පවසන්නේ මහර බන්ධනාගාරයේ කළහකාරී සිද්ධියෙන් මියගිය රැඳවියන් කිහිප දෙනෙකුගේ අනන්‍යතාවය මෙතෙක් තහවුරු කර ගැනීමට නොහැකි  වූ බවයි.

Social Sharing
නවතම