ග්රාමීය ජනතාවගේ බහුමාන දරිද්රතාවය අවම කිරීම සහ ආර්ථික ශක්තිමත්භාවය නංවාලීම අරමුණු කරගත් “ප්රජා ශක්ති” ජාතික ව්යාපාරය යටතේ දිවයින පුරා සංවර්ධන ව්යාපෘති 1000ක් හෙට (02) දින ආරම්භ කිරීමට නියමිත බව ග්රාමීය සංවර්ධන අමාත්යාංශය පවසයි.
ප්රජා සංවර්ධන සභා මගින් හඳුනාගත් නිෂ්පාදන ආර්ථිකය, ආහාර සුරක්ෂිතතාව සහ ජීවනෝපාය සංවර්ධනයට සෘජුවම දායක වන ව්යාපෘති සඳහා රුපියල් මිලියන 25,000ක ප්රතිපාදන වෙන්කර ඇති අතර, එම ව්යාපෘති ක්රියාත්මක කිරීම සඳහා අවශ්ය මුදල් සියලු දිස්ත්රික්ක වෙත නිදහස් කර ඇති බවද සඳහන් වේ.
“ප්රජා ශක්ති – ගම් දහසක වැඩ දහසක්” වැඩසටහනේ ජාතික සමාරම්භක උත්සවය හෙට පෙරවරු 9.00ට ගම්පහ දිස්ත්රික්කයේ මහර ප්රාදේශීය ලේකම් කොට්ඨාසයට අයත් අඹගස්පිටිය ප්රදේශයේදී පැවැත්වීමට නියමිතය.
එමෙන්ම, දිස්ත්රික් මට්ටමේ ප්රධාන වැඩසටහන් දිස්ත්රික් සම්බන්ධීකරණ කමිටු සභාපතිවරුන්ගේ ප්රධානත්වයෙන් පැවැත්වෙන අතර, සියලුම ප්රාදේශීය ලේකම් කොට්ඨාසවල අවම වශයෙන් ව්යාපෘති 3ත් 5ත් අතර සංඛ්යාවක් ආරම්භ කිරීමට සැලසුම් කර තිබේ.
මෙම ව්යාපෘති ක්රියාත්මක කිරීම සඳහා ප්රජා සංවර්ධන සභා සාමාජිකයන්, රාජ්ය නිලධාරීන් සහ අදාළ සහායක ආයතන එක්ව කටයුතු කරන බවද අමාත්යාංශය සඳහන් කරයි.
ග්රාමීය ප්රජාවගේ ආදායම් මාර්ග පුළුල් කිරීම, ආහාර සුරක්ෂිතතාව තහවුරු කිරීම සහ තිරසාර සංවර්ධනය ප්රවර්ධනය කිරීම මෙම වැඩසටහනේ ප්රධාන අරමුණු අතර වන බවද වැඩිදුරටත් වාර්තා වේ.