මින් ඉදිරියට නිරෝධායනය දඬුවමක් ලෙස ක්‍රියාත්මක කිරීමේ නීති විරෝධී ක්‍රමවේදය නතර කර දමන ලෙස ඉල්ලා සිටිමින් සමස්ත ලංකා වෛද්‍ය නිලධාරීන්ගේ සංගමය විසින් පොලිස්පතිවරයා වෙත ලිපියක් යවා ඇත.
පොලීසිය විසින් අත්අඩංගුවට ගන්නා ලද පුද්ගලයන් නීති විරෝධී, බලහත්කාරී ලෙස දඬුවමක් ලෙස නීති විරෝධී ලෙස නිරෝධායනය සඳහා යොමු කිරීම පිළිබඳව සමස්ත ලංකා වෛද්‍ය නිලධාරීන්ගේ සංගමයේ විරෝධය පල කරණ බවත්, ඔවුන් වහාම නිදහස් කරන ලෙසත් පොලිස්පතිවරයාගෙන් ඉල්ලා ඇත.
කොවිඩ් වසංගතය පාලනයට අදාලව නිරෝධායනය යනු සෞඛ්‍යය නිර්දේශ මත සිදුකළ යුතු වසංගත මර්ධන ක්‍රියාවලියකි. නිරෝධායනය පිළිබඳව බලතල පැවරී ඇත්තේ සෞඛ්‍ය සේවා අධ්‍යක්ෂ ජනරාල් වරයාට බවත් සඳහන් කරන එම ලිපියේ වැඩිදුරටත් මෙසේද සඳහන් කර ඇත.
පුද්ගලයන් නිරෝධායනය සම්බන්ධව සෞඛ්‍ය සේවා අධ්‍යක්ෂක ජනරාල්වරයා විසින් 2020. 11. 16 දිනට EPID/400/2019/n-CoV/Guidelines අංක දරණ චක්‍රලේඛයේ පැහැදිලිව උපදෙස් ලබා දී ඇති අතර ලෝක සෞඛ්‍ය සංවිධානයේ නිරෝධායනය පිළිබඳව මාර්ගෝපදේශ අනුව ද ඉහත චක්‍රලේඛය අනුව ද කිසියම් පුද්ගලයෙකු නිරෝධායනට ලක් කල හැකි අවස්ථා දෙකක් ඇත.
01- කොවිඩ් ආසාධිතයෙකු ගේ ආශ්‍රීතයෙකු වීම,
02- කොවිඩ් වසංගතය සමාජය ව්‍යාප්තිය දක්වා පැතිරුණු රටකින්/ ප්‍රදේශයකින් රට තුළට/ එසේ නොවන ප්‍රදේශයකට ඇතුළු වීම.
ඉහත කාරණා වලට අදාල පුද්ගලයන් නිරෝධායන කිරීමේ බලතල සෞඛ්‍ය සේවා අධ්‍යක්ෂ ජනරාල්වරයා විසින් මහජන සෞඛ්‍ය අංශ වෙත පවරා ඇත.
නමුත් පසුගිය කාලය පුරාම පොලීසිය විසින් දඬුවම් ලෙස විවිධ පුද්ගලයන් නීති විරෝධී සහ බලහත්කාරී නිරෝධායන ක්‍රියාවලියකට යොමු කරනු ලැබීම ගැටළු සහගතය. පසුගිය දිනයකදී ද උද්ඝෝෂකයින් පිරිසක් ඒ ආකාරයට නීති විරෝධී ලෙස නිරෝධායනය සඳහා යොමු කිරීම පිළිබඳව අප සංගමයේ විරෝධය පල කරණ අතර ඔවුන් වහාම නිදහස් කරන ලෙසත් මින් ඉදිරියට නිරෝධායනය දඬුවමක් ලෙස ක්‍රියාත්මක කිරීමේ නීති විරෝධී ක්‍රමවේදය නතර කර දමන ලෙස ඉල්ලා සිටිමු.