මහින්දානන්දගේ තරඟ පාවා දීමේ චෝදනාවට මහේල හා සංගා සාක්කි ඉල්ලති!

ක්‍රිකට් ලෝක කුසලාන අවසන් මහ තරගය ඉන්දියානු පිලට මුදලට පාවා දුන් බවට මහින්ද රාජපක්ෂ ආණ්ඩුවේ ක්‍රීඩා අමාත්‍යවරයකු විසින් සිදු කළ චෝදනාව සාක්ෂි සහිතව ඔප්පු කරන ලෙස ශ්‍රී ලංකා පිලේ හිටපු නායකයන් දෙදෙනෙකු  අභියෝග කර තිබේ.

නම වසරකට පෙර ලෝක කුසලානය  මුදලට පාවා දුන් බව එවක ක්‍රීඩා අමාත්‍ය මහින්දානන්ද අලුත්ගමගේ පවසා තිබුනේ ජුනි 18 බ්‍රහස්පතින්දා පුද්ගලික රූපවාහිනී නාලිකාවක සම්මුඛ සාකච්ඡාවක දීය.

“මම අද කියනවා අපි 2011 ලෝක කුසලානය වික්කා කියලා. මම අද ඉන්නවා එතන. මම ක්‍රීඩා ඇමැතිවරයා විදිහට හිටපු කාලෙත් ඒක කිව්වා. මම ඒක වගකීමෙන් කියන්නේ. නමුත් මම රටක් හැටියට ඒක එළි කරන්න කැමති නෑ.”

තරගය පාවා දීම සම්බන්ධයෙන් ක්‍රීඩයකයන් සම්බන්ධ කර නොගන්නා නමුත්  යම් කිසි පාර්ශවයන් විසින් තරගය පාවා දීමට  සම්බන්ධ වී කටයුතු කළ බවට හිටපු අමාත්‍යවරයා එහිදී චෝදනා කළේය.

මුම්බායි හි වන්කඩේ ක්‍රීඩාංගනයේ පැවති තරගයේ දී ලකුණු 274 ක් රැස් කළ ශ්‍රී ලංකාව කඩුලු හයකින් ඉන්දියාවට පැරදුණි.

හිටපු අමාත්‍යවරයාගේ ප්‍රකාශය සම්බන්ධයෙන් ට්විටර් සටහනක් තබමින් අවසන් මහා තරගයේදී විශිෂ්ට ශතකයක් ලබාගත් මහේල ජයවර්ධන උපහාසයෙන් යුතුව  විමසා ඇත්තේ ” ඡන්දේ කට ළඟද?” යනුවෙනි.

“ඡන්දේ කට ළගද?. පේන විදිහට සර්කස් එක පටන් අරන්. නම් සහ සාක්ෂි කෝ” මහේල ජයවර්ධනගේ  ට්විටර් සටහනක වැඩි දුරටත් සදහන්ව තිබේ.

මහින්දානන්දගේ තරඟ පාවා දීමේ චෝදනාවට මහේල හා සංගා සාක්කි ඉල්ලති!

2011 වසරේ ඉන්දියාවේ පැවැති එක්දින ලෝක කුසලාන අවසන් මහ තරගයේදී ශ්‍රී ලංකා කණ්ඩායමේ නායකනත්වය දැරූ ලෝඩ්ස් ක්‍රිකට් පිටියේ භාරකාරත්වය දරණ මෙන්ම නව ක්‍රිකට් නීති හඳුන්වාදෙන එම්.සී.සී. ක්‍රීඩා සමාජයේ වත්මන්  සභාපති ධුරය දරන  ” සදා ලෝක පූජිත”  යැයි ශ්‍රී ලංකාවේ හිටපු විපක්ෂනායකවරයාගෙන්ද බුහුමන් ලද  කුමාර සංගක්කාර චෝදනාව ගැන ජගත් ක්‍රිකට් පාලක මණ්ඩලයට පැමිණිල්ලක් කරන ලෙස හිටපු අමාත්‍යවරයාට අභියෝග කර තිබේ.

“පූර්ණ පරීක්ෂණයක් කරන්න පුළුවන් විදියට එයා ICC එකටයි, දූෂණ විරෝධී සහ ආරක්ෂක ඒකක වලටයි එයාගේ ‘සාක්කි’ අරගෙන යන්න ඕනේ,” යි කුමාර සංගක්කාර ට්විටර් මගින් පවසා තිබුණි.

ඉන්දියාවේ දී පැවැති අවසන් මහා ක්‍රිකට් ගැටුම නැරඹීම සදහා එවකට ලංකාවේ ජනාධිපති මහින්ද රාජපක්ෂ ද සහභාගී වී සිටියේය.

Social Sharing
නවතම