දූෂණයට එරෙහිව සටන් කිරීමට හා ප්රජාතන්ත්රවාදී ආයතන ශක්තිමත් කිරීමට ශ්රී ලංකාව කැපවී සිටින බව චීනයේ පැවති 2026 බෝආඕ ආසියානු සංසදයේ වාර්ෂික සමුළුව අමතමින් කථානායක වෛද්ය ජගත් වික්රමරත්න මහතා ප්රකාශ කරයි.
ස්ථාවර හා සමෘද්ධිමත් සමාජයක් ගොඩනැඟීමේදී සංහිඳියාව, සියලු දෙනාටම අවස්ථාව ලබාදීම සහ යහපාලනයේ වටිනාකම පෙන්වා දී තිබෙන ඒ මහතා, දේශගුණික විපර්යාස සහ මානුෂීය අභියෝගවලට මුහුණදීමට වැඩිදියුණු කළ ගෝලීය සහයෝගීතාව අවශ්ය බව ද පෙන්වා දෙයි.
ශ්රී ලංකා පාර්ලිමේන්තුවේ කථානායක වෛද්ය ජගත් වික්රමරත්න මහතා චීන මහජන සමූහාණ්ඩුවේ හයිනාන් පළාතේ පැවති බෝආඕ ආසියානු සංසදයේ වාර්ෂික සමුළුවට (Boao Forum for Asia Annual Conference 2026) සහභාගි වීම සඳහා නිල සංචාරයක නිරත විය. දූත පිරිසට පාර්ලිමේන්තුවේ මහ ලේකම් කුෂාණි රෝහණධීර මහත්මිය සහ ව්යවස්ථාදායක සේවා අධ්යක්ෂ සහ සන්නිවේදන අධ්යක්ෂ (වැඩබලන) ජයලත් පෙරේරා මහතා ඇතුළත් වූහ.
කථානායකවරයා බෝආඕ සංසදයේ සභාපති බන් කී මූන් සහ සංසදයේ මහලේකම් ෂැං ජුන් මහත්වරු හමු විය. එම රැස්වීමේ දී බන් කී මූන් මහතා, ගෝලීය අස්ථිරතාව ඉහළ යමින් පවතින මෙවන් අවස්ථාවකදී ආසියාවේ සංවාදය හා සහයෝගීතාව සඳහා බෝආඕ සංසදයේ වැදගත්කම අවධාරණය කර තිබේ. වර්තමාන අභියෝගයන්ට මුහුණදීමට ශක්තිමත් දේශපාලන නායකත්වය අත්යවශ්ය බව ද පෙන්වා දී තිබේ.
ශ්රී ලංකාවේ කලාපීය භූමිකාව ද ඔහු ප්රශංසාවට ලක්කර තිබේ. එක්සත් ජාතීන්ගේ මහ ලේකම් ලෙස සේවය කළ කාලයේ ශ්රී ලංකාවේ කළ සංචාරය සිහිපත් කරමින්, යුද ගැටුම්වලින් පසු කාලය තුළ රට ලබාගත් ප්රගතිය ද බන් කී මූන් මහතාගේ ඇගයීමට ලක් විය. ආසියානු කලාපය සහ ලෝකය මුහුණ දෙන සංකීර්ණ අභියෝගවලදී සංවාදය, සහයෝගීතාව සහ ප්රතිපත්තිගරුක නායකත්වයේ වැදගත්කම කථානායකවරයා අවධාරණය කර ඇත.
ඵලදායී සහභාගීත්වයක් සඳහා බෝආඕ සංසදය සහ එහි නිර්මාතෘවරුන්ගේ කාර්යභාරය ඇගයීමට ලක්කරමින් සාමය සහ බහුපාර්ශ්විකත්වය ඉදිරියට ගෙන යෑමේදී ලබාදෙන ගෝලීය නායකත්වය වෙනුවෙන් බන් කී මූන් මහතාට ප්රශංසා කළේය. ශ්රී ලංකාවේ අත්දැකීම් සඳහන් කරමින්, ස්ථාවර හා සමෘද්ධිමත් සමාජයක් ගොඩනැඟීමේදී සංහිඳියාව, සියලු දෙනාටම අවස්ථාව ලබාදීම සහ යහපාලනයේ වටිනාකම ඔහු අවධාරණය කළේය. දූෂණයට එරෙහිව සටන් කිරීමට සහ ප්රජාතන්ත්රවාදී ආයතන ශක්තිමත් කිරීමට ශ්රී ලංකාවේ කැපවීම නැවත තහවුරු කළේය.
දේශගුණික විපර්යාස සහ මානුෂීය අභියෝගවලට මුහුණදීම සඳහා වැඩිදියුණු කළ ගෝලීය සහයෝගීතාවේ අවශ්යතාව ද කථානායකවරයා පෙන්වා දුන්නේය. සාමකාමී සහ තිරසර අනාගතයක් හැඩගැස්වීම සඳහා සාමූහික ක්රියාමාර්ග, අන්යෝන්ය ගෞරවය සහ වගකීම අත්යවශ්ය බව අවධාරණය කළේය. කථානායකවරයා “නව ප්රවණතා, නව අවස්ථා සහ නව සහයෝගිතා සමඟින් අනාගතය එක්ව හැඩගස්වමු” තේමාව යටතේ සමුළුවේ ප්රධාන සැසිවාරය ඇමතීය.
චීනයේ ජාතික මහජන කොංග්රසයේ ස්ථාවර කමිටු සභාපති ෂාඕ ලෙජි මහතා ප්රධාන සැසිවාරයට සහභාගි වී ප්රධාන දේශනයක් පැවැත්වීය. සිංගප්පූරුවේ අගමැති ලෝරන්ස් වොන්ග්; අසර්බයිජාන් ජාතික සභාවේ කථානායක සහිබා ගෆරෝවා සහ කසකස්තානයේ පළමු නියෝජ්ය අගමැති රෝමන් ස්ක්ලියාර් මහත්ම මහත්මීහු ද මෙම සමුළුවට එක්ව සිටියහ.
මෙම සමුළුවට සමගාමීව, චීනයේ ජාතික මහජන කොංග්රසයේ ස්ථාවර කමිටු සභාපති ෂාඕ ලෙජි මහතා සමඟ කථානායකවරයා ද්විපාර්ශ්වික සාකච්ඡාවක් ද පැවැත්විණි. කථානායකවරයා ලෙස සිය පළමු චීන නිල සංචාරය මෙය බව සඳහන් කළ කථානායකවරයා, එය දිගුකාලීන ද්විපාර්ශ්වික සබඳතා තවදුරටත් ශක්තිමත් කරනු ඇතැයි විශ්වාසය පළ කළේය.
ශ්රී ලංකාව සහ චීනය අතර සේද මාවත ඔස්සේ වෙළෙඳ හා සංස්කෘතික හුවමාරු හරහා වසර 2,000කට වැඩි කාලයක් පුරා දීර්ඝකාලීන සබඳතා පවතින බව කථානායකවරයා සිහිපත් කළේය. නිරතුරුව චීනය ලබාදුන් අඛණ්ඩ සහයෝගය මෙන්ම විශේෂයෙන් දිට්වා සුළි කුණාටුවෙන් පසු ලබාදුන් සහය පිළිබඳව ඔහු සිය කෘතඥතාව මෙහිදී පළ කළේය.
දෙරට අතර සංචාරක ව්යාපාරයේ සැලකිය යුතු වර්ධනයක් ඇති බව කථානායකවරයා පෙන්වා දුන්නේය. චීන සංචාරකයන්ගේ පැමිණීම සැලකිය යුතු ලෙස ඉහළ ගොස් ඇති බවත්, එමඟින් චීනය, ශ්රී ලංකාවට වැඩිම සංචාරකයන් පැමිණෙන රටවල් පහෙන් එකක් බවට පත්ව ඇති බවත් සඳහන් කළේය. චීන ජාතිකයන් සඳහා වීසා රහිත විධිවිධාන හඳුන්වාදීම මෙම ඉහළ යෑමේ ප්රවණතාවට ධනාත්මක ලෙස දායක වී ඇති බව ද ඔහු වැඩිදුරටත් සඳහන් කළේය.
චීනයේ ජාතික මහජන කොංග්රසයේ ස්ථාවර කමිටුවේ සභාපති ෂාඕ ලෙජි මහතා ප්රකාශ කළේ, ද්විපාර්ශ්වික හුවමාරු තවදුරටත් ශක්තිමත් කරමින්, ශ්රී ලාංකේය ජාතිකයන් සඳහා ද වීසා රහිත විධිවිධාන හඳුන්වාදීම සඳහා පියවර ගැනීමට අපේක්ෂා කරන බවයි.
2001දී පිහිටුවන ලද බෝආඕ ආසියානු සංසදය, ආසියාව පුරා සහ ඉන් ඔබ්බට රජයන්, ව්යාපාර සහ ශාස්ත්රාලිකයන් අතර සංවාද සඳහා ඉහළ මට්ටමේ වේදිකාවක් සපයන රාජ්ය නොවන සහ ලාභ නොලබන ජාත්යන්තර සංවිධානයකි.
කලාපීය ආර්ථික සහයෝගීතාව, සියලු දෙනාට අවස්ථා හිමි වන ගෝලීයකරණය සහ බහුපාර්ශ්විකත්වය ප්රවර්ධනය කිරීමට අඛණ්ඩව කටයුතු කරන මෙම සංසදයේ 25 වැනි සංවත්සරය මෙම වසරට යෙදී තිබේ. බෝආඕ ආසියානු සංසදයේ වාර්ෂික සමුළුව ප්රධාන කලාපීය සහ ජාත්යන්තර ගැටලු පිළිබඳව සාකච්ඡා කිරීමට සහ සංවර්ධනය සඳහා අන්යෝන්ය සහයෝගීතාව වර්ධනය කිරීමට ගෝලීය නායකයන්, ප්රතිපත්ති සම්පාදකයන්, කර්මාන්ත විශේෂඥයන් සහ විද්වතුන් එක්රැස් කරන ප්රමුඛ වේදිකාවක් ලෙස පිළිගැනේ.
උපුටා ගැනීම දිනමිණ වෙබ් පිටුවෙනි.