රටේ ස්වාධීන අධිකරණ පද්ධතියට අනවශ්ය ලෙස දේශපාලන මැදිහත් වීම් නොකිරීම හේතුවෙන් මානව හිමිකම්, වංචා හා දූෂණ දර්ශකවලින් ඉදිරියට පැමිණ තිබෙන බව අධිකරණ සහ ජාතික ඒකාබද්ධතා ඇමැති හර්ෂණ නානායක්කාර මහතා පාර්ලිමේන්තුවේ දී ඊයේ (17) ප්රකාශ කළේය.
විසර්ජන පනත් කෙටුම්පත (2026) අය-වැය කාරක සභා අවස්ථාවේ විවාදයට එක්වෙමින් ඒ මහතා මේ බව සඳහන් කළේය. විදේශ කටයුතු විදේශ රැකියා හා සංචාරක අමාත්යාංශයේ සහ අධිකරණ හා ජාතික ඒකාබද්ධතා අමාත්යාංශයේ වැය ශීර්ෂ සම්බන්ධයෙන් මේ විවාදය පැවැත්විණි.
එහිදී වැඩිදුරටත් හර්ෂණ නානායක්කාර මහතා මෙසේද පැවසීය.
ගුරුවරුන්ට ලැබෙන මුදල ප්රමාණවත් නැහැ කියන්න දන්නවා. එය ප්රමාණවත් ලෙස වැඩි කරන්න මේ වනවිට සාකච්ඡා සිදුවෙනවා. ඔවුන්ගේ වෘත්තීයභාවය සම්බන්ධයෙන් සලකා බැලිය යුතුයි. අධිකරණ ක්ෂේත්රයේ ප්රශ්න තිබෙනවා. ඩිජිටල් පද්ධතියක් නොමැතිවීම, බන්ධනාගාර තදබදය ආදිය තිබෙනවා. කාලයක් තිබුණු ප්රශ්න විසඳන්න පියවර ගන්නවා. අපි ජාත්යන්තර වශයෙන් දූෂණය නොමැතිවීමේ දර්ශකයට අනුව 63 වැනි ස්ථානයේ සිට 61 දක්වා පැමිණ තිබෙනවා. මානව හිමිකම් දර්ශකයේ 86 සිට 85 දක්වා පැමිණ තිබෙනවා. මානව හිමිකම් ආරක්ෂා කිරීමේ ඉදිරියට පැමිණ තිබෙනවා. අධිකරණයේ හා විගණනයේ ස්වාධීනත්වය පෙන්නුම් කරන දර්ශකයේ 76 සිට 68 දක්වා ඉදිරියට පැමිණ තිබෙනවා. අපේ රටේ පුරවැසියන් ලෝකයේ ඉදිරියේ නැවතත් පිළිගැනීමේ තත්ත්වයක් නිර්මාණය කරනවා. පසුගිය වසරේ දී අධිකරණ ක්ෂේත්රයට විශාල මුදලක් වෙන් කළා. මෙවර රුපියල් බිලියන 58.5ක මුදලක් වෙන්කර තිබෙනවා.
මේ අභියෝගාත්මක අවස්ථාවේ වුවද 2871ක් බඳවා ගන්න අනුමැතිය දී තිබෙනවා. අධිකරණයට සහ බන්ධනාගාරයට එම බඳවා ගැනීම කරනවා. අධිකරණ අමාත්යාංශය අපරාධ නීතිය, සිවිල් නීතිය සම්බන්ධයෙන් පාර්ලිමේන්තුවට ප්රතිපත්ති ඉදිරිපත් කරනවා. නීති ක්ෂේත්රයේ ප්රවීණයන්ගේ උපදෙස් අනුව කටයුතු කරන්නේ නොමැති නම් ගැටලු ඇති වෙනවා.