වැදගත් රාජ්‍ය තාන්ත්‍රික හමුවකදී ජනාධිපති රනිල් වික්‍රමසිංහ මහතා ඊයේ (19) නිව්යෝර්ක් නුවරදී බංග්ලාදේශ අගමැතිනි ෂීක් හසීනා මහත්මිය සමඟ ඵලදායී හමුවක් පැවැත්වීය.
මෙම හමුවේදී දකුණු ආසියානු රටවල් දෙක අතර ද්විපාර්ශ්වික සබඳතා සහ සහයෝගීතාවයේ විවිධ පැතිකඩයන් පිළිබඳව සාකච්ඡා කෙරිණි.
මූල්‍ය අර්බුදයෙන් ශ්‍රී ලංකාව ඉක්මනින් යථා තත්ත්වයට පත්වීම පිළිබඳව තමන් සතුටට පත්වන බව අගමැතිනි ෂීක් හසීනා ජනාධිපති වික්‍රමසිංහ වෙත දන්වා සිටි අතර, ශ්‍රී ලංකාව මෙතරම් වේගයෙන් ණය ආපසු ගෙවනු ඇතැයි තමන් අපේක්ෂා නොකළ බව ද සඳහන් කළාය.
සාකච්ඡා අතරතුර, ජනාධිපති වික්‍රමසිංහ මහතා, අභියෝගාත්මක කාලවලදී ශ්‍රී ලංකාවට දක්වන නොසැලෙන සහයෝගය සහ සහය වෙනුවෙන් අගමැතිනි ෂීක් හසීනා සහ බංග්ලාදේශ ජනතාව වෙත සිය හෘදයාංගම කෘතඥතාව පළ කළේය.
ඔහු ශ්‍රී ලංකාවට ලැබුණු සහය පිළිගත් අතර බංග්ලාදේශයේ ත්‍යාගශීලීභාවය පිළිබඳව සිය ගැඹුරු අගය ප්‍රකාශ කළේය. විවිධ කැපවීම් සහ තත්ත්වයන් හේතුවෙන් පසුගිය කාලයේ බංග්ලාදේශයට යාමට නොහැකි වීම සම්බන්ධයෙන් ජනාධිපති වික්‍රමසිංහ මහතා කාරුණික අභිනයකින් සමාව අයැද සිටියේය. දෙරට අතර සබඳතා ශක්තිමත් කර ගැනීමේ තම අභිලාෂය තහවුරු කළ ඔහු බංගලාදේශ රජයේ පහසුව අනුව නොවැම්බර් හෝ දෙසැම්බර් මාසවල බංග්ලාදේශයට පැමිණීමේ හැකියාව යෝජනා කළේය.
වඩාත් පෞද්ගලික අදහස් හුවමාරුවකදී, අගමැතිනි ෂීක් හසීනා තම පවුලේ ඛේදනීය ඉතිහාසය බෙදා ගත්තේ, තම ආදරණීයයන්ට සිදු වූ විනාශකාරී ඝාතන විස්තර කරමිනි. නායකයන් දෙපළ අතර පැවති සුහද සංවාදය ඔවුනොවුන්ගේ අත්දැකීම් සහ අභිලාෂයන් පිළිබඳව ගැඹුරු අවබෝධයක් ලබා ගැනීමට ඉඩ සැලසීය.