( මෙම ලිපිය ‘රාඩා නඩුවෙන් එළියට පනින රාජපක්ෂ කොටි පූට්ටුව’ නමින් 2018 අගෝස්තු 05 දා අනිද්දා පුවත්පතේ පළවිය. මෙම ලිපිය මෙලෙස පළ කරන්නට අපි කල්පනා කළේ මෙම දූෂිත ගණුදෙණුව කළ පුද්ගලයා අද පොලීසිය භාර අමාත්‍යවරයා බවට පත්වීමය. වර්තමානයේ ජනතාව බලාපොරොත්තුවන්නේ සුපිරිසිදු ආණ්ඩුකරණයක් ය. ඔවුන් මහපාරේ අරගලයට බැස තිබෙන්නේ ඒ සඳහාය. එහෙත් ගෝඨාභය-රනිල් සුසංයෝගය
මෙම වර්තමාන තත්ත්වය පිළිබඳව සිතන්නේ කුමක්ද? මේ පත් කිරීම එයට හොඳම නීදර්ශනය යි )
කේ. සංජීව
මහින්ද රාජපක්ෂ කොටින්ට රිදෙන්න ගසා කොටි මෙරටින් තුරන්කළ රාජ්‍ය නායකයා ය. ඔහු ඒ සඳහා ම ඉපදුණ පුද්ගලයෙක්ය. ඔහු අගමැති වෙන්නේද ඉනාතුරුව ජනාධිපති වෙන්නේද වෙන කිසිවෙකට නොව මේ ඉතිහාසගත අවශ්‍යතාවය සඳහාමය. මේ අනුව 2005දී ඔහු මෙරට ජනපති වෙන්නේ යුද්ධ කරන්නටමය. ලංකාවේ බහුතරයක් සිංහල ජනතාව සිතන්නේ එලෙසින්ය. රාජපක්ෂ නරුමකම වැසෙන සේ ශුක්ෂමව තැවරූ අයිසින් තට්ටුව එයයි. මේ අයිසින් තට්ටුව දියකර සැබෑ රාජපක්ෂවරුන් යනු කවරහුද යන්න මතුකරන නඩුකරයක් දැන් කොළඹ මහාධිකරණයේ විභාග වෙමින් තිබේ. රාජපක්ෂවරුන්ට තවමත් කඩේ යන හිට්ලර් පන්නයේ රාජපක්ෂ කෙනෙක් බලයට ගෙනෙන්න දතකට මදිමින් සිටින පුද්ගලික මාධ්‍ය වියාපරවලට මෙන්ම සමහර රාජ්‍ය මාධ්‍යවල සිටින ඒ සිහිනයම දකින මාධ්‍යවේදීන්ට ද මගහැරෙමින් තිබෙන මේ නඩුව පිළිබඳව අප මෙසේ ලියන්නට සිතුවෙමු. මේ අන්කිසිවක් නොව ටිරාන් අලස්ට විරුද්ධව ඇසෙන රාඩා නඩු විභාගයයි.
රාඩා යනු කුමක්ද?
මෙහි දිගු නම උතුරු නැගෙනහිර ප්‍රතිසංස්කරණ හා සංවර්ධන ඒජන්සිය යන්නයි. 2005/11/28 හිටපු ජනපති මහින්ද රාජපක්ෂ ගේ විධානයක් අනුව මෙම ආයතනය පිහිටුවා එහි සභාපතිවරයා ලෙස ටිරාන් අලස් මහතා පත්කර ඇත. මේ ආයතනය පිහිටුවීමේ මූලික අරමුණ සේ දැක්වෙන්නේ සුනාමියෙන් විනාශවූ උතුරු නැගෙනහිර නිවාස නැවත ගොඩනැගීමය. එහෙත් මේ අරමුණ බොරුවක්ය. ඇත්තටම මේ ආයතනය අරඹන්නේ කොටි සංවිධානයට මුදල් ආධාර ලබාදීම සඳහාය. ඒ විදිමත් ක්‍රමයකට රාජ්‍ය අරමුදල් උතුරට පොම්පකර අතපිස දමාගැනීම සඳහා ය. දැන් හෙළිවී තිබෙන්නේ නිවාස 1200ක් හදනබව කීවත් ඒ සඳහා රජය මුදල් වෙන්කර මුදා හැරියත් කිසිඳු නිවසක් හදා නැති බවය. ඒ අනුව ඒ මුදල්වලින් කොටසක් කොටි සංවිධානයට ද තවත් කොටසක් ටිරාන් අලස් මහතාගේ සාක්කුවටද ගොස් ඇත.
කතාවේ මුලට යමු
ටිරාන් අලස් සහ නැසීගිය හිටපු අමාත්‍ය දොස්තර ජයලත් ජයවර්ධන හිතවතුන්ය. 2002-2004 ආණ්ඩුවේ පුනුරුත්ථාපනය පිළිබඳව කටයුතු කළ අමාත්‍යවරයා ඔහුය. එවක සටන්විරාමය ක්‍රියාත්මක අවධියේ කොටි බුද්ධි අංශයේ සිටි එමිල් කාන්තන් නැමැත්තා දොස්තර ජයලත් ජයවර්ධන ළග වැඩකර ඇත. ඒ බව අදාළ අමාත්‍යවරයාම ත්‍රස්ත විමර්ෂණ අංශයට ප්‍රකාශයක් ලෙස පසු කාලයේ ලබාදී ඇත. මේ එමිල් කාන්තන් දොස්තර ජයලත් ජයවර්ධන මහතා විසින් ටිරාන් අලස් මහතාට හඳුන්වා දෙන්නේ ඔහුගේ වියාපාරික කටයුතු උතුරේ දියත් කිරීම සඳහා කොටි සංවිධානය සමග අවශ්‍ය සම්බන්ධතාවයන් ගොඩනගා ගැනීම සඳහා ය. ඒ ටිරාන් අලස් මහතාගේ සී බී ඊ නම් 1988 දී සේවකයින් 10 දෙනෙකුගෙන් පමණ ආරම්භ කළ සන්නිවේදන උපකරණ වෙළදාමේ නියුක්ත වූ සමාගම ඩයලොග් ආයතනය සමග එකතුවී සන්නිවේදන අංශයේ වියාපාරික කටයුතු උතුරේ වියාප්ති කරලීම සඳහා ය. මෙලෙස ගොඩනැගෙන එමිල් – ටිරාන් සම්බන්ධතාවය දිගටම වැඩි වර්ධනය වනාතර 2002- 2004 ආණ්ඩුව බිඳවැටෙන අතර ඊළග ආණ්ඩුවේ අගමැතිවරයා වන්නේ මහින්ද රාජපක්ෂය. සිවිල් ගුවන්සේවා අමාත්‍යවරයා වන්නේ මංගල සමරවීරය. මංගල සමරවීර සහ ටිරාන් අලස් අතර තිබුණු බැදියාව මත ඔහු ගුවන් තොටුපළ සහ ගුවන් සේවා අධිකාරියේ සභාපති ලෙස පත්කරන්නේය.
මෙලෙස කාලය ගතවෙනාතර 2005 ජනපතිවරණය පැමිණෙයි. එම මැතිවරණයේදී මහින්ද රාජපක්ෂ මහතා දිනවීමේ ඡන්ද වියාපාරයේ කැපීපෙනෙන චරිතයක් වූ මංගල සමරවීර විසින් ටිරාන් අලස් මහතා මැතිවරණ ප්‍රචාරණ කමිටුවේ සාමාජිකයෙක් ලෙස නම්කරන්නේය. එම කමිටුව රැස්වූ එක අවස්ථාවක, කොටි සංවිධානය සමග සම්බන්ධයක් සාදාගැනීමට කෙනෙකු සිටින්නේදැයි මහින්ද රාජපක්ෂ විසින් ටිරාන් අලස් ගෙන් අසා ඇත. එහිදී ඔහු එමිල් කාන්තන් පිළිබඳව මහින්ද රාජපක්ෂ දැනුවත් කර ඇති අතර එහිදී එමිල් කාන්තන් බැසිල් රාජපක්ෂට හඳුන්වා දෙන්න යැයි මහින්ද රාජපක්ෂ ටිරාන්ට පවසා ඇත. එම ඉල්ලීමත් සමග ටිරාන් එමිල් කාන්තන් සහ බැසිල් රාජපක්ෂ එකදිගට බොරැල්ලේ ටිරාන්ගේ වියාපාරික ස්ථානයේදී මුණගැසී ඇත. මේ පිළිබඳව ටිරාන් අලස් ද පසු අවස්ථා කිහිපයකදීම මාධ්‍යට පවසා ඇත.
මෙලෙස කොටි සංවිධානය සහ රාජපක්ෂ පවුල අතර සම්බන්ධය වැඩි වර්ධනය වනවිට රාජපක්ෂ පාර්ශවය එමිල් කාන්තන් හරහා කොටි සංවිධානයට යෝජනා කරන්නේ හොඳහිත සහ අන්‍යොන්‍ය බැඳීම තවත් වර්ධනය කරගැනීම සඳහා අවශ්‍යතා තිබේනම් ඉල්ලන්න කියා ය. එහිදී කොටි සංවිධානය බෝට්ටු ලබාගැනීමට මිලියන 180ක මුදලක් ඉල්ලා ඇත. එම ඉල්ලීමට එකහෙළාම කැමැත්ත පලකරන බැසිල් රාජපක්ෂ පසු අවස්ථාවකදී එම මුදල ඇමරිකානු ඩොලර් සහ ශ‍්‍රී ලංකා රුපියල් වලින් ට්‍රැවලින් බෑග් කිහිපයක දමා ටිරාන් අලස්ගේ ස්ථානයේදී ඔහු ඉදිරිපිටදීම එමිල් කාන්තන් හට ලබා දී ඇත
2010/01/22 වැනි දින ටිරාන් අලස් ගේ බොරැල්ල නිවසට බෝම්බ ප්‍රහාරයක් එල්ල වූ අවස්ථාවේ එම බෝම්බය පිපිරී ගිය ස්ථානයේ මාධ්‍ය හමුවක් පවත්වමින් ටිරාන් අලස් මහතා බැසිල් රාජපක්ෂ විසින් එමිල් කාන්තන් හට මෙම මුදල් දුන් සිද්ධිය ප්‍රසිද්ධියේ පවසා ඇත. ඊට ප්‍රථම ඔහු මේ පිළිබඳව තස්ත්‍ර විමර්ෂණ ඒකකයටද ප්‍රකාශයක් ලබා දී ඇත. ඉන්පසුව කොටි සංවිධානය දිගින් දිගටම මුදල් ඉල්ලා ඇති අතර රාජපක්ෂ පාර්ශ්වයෙන් කොටි සංවිධානයෙන් ඉල්ලීම් දෙකක් ඉල්ලා ඇත. 2005 ජනාධිපතිවරණ ඡන්දය වර්ජනය කරන ලෙස උතුරු නැගෙනහිර ජනතාවට නියෝගයක් ලබා දෙන ලෙස සහ රාජපක්ෂ පවුලට කිසිඳු ප්‍රහාරයක් එල්ල නොකරන ලෙසය. කොටි සංවිධානය එහිදී මේ ඉල්ලීම් දෙකටම එකඟවී ඇති අතර එහි එහි ප්‍රතිපළය ලෙස උතුරේ මිනිසුන් ඡන්දය වර්ජනය කරන්නෝය. ඒ අනුව මහින්ද රාජපක්ෂ ජනපති පදවියට පත්වෙන අතර ඉන්පසුව දිගටම කොටි සංවිධානයට මුදල් ආධාර ලබාදීමට මෙම ආයතනය පිහිටුවා එහි ප්‍රධානියා ලෙස ටිරාන් අලස් පත්කරන්නේය. රාඩා ආයතනය ඇරඹීමේ ඉතිහාස කතාව මේකය.
රාඩා ගණුදෙනු
ඉහත විස්තර කළ අයුරින් ඇරඹි රාඩා ආයතනයට 2006 අගෝස්තු 2 වැනි දින කැබිනට් පත්‍රිකාවක් මගින් රුපියල් 757,166,000ක මුදලක් වෙන්කරන්නේ උතුරු නැගෙනහිර ග්‍රාමසේවක වසම් 42ක සුනාමියෙන් විනාශ වූ නිවාස ගොඩනැගීම සඳහා නිවාස වියාපෘතියක් ඇරඹීමට ය. ඒ මේ මුදලින් නිවාස 1200ක් ගොඩනැගී ම සඳහා ය. gs builders and consultants of vavuniva යන ආයතනය මෙම නිවාස වියපෘතියේ උපදේශන සේවාව සඳහා තෝරාගත් බව ද නොම් බර 437A , 3 පටුමග, හිරුනව්කුලම්, තාන්ඩිකුලම්, වව්නියා යන ලිපිනයේ බී ඇන්ඩ් කේ හෝල්ඩින්ග් ස් යන ආයතනය ත්‍රිකුණාමලයේ නිවාස 400ක් සෑදීම සඳහා ද තවත් නිවාස 400ක් මඩකළපුවේ සෑදීම සඳහා 113/1, මීල් පාර, උකුලම්කුලම්, වව්නියා යන ලිපිනයේ ලියාපදිංචි එවරස්ට් සිවිල් ඉන්ජිනේරින් සර්විස් සමාගමද තෝරාගෙන ඇතිබව එම කැබිනට් පත්‍රිකාවේ සඳහන් කර ඇත. දැන් හෙළිවී තිබෙන්නේ මේ ආයතන තුනම මේ ගනුදෙනු සඳහාම රාජපක්ෂ හිතවතුන් විසින් ගොඩනැගු වියාජ සමාගම් බවය. ඒ අනුව මේ මුදල් වෙන්කිරීමේ ඇත්ත උවමනාව අන්යමක් නොව කොටි සංවිධානයට මුදල් ලබා දීමය. එය සක්සුදක් සේ පැහැදිලිය.
මෙහිදී චෙක්පත් 9යක් මගින් රුපියල් මිලියන 124ක මුදලක් ආණ්ඩුව ගෙවා ඇත. ඉන් චෙක්පත් දෙකකට ටිරාන් අලස් මහතා අත්සන් තබා ඇතිබවද දැනගන්නට ලැබේ. මෙහිදී මෙම ව්‍යාපෘතිය ටිරාන් අලස්, එමිල් කාන්තන් සහ සාලිය වික්‍රමසූරිය යන අය රාඩා ආයතනය මගින් කරගෙන ගොස් ඇත. ඉන්පසුව මෙලෙස කොටි සංවිධානයට යවන්නට රාඩා ආයතනයට ලබා දුන් මුදල් නිසිපරිදි කොටි සංවිධානයට ලබා දී නැත. ඒ අනුව කොටි සංවිධානය සහ රාජපක්ෂවරුන් අතර තිබූ මූලික එකඟතාවය රාජපක්ෂවරුන් බිඳ දමා ඇතැයි කොටි සංවිධානය සැකකර ඇත. ඉන්පසුව එවක හමුදාපති සරත් ෆොන්සේකාට ප්‍රහාරයක් එල්ල කිරීම ද ආරක්ෂක ලේකම් ගෝඨාභය රාජපක්ෂ හට පිත්තල හන්දියේදී ප්‍රහාරයක් එල්ල කිරීමද මාවිල් ආරු වසා දැමීමද අනතුරුව යුද්ධයද මෙම එකඟතාවය බිඳ දැමිම නිසා හටගත් තත්ත්වයන් බව සිතීම අසාධාරණ නැත. කොටි සංවිධානය මාවිල් ආරු සොරොව්ව වසාදැමූ පසුව මහින්ද රාජපක්ෂ පාර්ශවය එය නැවත විවුර්ත කරගැනීම සඳහා එමිල් කාන්තන් හරහා නොයෙක් උත්සාහයන් අවසන් මොහොත දක්වා ගත්බව ද දැන් හෙළිවී තිබෙන තොරතුරුය.
රාඩා නඩුව
රාජපක්ෂවරුන් බලයෙන් පහකිරීමෙන් පසුව රාඩා ආයතනය නමින් සිදුවූ මේ ගනුදෙනු පිළිබඳව සොයා බලන්න යැයි දුෂණ විරෝධී පෙරමුණ පොලිස්පතිවරයාට පැමිණිලි කරන්නේය. ඒ 2015 පෙබරවාරි 25 වැනි දිනය. ඉන් අනතුරුව පොලිසිය මේ පිළිබඳව පරීක්ෂණ කරන අතර එහි ප්‍රථිපලය ලෙස නීතිපති දෙපාර්තමේන්තුව ටිරාන් අලස්, එමිල් කාන්තන්, ජාලිය වික්‍රමසූරිය යන අයවලූ‍න්ට රුපියල් මිලියන 124ක මුදලක් සාවද්‍ය ලෙස පරිහරණය කිරීමට එරෙහිව අධිචෝදනා ගොනුකරනු ලැබිණි. මේවනවිට එම නඩුවේ පැමිණිල්ලේ සාක්ෂි විභාගයන් සිදුවෙමින් තිබෙන්නේය. ඒ කොළඹ මහාධිකරනයේදීය. ඒ අනුව මේ දුෂිත ගනුදෙනුවේ ද ඊට මුල්වූ ගනුදෙනු වල ද සත්‍ය තොරතුරු අනාවරණය වනු ඇත. ඒ අනුව දේශපේ‍්‍රමයේ සළුපිළි දවටාගෙන සිටින මහින්ද රාජපක්ෂ ප්‍රමුඛ රාජපක්ෂ පවුලේ වහන්තරාව ගැලවී යනු ඇත.
වීඩියෝ මූලාශ්‍ර :