කිලිනොච්චියේ වනජීවී දෙපාර්තමේන්තුව පවරා ගෙන ඇති ඉඩම් අක්කර දහස් ගණනක් නිදහස් කිරීමට ජනාධිපතිවරයා නියෝග කොට තිබේ.
වගා කටයුතු සඳහා වෙන් කෙරෙන එම ඉඩම් පෞද්ගලික සමාගම් වලටත් ලබාදීමට රජය සූදානම් ව සිටී.
යුද්ධය ඇරඹීමට පෙර දෙමළ ජනයා පදිංචිව සිටී හා ගොවිතැන් කළ ඉඩම් අක්කර 2119 ක් යළි අයිතිකරුවන් වෙත ලබා දීමට තීරණය වී ඇත්තේ හා ඊළාම් ජනතා ප්‍රජාතන්ත්‍රවාදී පක්ෂයේ නායක ඩග්ලස් දේවානන්ද විසින් ජනාධිපති ගෝඨාභය රාජපක්‍ෂ වෙත කරුණු පැහැදිලි කිරීමෙන් අනතුරුව බව ධීවර අමාත්‍යාංශය පවසයි.
අමාත්‍ය දේවානන්ද පෙන්වා දී ඇත්තේ යුද ගැටුම් ඇතිවීමට පෙර දෙමළ ජනයා විසින් සිය වගා කටයුතු කළ ද යුද්ධය උත්සන්න වෙත්ම ඔවුන් එම ප්‍රදේශ අත්හැර ආරක්‍ෂිත ස්ථාන කරා පළාගොස් ඇති බවය. යුද නිමාවෙන් පසු වනජීවී දෙපාර්තමේන්තුව විසින් මෙම ඉඩම් පවරා ගෙන ඇති බවද ඔහු පැවසීය.
ඒ අනුව කිලිනොච්චි දිස්ත්‍රික්කයේ කරච්චි ප්‍රාදේශීය ලේකම් කොට්ඨාශයේ ඉඩම් අක්කර 1299 ක්, කන්දාවලෙයි ප්‍රාදේශීය ලේකම් කොට්ඨාශයට අයත් ඉඩම් අක්කර 280 ක්, පච්චලෙයි පත්තු ප්‍රාදේශීය ලේකම් කොට්ඨාශයේ ඉඩම් අක්කර 453 ක්, පුනගරී ප්‍රදේශයේ ඉඩම් අක්කර 87 ක් පැරණි අයිතිකරුවන්ට කෘෂි කර්මාන්තය සඳහා මුදා හැරීමට නියමිතය. ඊට අමතරව එවකට තෘණ භූමි ලෙස පැවති පසුව වනජීවී දෙපාර්තමේන්තුව විසින් පවරා ගෙන ඇති ඉඩම් අක්කර 850 ක් ද නිදහස් කර ලෙස ජනාධිපතිවරයා අදාළ අමාත්‍යවරුන්ට නියෝග කර ඇති බව ධීවර ඇමැතිවරයාගේ සම්බන්ධිකරණ ලේකම් එම්. ස්ටාලින් කියා සිටී.
එක්සත් ජනපදය මුලස්ථාන කොටගත් ඕක්ලන්ඩ් පර්යේෂණ ආයතනය විසින් මේ අවුරුද්දේ මාර්තු මාසයේ නිකුත් කළ සංඛ්‍යා ලේඛන වල දැක්වෙන පරිදි රජයේ ආරක්ෂක හමුදා කිලිනොච්චි දිස්ත්‍රික්කයේ අක්කර 4372 ක වාඩිලා ගෙන සිටී.