අහ්නාෆ්ගේ නිදහස වෙනුවෙන් යුරෝපා ආණ්ඩුවලින් ඉල්ලීම්!

Demands from European governments for Ahnaf jazeem release

අවුරුද්දකට වැඩි කාලයක් අත්තනෝමතික ලෙස සිරකොට තබාගෙන සිටින අහ්නාෆ් ජසීම් කවියා වහාම නිදහස් කරන ලෙස යුරෝපා රටවල් සමූහයක් ශ්‍රී ලංකාවේ ආණ්ඩුවට බල කර සිටී.

එක්සත් ජාතීන්ගේ සංවිධානයේ රටවල් නමයක් නියෝජනය කරන තානාපතිවරුන් තම ඉල්ලීම ඉදිරිපත් කර ඇත්තේ ත්‍රස්තවාදය වැළක්වීමේ පනත යොදාගෙන අත්අඩංගුවට ගන්නා ලද කිවියර හා ගුරුවර අහ්නාෆ් ජසීම් නඩු නැතිව රඳවා තබාගෙන අවුරුද්දක් පිරුණු පසුගිය මාසයේ ජාත්‍යන්තර මානව හිමිකම් සංවිධාන රැසක් කළ ඉල්ලීමෙන් අනතුරුවය.

“ජසීම් මහතා වහාම නිදහස් කරන ලෙස, එසේත් නැතිනම් සාධාරණ නඩු විභාගයක අයිතිය සහතික කරමින්, ජාත්‍යන්තර මානව හිමිකම් ප්‍රමිතීන්ට අනුගතව කඩිනමින් චෝදනා ගොනුකරන ලෙස ඉල්ලීම සඳහා අපි මානව හිමිකම් සංවිධාන ගණනාවක් සමග එක්වන්නෙමු,” යි නිවේදනයේ සඳහන් වේ.

අහ්නාෆ් ජසීම් රඳවාගෙන සිටින්නේ චෝදනා ගොනු කිරීමකින් හෝ නඩු පැවරීමකින් තොරව කිසිදු චෝදනාවක් නැති පුද්ගලයන් දහඅට මාසයක් දක්වා අත්තනෝමතික ලෙස රඳවා තබාගත හැකි ත්‍රස්තවාදය වැළක්වීමේ පනත (PTA) යටතේය.

“තවත් කල්පමා නොකර ත්‍රස්තවාදය වැලැක්වීමේ පනත පුනරීක්ෂණය කරන ලෙස නැවතත් ශ්‍රී ලංකාවේ ආණ්ඩුවෙන් ඉල්ලා සිටින අපි ත්‍රස්තවාදයට එරෙහිව සටන් වැදීම සඳහා වන ඕනෑම නීතියක් ජාත්‍යන්තර මානව හිමිකම් සහ මානුෂික නීති සම්බන්ධයෙන් රාජ්‍යයට ඇති බැඳීමට සම්පූර්ණයෙන්ම අනුකූල විය යුතුය,” යි බ්‍රිතාන්‍යය, එස්තෝනියාව, ස්පාඤ්ඤය, පින්ලන්තය, ප්‍රංශය, ජර්මනිය, ලක්සම්බර්ග්, නෙදර්ලන්තය හා ස්වීඩනය යන රටවල මානව හිමිකම් පිළිබඳ තානාපතිවරුන් නිකුත් කළ නිවේදනයේ වැඩිදුරටත් කියා සිටී.

ශ්‍රී ලංකාවේ වාර්ගික හා ආගමික සුළුතරයට එරෙහිව ත්‍රස්තවාදය වැළක්වීමේ පනත යොදාගෙන තිබෙන අතර වාර්ගිකත්වයට සමානුපාතික නොවන දෙමළ හා මුස්ලිම් පිරිසක්  එම පනත යටතේ  රඳවා තබා තිබෙන බව ජාත්‍යන්තර මානව හිමිකම් සංවිධාන අහ්නාෆ් ජසීම්ගේ නිදහස වෙනුවෙන් පසුගිය මාසයේ නිකුත් කළ නිවේදනයෙන් අවධාරණය කර තිබුණි.

ඊට අත්සන් තබා තිබුනේ පෙන් ජාත්‍යන්තරය (PEN), ජාත්‍යන්තර ක්ෂමා සංවිධානය  (AI), ශ්‍රී ලංකාවේ සාමය හා යුක්තිය සඳහා ව්‍යාපාරය (SLC), ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ශ්‍රී ලංකාව පිළිබඳ ක්‍රියාකාරී සංවිධානය (IWG), ශ්‍රී ලංකාවේ සත්‍යය හා යුක්තිය සඳහා ජාත්‍යන්තර ව්‍යාපෘතිය (ITJP),  යුක්තිය හා වගවීම සඳහා මධ්‍යස්ථානය (CJA), ජාත්‍යන්තර යුක්තිය සඳහා ඕස්ට්‍රේලියානු මධ්‍යස්ථානය (ACIJ), Article 19, Human Rights Watch, IMADR, PEARL සහ Freemuse යන සංවිධානයි.

Demands from European governments for Ahnaf jazeem release

Social Sharing

Related posts