“පාසල් දහසක්” ව්‍යාපෘතියෙන් කුඩා පාසල් වැසී යාමේ අනතුරක

වසංගත ව්‍යාප්තිය හේතුවෙන් පාසල් අධ්‍යාපනය සම්පුර්ණයෙන්ම අඩාල වී ඇති මොහොතක පාසල් දහසක් පමණක් ජාතික පාසල් ලෙස සංවර්ධනය කිරීමේ  ආණ්ඩුවේ වැඩ පිළිවෙල නිසා  සෙසු පාසල්වලට ස්වභාවික මරණයක් අත්වනු ඇති බවට ලංකා ගුරු සංගමය අනතුරු අඟවා තිබේ.

මාරාන්තික  වසංගත ව්‍යාප්තිය තුළ මේ වන විට  ලංකාවේ පාසල් අධ්‍යාපනය මුළුමනින් ම අඩාල වී ඇති අතර, බරපතල ගැටලූ ගණනාවකට අධ්‍යාපනය මුහුණ පා සිටී.

ඒ අතර පාසල් නැවත විවෘත කිරීම, පාසල් ළමුන්ගෙන් සියයට හැටකට  පමණ අධ්‍යාපනය ලැබීමේ විකල්ප ක‍්‍රමවේදයක් නොමැතිවීම, ජාතික විභාග පැවැත්වීම, 2020 අපොස සාමාන්‍ය පෙළ විභාගයේ ප‍්‍රායෝගික පරීෂක්ණ සිදු කිරීමට නොහැකි වීම තුළ ප‍්‍රතිඵල නිකුත් කළ නොහැකි වීම  ඇතුළු කඩිනමින් විසඳුම් ලබාදිය යුතු ගැටලූ ගණනාවක් ඇති බවයි ලංකා ගුරු සංගමය පවසන්නේ.

එසේ තිබියදී ආණ්ඩුවේ හා අධ්‍යාපන අමාත්‍යාංශයේ ප‍්‍රමුඛ කාර්යය බවට මේ වන විට පත්ව ඇත්තේ පාසල් දහසක් ජාතික පාසල් ලෙස ප‍්‍රතිනිර්මාණය කිරීමේ කාර්ය බවයි එම සංගමය පවසන්නේ.

කොවිඩ්  19 වසංගතය පැතිර යමින් පැවතීම හේතුවෙන් දින නියමයක් නොමැතිව පාසල් වසා තිබියදීම දැවැන්ත ප‍්‍රචාරක ව්‍යාපෘතියක නිරත වන රජය එළඹෙන ජුනි 10 දින ජාතික පාසල් දහසක් විවෘත කිරීමේ කටයුත්තක් ද සංවිධානය කර තිබුණි.

ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙන්වා දෙන්නේ ප‍්‍රදේශයේ මන්ත‍්‍රීවරයා ඇතුළු 30 දෙනෙකුගේ සහභාගිත්වයෙන් මෙම විවෘත කිරීමේ උත්සව සංවිධානය කිරීමට කටයුතු යොදා තිබු බවයි.

මෙසේ ප‍්‍රතිනිර්මාණය කෙරෙන එක් ජාතික පාසලක සංවර්ධන කටයුතු සඳහා රුපියල් ලක්ෂ 10 ක මුදලක් ලබා දෙන බව පැවසූවද මේ දක්වා කිසිදු පාසලකට මෙම මුදල ලැබී නැති බවත්, රුපියල් ලක්ෂ 3 ක් වැය කර පාසලේ නාම පුවරුව සකස් කිරීම හා තීන්ත ආලේප කිරීම කළ යුතු බවත් ගුරු සංගම් නායකයා පෙන්වා දෙයි.

කිසිදු විද්‍යාත්මක පදනමකින් තොරව මෙම පාසල් තෝරාගෙන ඇති බවට චෝදනා නගන ජ්‍යෙෂ්ඨ වෘත්තිය සමිති නායකයා පෙන්වා දෙන්නේ  සිසුන් 750 ට වැඩි පළාත් සභා පාසල් මේ සඳහා තෝරාගෙන ඇති අතර, සමහර පාසල් පළාතේ මන්ත්‍රීවරයාගේ  අවශ්‍යතාව මත තෝරාගෙන ඇති බවයි.

පළාත් සභා බලතල ආපසු පවරා ගැනීමක්

රටේ ප‍්‍රධාන නගරවල පවතින බහුතරයක් ජනප්‍රිය  පාසල් මේ සඳහා ඇතුළත් වී ඇති බව පෙන්වා දෙන ලංකා ගුරු සංගමය අවධාරණය කරන්නේ ආණ්ඩුවට සැබෑ ලෙසම පාසල් සංවර්ධනය කිරීමේ උවමනාවක් පවතින්නේ නම් පළාත් සභා විසින් සංවර්ධනය කරන ලද ජනප්‍රිය  පාසල් පමණක් ජාතික පාසල් කිරීමට තෝරා නොගෙන ජනප්‍රිය  නොවන සෙසු කුඩා පාසල් සංවර්ධනය කිරීමට කටයුතු කළ යුතුව තිබු බවයි.

“පළාත් සභා, ජනතා නියෝජිතයන් මගින් ක්‍රියාත්මක නොවන අවස්ථාවකදී පළාත් සභා විසින් සංවර්ධනය කරන ලද මෙම පාසල් පළාත් සභාවල කිසිදු විමසීමකින් තොරව මේ ආකාරයෙන් රේඛීය අමාත්‍යාංශය යටතට පවරා ගැනීම 13 වැනි ව්‍යාවස්ථා සංශෝධනය යටතේ පළාත් සභාවලට පවරන ලද බලතල ආපසු පවරා ගැනීමකි. එසේම මෙය ආණ්ඩුක‍්‍රම ව්‍යවස්ථාවට ද පටහැනි ක්‍රියාවකි.”

ලංකා ගුරු සංගමය අවධාරණය කරන පරිදි 13 වන ආණ්ඩුක‍්‍රම ව්‍යවස්ථා සංශෝධනයේ 3 වන පරිශිෂ්ඨයෙහි දක්වා ඇති සමගාමී ලැයිස්තුව තුළ පාසල් සම්බන්ධයෙන් විධිවිධාන දක්වා ඇති අතර, රේඛීය අමාත්‍යාංශයට හිමි වන්නේ නිශ්චිත පාසල් සහ හමුදා සාමාජිකයන්ගේ දරුවන් සඳහා වෙන්කරන ලද පාසල්ය.

නිශ්චිත නොවන පාසල් පළාත් සභා සතුවන අතර රේඛීය අමාත්‍යාංශයට කළ හැක්කේ අධීක්ෂණ හා කළමනාකරණ කටයුතු පමණි. එම විධිවිධානවලට අනුව විශේෂිත සංවර්ධන කටයුත්තක් සඳහා රේඛීය අමාත්‍යාංශයට පාසල් වෙන් කර ගත හැකි වුවත් ඒවා පැවතිය යුත්තේ පළාත් සභා සතුවය.

ලංකා ගුරු සංගමය පෙන්වා දෙන පරිදි පාසල් දහසක් ජාතික පාසල් කිරීමේ මෙම ක්‍රියාවලිය තුළ දැනට පාසල් පද්ධතිය තුළ සිටින ලක්ෂ 43 ක් පමණ වන සමස්ත සිසුන්ගෙන් 60% කට ආසන්න ප‍්‍රමාණයක් රේඛීය අමාත්‍යාංශයේ පාලනය යටතට පත්වේ.

දැනටමත් රේඛීය අමාත්‍යාංශය යටතේ පාලනය වන ජාතික පාසල් 373 න් පාසල් 172 කට විදුහල්පතිවරු පත්කිරීමට වසර දෙකක් තිස්සේ අපොහොසත්ව සිටින අධ්‍යාපන අමාත්‍යාංශයට මේ ආකාර විශාල සිසු පිරිසකගේ පරිපාලන කටයුතු සිදුකිරීමේ යාන්ත‍්‍රණයක් පවතීද යන්න ද ගැටලූ සහගත බවත් ජෝසප් ස්ටාලින් පෙන්වා දෙයි.

එසේම පළාත් රාජ්‍ය සේවය යටතේ කටයුතු කරන මෙම පාසල්වල ගුරුවරු, විදුහල්පතිවරු සහ අනධ්‍යයන කාර්ය මණ්ඩලවල පරිපාලන කටයුතු සිදුකිරීම සම්බන්ධයෙන් ද කිසිදු වැඩපිළිවෙලක් මේ දක්වා සකස් කර නැත.

කුඩා පාසල් වැසීයාමේ තත්වයක්

ලංකා ගුරු සංගමය පෙන්වා දෙන පරිදි කනගාටුදායකම තත්වය වන්නේ මෙසේ පාසල්  1000 ක් පමණක් සංවර්ධන කිරීමෙන් සෙසු කුඩා පාසල් වැසීයාමේ තත්වයක් නිර්මාණය වීමයි.

එසේම 10174 ක් වන සමස්ත පාසල් වලින් පාසල් 1000 ක් පමණක් සංවර්ධනය කිරීම තුළ සෙසු පාසල් නොසකා හරින තත්වයක් උද්ගත වන්නේ ද යන්න බරපතල ගැටලූවක් නිර්මාන බවත් ගුරු සංගම් නායක ජෝසප් ස්ටාලින් අවධාරණය කරයි.

අධ්‍යාපනය සඳහා දළ දේශීය නිෂ්පාදිතයෙන් අවම වශයෙන් 6% ක් වෙන් කිරීමට බලකෙරෙමින් තිබියදී ආණ්ඩුව කඩිමුඩියේ මේ සැරසෙන්නේ 10174 ක් වන සමස්ත පාසල් පද්ධතියෙන් අඩක් පමණ වන පාසල්වලට ස්වභාවික මරණයක් අත්කර දීමටදැයි ලංකා ගුරු සංගමය සැක පළ කර තිබේ.

“එසේ වුවහොත් එය අධ්‍යාපන වැය සැලකිය යුතු ප‍්‍රමාණයකින් අඩුකර ගැනීමේ ආණ්ඩුවේ උපායමාර්ගයක් වනු ඇත. මෙම තත්වය තුළ නිදහස් අධ්‍යාපන අවස්ථා ක‍්‍රමයෙන් සීමා වී පාසල් අධ්‍යාපනය මුදල් වැයකර ලැබීමට සිදුවීම, සම අධ්‍යාපන අවස්ථා නොලැබීම හා අධ්‍යාපනය ලැබීමේ මූලික අයිතිය පවා අහිමි වීමේ බියජනක අඳුරු සෙවනැලි මෙම ජාතික පාසල් 1000 ව්‍යාපෘතිය තුළ සගවා ඇති බව ලංකා ගුරු සංගමය ප‍්‍රකාශ කර සිටී.”

මෙම තත්වය තුළ නිදහස් අධ්‍යාපන අවස්ථා ක‍්‍රමයෙන් සීමා වී පාසල් අධ්‍යාපනය මුදල් වැයකර ලැබීමට සිදුවීම, සම අධ්‍යාපන අවස්ථා නොලැබීම හා අධ්‍යාපනය ලැබීමේ මූලික අයිතිය පවා අහිමි වීමේ බියජනක අඳුරු සෙවනැලි මෙම ජාතික පාසල් 1000 ව්‍යාපෘතිය තුළ සඟවා ඇති බව ලංකා ගුරු සංගමය නිකුත් කළ නිවේදනයක් මගින් අනතුරු අඟවා තිබේ.

Social Sharing
නවතම