තෙල් අපනයනයෙන් ධනවත් රාජ්‍යයක් බවට පත් වූ බෘෘනායි රාජ්‍යයේ සුල්තාන් හස්සානල් බොල්කියාගේ සිව්වැනි පුත්‍රයා වන අබ්දුල් මටීන්ගේ රාජකීය විවාහය දින 10ක් පුරා උත්සවශ්‍රීයෙන් සැමරෙන බව විදෙස් මාධ්‍ය වාර්තා කළේය. බ්‍රිතාන්‍යයේ අධ්‍යාපනය ලැබූ 32 හැවිරිදි මටීන් කුමරු බෘෘනායි හි හමුදා නිලධාරියකු වන අතර, ඔහු විවාහ වූයේ සිය දිගුකාලීන පෙම්වතිය වූ 29 හැවිරිදි යැං මුලියා අනීෂා නමැති සාමාන්‍ය තරුණියක් සමඟය. ඇය බෘෘනායි රජුගේ උපදේශකවරයකුගේ මිනිපිරියක් බවද වාර්තා වේ.
ලොව විශාලතම රජ මාළිගාව ලෙස සැලකෙන ඉස්තානා නූරුල් ඉමාන් මාළිගාවේදී පැවැති රාජකීය විවාහයට මැදපෙරදිග ඇතුළු රටවල් රැසක රාජ්‍ය නායකයන් ඇතුළු රජවරුන් සහභාගි වී ඇති අතර, විවාහ උත්සවය ලබන 17 වැනිදා දක්වා පැවැත්වෙන බව ද වාර්තා වේ.