මානව සම්පත් වෙනුවෙන් ආයෝජනය කිරීම, මානව ප්‍රාග්ධනය ශක්තිමත් කිරීම සහ රැකියා උත්පාදනය සඳහා ලෝක බැංකුවේ අඛණ්ඩ සහයෝගය ද ඇය අවධාරනය කළ බව ලෝක බැංකුව නිවේදනයක් නිකුත් කරමින් කියා සිටියේය.
Bjerde ශ්‍රී ලංකාවේ ජනාධිපති සහ මුදල් අමාත්‍ය රනිල් වික්‍රමසිංහ, කැබිනට් අමාත්‍යවරුන්, විරුද්ධ පක්ෂ නියෝජිතයින්, සිවිල් සමාජය, පෞද්ගලික අංශය, සංවර්ධන හවුල්කරුවන් සහ ලෝක බැංකු ව්‍යාපෘති ප්‍රතිලාභීන් හමුවිය.
බහුපාර්ශ්වික සංවර්ධන බැංකු (MDBs) සහ ද්විපාර්ශ්වික සංවර්ධන හවුල්කරුවන් ඇතුළත් MDB+ වේදිකාවේ සාමාජිකයන් ඇතුළු ප්‍රධාන පෙළේ අමාත්‍යවරුන්, පෞද්ගලික අංශයේ නියෝජිතයන් සහ සංවර්ධන හවුල්කරුවන් සහ ජනාධිපතිවරයා විසින් පවත්වන ලද වටමේස සාකච්ඡාවකට ද ඇය සහභාගි වූවාය. මෙම වේදිකාව සාමාජික ආයතනවලට ශ්‍රී ලංකාව සමඟ ඔවුන්ගේ සම්බන්ධීකරණය සඳහා පහසුකම් සපයයි. ව්‍යුහාත්මක ප්‍රතිසංස්කරණ, සංවර්ධනය සඳහා පෞද්ගලික ප්‍රාග්ධනය බලමුලු ගැන්වීම, රැකියා උත්පාදනය, මානව ප්‍රාග්ධන සංවර්ධනය සහ කලාපීය සහයෝගීතාව සම්බන්ධයෙන් ශ්‍රී ලංකාවේ ප්‍රගතිය පිළිබඳව මෙම සාකච්ඡාවේදී අවධානය යොමු විය.
විනාශකාරී බලපෑම් සහිත පෙර නොවූ විරූ කම්පන මාලාවකින් ශ්‍රී ලංකාව යථා තත්ත්වයට වෙමින් තිබියදී, ආයෝජන ආකර්ෂණය ඇති කරගත හැකි, රැකියා උත්පාදනය කළ හැකි, දුප්පත්ම සහ වඩාත්ම අවදානමට ලක්විය හැකි අය ආරක්ෂා කළ හැකි ආර්ථික වර්ධනයක් ඇති කරන අතරම ආර්ථිකය ස්ථාවර කිරීම සඳහා යහපත්, කාලෝචිත ප්‍රතිසංස්කරණ අඛණ්ඩව සිදුකිරීම සහ අනාගත අර්බුදවලට ඔරොත්තු දීමේ හැකියාව ගොඩනැගීම ද ඒ හා සමානව පාලනය, පුරවැසි සහභාගීත්වය සහ සමාජ සහජීවනය ශක්තිමත් කිරීමේ අවශ්‍යතාව ද Bjerde අවධාරණය කළාය.
“මගේ සංචාරයේදී ශ්‍රී ලාංකිකයන් මුහුණ දෙන අභියෝග ගැන මට දැනගන්නට ලැබුණා. දක්ෂ වෘත්තිකයන් රට හැර යමින් සිටිනවා., ගොවීන් වෙනස් වන දේශගුණයට මුහුණ දීමට අරගල කරමින් සිටිනවා., ආයෝජන හිඟකම සහ ණය සඳහා ප්‍රවේශය හේතුවෙන් ව්‍යවසායකයින් සීමා වී තිබෙනවා. නමුත් දේශගුණික වශයෙන් සංවේදී කෘෂිකර්මය, පුනර්ජනනීය බලශක්තිය භාවිතා කිරීම, ව්‍යවසායකත්වය ඉහළ නැංවීම, තරඟකාරිත්වය සහ කලාපීය සම්බන්ධතා ප්‍රවර්ධනය කිරීම සඳහා විශාල අවස්ථාවන් ද මම දැක්කා. ශ්‍රී ලංකාවට ප්‍රකෘතිමත් වීමේ ගමනට, ගොවීන් වෙළඳපොළට සම්බන්ධ කිරීමට, සෞඛ්‍ය සේවා සඳහා ප්‍රවේශය ශක්තිමත් කිරීමට, නවෝත්පාදනයන් ඉහළ නැංවීමට, යටිතල පහසුකම් වෙනුවෙන් ආයෝජන හරහා පරිවර්තනයක් හඹා යාමට සහ කාන්තාවන්ට සහ තරුණයින්ට ගුණාත්මක රැකියා උත්පාදනය කිරීමට ලෝක බැංකුව අඛණ්ඩව සහාය වනු ඇත,” යි Bjerde අවධාරණය කළාය.
2022 මැයි මාසයේ ඇති වූ ආර්ථික අර්බුදයේ ආරම්භයේ දී, වෙන් කරන ලද අරමුදල් නැවත ලබා දීමෙන් ශ්‍රී ලංකාවේ ජනතාව (විශේෂයෙන් දිළිඳු සහ අවදානමට ලක්විය හැකි අය) නරකම බලපෑම්වලින් ආරක්ෂා කිරීමට ලෝක බැංකුව වේගයෙන් පියවර ගත්තේය. මීට අමතරව, ලෝක බැංකුව අර්බුදයට මුල්ම ප්‍රතිචාර දැක්වූ ආයතනවලින් එකක් වූ අතර මූලික සේවා සහ භාණ්ඩ සැපයුම තිරසාරව පවත්වා ගැනීමට උපකාර කිරීම සඳහා හදිසි ආධාර පෙළගැස්වීම සඳහා ආසියානු සංවර්ධන බැංකුව සහ ආසියානු යටිතල පහසුකම් ආයෝජන බැංකුව සමඟ සම්බන්ධීකරණ වේදිකාවක් ආරම්භ කළේය.