‘ත්‍රස්තවාදය වැළැක්වීමේ පනත සංශෝධනය කරන ගැසට් පත්‍රය, සහ ‘යුක්තියට ප්‍රවේශයක්’ අධිකරණ අමාත්‍යාංශය උතුරේ පැවැත්වූ ජංගම සේවය වැනි දේවල්, ජිනීවා මානව හිමිකම් සැසිය හමුවේ ජාත්‍යන්තර ප්‍රජාව රවට්ටන්න මේ ආණ්ඩුව රඟ දක්වන නාටක’ යැයි දෙමළ ජාතික සන්ධානයේ මාධ්‍ය ප්‍රකාශක, පාර්ලිමේන්තු මන්ත්‍රී එම්.ඒ. සුමන්තිරන් ‘වීරකේසරී’ පුවත්පතට සම්මුඛ සාකච්ජාවක් ලබා දෙමින් පවසයි.
ත්‍රස්තවාදය වැළක්වීමේ පනත සංශෝධනය කිරීම එක්සත් ජාතීන්ගේ මානව හිමිකම් සමුළුවේ එක් නිර්දේශයක් බව පෙන්වා දෙන සුමන්තිරන් පවසන්නේ එය ඔවුන්ගේ වාර්තාවට ද ඇතුලත්ව ඇති බවය. ‘ PTA සංශෝධන අලුත් ගැසට් එක “සංශෝධනය” කියන එකට අලුත් අර්ථයක් දෙනවා. කිසි වෙනසක් නැහැ. අවුරුදු 18 කට වැඩි කාලයක් සිරගෙවල් වල ඉන්න දෙමළ දේශපාලන සිරකරුවන් ගැන අපි අවධානය යොමු කරද්දී, රඳවන කාලය අවුරුදු එක හමාරේ සිට අවුරුද්දට අඩු කිරීම විතරක් සාධාරණ නැහැ. රිමාන්ඩ් ඉන්න සැකකරුවෙකුට නීතිඥවරයෙක් හමුවීම දැනටමත් පනතේ තියෙනවා. මේවා තමයි සංශෝධන. මේවා විහිළු’ යැයි දෙමළ ජාතික සන්ධානයේ මාධ්‍ය ප්‍රකාශක පෙන්වා දෙයි.
‘දෙමළ ජාතික සන්ධානය හා ජනාධිපතිවරයා අතර තවමත් දින නියම කර නොමැති සාකච්ජා හමුව ඒ නාටකයේම කොටසක්. තවමත් මේ හමුව නිශ්චිත නැහැ. ජිනීවා මානව හිමිකම් සැසියට කලින් හමුව ලැහැස්ති කරනවා කියල තමයි විදේශ ඇමැති කිව්වේ’ යැයි දෙමළ ජාතික සන්ධානයේ මාධ්‍ය ප්‍රකාශකයා සඳහන් කරයි.
ත්‍රස්තවාදය වැළක්වීමේ පනතට ඉදිරිපත් කර ඇති ආණ්ඩුවේ අදාළ සංශෝධන ගැන එක්සත් ජාතීන්ගේ මානව හිමිකම් කොමසාරිස්වරියද දෙමළ ජාතික සන්ධානය මගින් දැනුවත් කර තිබෙන බව දැනගන්නට ලැබෙන අතර ජනාධිපතිවරයා දෙමළ ජාතික සන්ධානය සමග සාකච්ජා කරන බවට ප්‍රකාශ කිරීම මගින් ජිනීවා සැසියේදී කිසියම් තුලනයක් ඇති කර ගැනීමට ආණ්ඩුව දරණ වෑයමක් ද විය හැකි බවට සැක පහල කරන සුමන්තිරන් කියා සිටියේ සන්ධානයේ ප්‍රතිපත්ති වල සිට මිස, දෙමළ ජනයාගේ සාධාරණ ඉල්ලීම් වලට එරෙහිව ජනවරම ප්‍රතික්ෂේප කර ජනාධිපතිවරයා සමඟ කිසිදු එකඟතාවකට නොයන බවයි.
එක්සත් ජාතීන්ගේ මානව හිමිකම් මණ්ඩලයේ 49 වැනි සැසිවාරය පෙබරවාරි 28 සිට අප්‍රේල් පළමුවැනිදා දක්වා ජිනීවා නුවර මුලුදීමට නියමිතය.