අධ්‍යාපන ලේකම්ගේ ස්ථාන මාරු නියෝගයට අනුව කොළඹ ශාන්ත පාවුළු බාලිකා විදුහලේ සිට කොළඹ විශාකා විදුහලට ස්ථාන මාරුවක් ලබා පැමිණි එච්.ජී. වසන්ත මහතාට විශාඛා විදුහලේ විදුහල්පතිනිය අශෝබන අයුරින් බැන වැදි, තර්ජනය කර පාසලේ ආරක්ෂකයින් ලවා එළියට ඇද දැමීමට උත්සහ කිරීමේ සිද්ධිය දැඩි පිලිකුලෙන් යුතුව හෙළා දකින බව ලංකා ගුරු සංගමය පවසයි.
2020.09.02 දිනැති ස්ථාන මාරු ලිපියට අනුව එච්.ජී, වසන්ත මහතා 2021.01.04 වන දින වැඩභාර ගැනීමට විශාකා විදුහලට ගිය අවස්ථාවේදී විශාකා විදුහලේ විදුහල්පතිනය වන සඳමාලි අවිරුප්පල මහත්මිය විසින් ශාන්ත පාවුළු විද්‍යාලයේ විදුහල්පතිනියගේ නම සඳහන් කරමින් ඇගේ ගෝලයන්ට මෙම පාසලේ වැඩභාර නොදෙන බව පවසා ඔහු විසින් ගෙනෙන ලද සේවයෙන් නිදහස් කිරීමේ ලිපිය ඇගට විසිකර දමා, පාසලේ ආරක්ෂකයින් 4 දෙනෙකු තම කාර්යාලයට ගෙන්වාගෙන තර්ජනය කොට විදුහල්පති කාමරයෙන් එළියට ඇද දැමීමට උත්සාහ කර ඇති බවට එච්.ජී. වසන්ත මහතා අධ්‍යාපන ලේකම්වරයාට 2021.10.05 දිනැතිව ලිඛිත පැමිණිල්ලක් කර ඇති අතර, 2021.01.05 දිනම රාජකාරියට වාර්තා කිරීමට ඉඩ නොදීම මත බම්බලපිටිය පොලීසියට CIB I 180/22 අංකයෙන් පැමිණිල්ලක් ද ඉදිරිපත් කොට ඇත.
විශාකා විදුහලේ විදුහල්පතිනිය ගුරු මාරු අධ්‍යක්ෂවරියගේ ද නම සඳහන් කරමින් ඇයට ද දැඩි ලෙස බැනවැදී ඇති අතර ඇයගේ අත්තනෝමතික ක්‍රියාවන් සම්බන්ධයෙන් විවිධ පැමිණි ඉදිරිපත්ව තිබියදී අධ්‍යාපන අමාත්‍යාංශය කිසිදු පියවරක් අනුගමනය කිරීම බරපතල පක්ෂපාතී තත්වයක් බවද ලංකා ගුරු සංගමය පෙන්වා දෙයි.
විශාකා විද්‍යාලයේ 2019 වසරේ පළමු ශ්‍රේණියට ළමුන් ඇතුළත් කිරීම සම්බන්ධයෙන් සිදු වූ අක‍්‍රමිකතා පිළිබඳ චෝදනා 15 ක් අඩංගු චෝදනා පත‍්‍රයක් රාජ්‍ය සේවා කොමිසම විසින් 2019.09.25 දිනැතිව ඇයට ලබා දී ඇති අතර, ඒ සම්බන්ධයෙන් වන විනය පරීක්ෂණය මේ දක්වා අවසන් කොට නැති අතර ළමුන් ඇතුළත් කිරීම සම්බන්ධයෙන් ඇයට චෝදනා ඉදිරිපත් වී තිබියදී 2021 ට අදාළ ළමුන් ඇතුළත් කිරීමේ ක්‍රියාවලියට ඇය ඇතුළත් නොකළ යුතු බවට ලංකා ගුරු සංගමය අධ්‍යාපන ලේකම්වරයාට සහ රාජ්‍ය සේවා කොමිසමේ ලේකම්වරයාට පැමිණිලි කර තිබුණි. ඒ සම්බන්ධයෙන් රාජ්‍ය සේවා කොමිසම 2020.07.07 දිනැතිව ESC/GEN/01/09/2019 අංකයෙන් යුතු ලිපියක් අධ්‍යාපන ලේකම් වෙත යොමු කරමින් ඒ සම්බන්ධයෙන් වන නිරීක්ෂණ අධ්‍යාපන ලේකරම්වරයාගෙන් ඉල්ලා තිබුණු නමුත් ඒ සම්බන්ධයෙන් ද කිසිදු ක්‍රියාමාර්ගයක් මේ දක්වා ගෙන නැතැයිද ලංකා ගුරු සංගමය පවසයි.
අධ්‍යාපන අමාත්‍යාංශය යටතේ සේවය කරන මෙම විදුහල්පතිනියට චෝදනා පත‍්‍රයක් තිබියදී හා මෙලෙස අත්තනෝමතිකව කටයුතු කරද්දී ඇය ජනාධිපතිවරයා විසින් 2169/2 දරණ අති විශේෂ ගැසට් පත‍්‍රයෙන් පත් කරන ලද ශ්‍රී ලංකාවේ අධ්‍යාපන කටයුතු පිළිබඳ ජනාධිපති කාර්ය සාධක බලකායේ සාමාජිකාවක් ලෙස ද පත් කර තිබීම ගැටලූකාරී තත්වයක් බවද ලංකා ගුරු සංගමය අවධාරණය කර සිටියි.