ඉදිරියේදී ඇති විය හැකි එල්-නිනෝ තත්ත්වය හමුවේ කෘෂිකාර්මික කටයුතු, ආහාර සුරක්ෂිතතාව, විදුලි හා ජල සැපයුම අඛණ්ඩව පවත්වාගෙන යාම සඳහා සැලසුම් සකස් කරන්නැයි ජනාධිපති අනුර කුමාර දිසානායක මහතා අදාළ බලධාරීන්ට උපදෙස් දුන්නේය.
ඉදිරියේදී මතු විය හැකි එල්-නිනෝ තත්ත්වය මෙරට ආහාර සුරක්ෂිතතාව, පානීය ජලය සහ බලශක්තිය යන ක්ෂේත්ර කෙරෙහි ඇති කරන බලපෑම සහ එකී ක්ෂේත්ර කළමනාකරණය කරගැනීම සඳහා ගත යුතු කඩිනම් ක්රියාමාර්ග සම්බන්ධයෙන් විශේෂ සාකච්ඡාවක් ජනාධිපති කාර්යාලයේදී ඊයේ (11) පැවති අවස්ථාවේදී ජනාධිපතිවරයා මෙසේ උපදෙස් දුන්නේය.
කාලගුණ විද්යා දෙපාර්තමේන්තුව, වාරිමාර්ග දෙපාර්තමේන්තුව, මධ්යම පරිසර අධිකාරිය, මහවැලි අධිකාරිය, ආපදා කළමනාකරණ මධ්යස්ථානය, විදුලිජනන ලංකා පෞද්ගලික සමාගම සහ ජාතික පද්ධති ක්රියාකරු පෞද්ගලික සමාගම ආදී අදාළ ආයතනවල නියෝජිතයෝ මේ අවස්ථාවට එක් වූහ.
එල්-නිනෝ තත්ත්වයට මුහුණදීමේ සඳහා එම ක්ෂේත්රවලට අයත් ආයතනය සැලසුම් පිළිබඳව මෙහිදී විශේෂයෙන් සාකච්ඡා කෙරිණි. ජලාශවල ජල ධාරිතා, කෘෂි කර්මාන්තය, පානීය ජලය සහ බලශක්ති ක්ෂේත්රයේ ඇති විය හැකි තෙරපුම කළමනාකරණය කරගැනීමට ගත යුතු පියවර ආදී කරුණු පිළිබඳව මෙහිදී සාකච්ඡාවට ලක් විය.
මෙවර ඇති වන එල්-නිනෝ තත්ත්වය වඩාත් සමීප විය හැක්කේ 2016 – 2017 වර්ෂවල ඇති වූ තත්ත්වයට බව මෙහිදී පෙන්වා දුන් නිලධාරීහු විශේෂයෙන්ම ජල කළමනාකරණ සැලසුම ඒ අනුව සකසා ඇති බව පෙන්වා දුන්හ. මේ යටතේ 2026 වසරේ යල කන්නය මාස එකහමාරකට පමණ පෙර ආරම්භ කිරීමට පියවර ගෙන ඇති බවද ඔවුන් විසින් පෙන්වා දෙන ලදි.
ඇති විය හැකි තත්ත්වය හමුවේ ඉදිරි මාස කිහිපය තුළ අඛණ්ඩ විදුලි සැපයුමක් සහතික කිරීම සහ කෘෂිකර්ම කටයුතු සහ ආහාර සුරක්ෂිතතාව පවත්වාගෙන යාම පිළිබඳ මෙහිදී විශේෂ අවධානය යොමු කෙරුණු අතර විදුලි නිෂ්පාදනය මෙන්ම ඉදිරි යල කන්නය ඇතුළු කෘෂිකර්ම කටයුතු සඳහා අවශ්ය ජලය සැපයීම සහ පානීය ජල සුරක්ෂිතතාව ඇති කිරීම සඳහා අවශ්ය සැලසුම් සකස් කර ඉදිරිපත් කරන ලෙස ජනාධිපතිවරයා අදාළ නිලධාරීන්ට උපදෙස් දුන්නේය.
දිට්වා සුළි කුණාටුව හා මැදපෙරදිග යුදමය තත්ත්වය හමුවේ ඇති වූ අභියෝගවලට මුහුණ දුන් ආකාරයටම බාහිර අභියෝගයක් වන මෙම ගෝලීය තත්ත්වයද කළමනාකරණය කරගැනීමේ හැකියාව මෙහිදී පෙන්වා දුන් ජනාධිපතිවරයා, නිසි සැලසුම් ඔස්සේ කටයුතු කිරීමෙන්, ඇති විය හැකි ඕනෑම තත්ත්වයකට මුහුණ දීමට හැකි වනු ඇති බවටද විශ්වාසය පළ කළේය.
ජනාධිපති ලේකම් ආචාර්ය නන්දික සනත් කුමානායක, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, කාලගුණ විද්යා දෙපාර්තමේන්තුවේ අධ්යක්ෂ ජනරාල් ඒ.එල්.කේ. විජේමාන්නගේ, වාරිමාර්ග දෙපාර්තමේන්තුවේ අධ්යක්ෂ ජනරාල් කිත්සිරි වැලිගෙපොල, ශ්රී ලංකා මහවැලි අධිකාරියේ අධ්යක්ෂ ජනරාල් එච්.එම්.කේ.කේ. හේරත්, මධ්යම පරිසර අධිකාරියේ සභාපති මහාචාර්ය තිලක් හේවාවසම්, ආපදා කළමනාකරණ මධ්යස්ථානයේ වැඩබලන අධ්යක්ෂ ජනරාල් බ්රිගේඩියර් ඩී.ඩී.ජී.ඒ. ජයවර්ධන මහත්වරු සහ අදාළ ආයතනවල ජ්යෙෂ්ඨ නිලධාරීහු පිරිසක් මෙම සාකච්ඡාවට එක්ව සිටියහ.
උපුටා ගැනීම දිනමිණ