දැනට ක්රියාත්මක වන අපරාධ විමර්ශන සම්බන්ධයෙන් පොලිස් නිලධාරීන්ට තර්ජනාත්මක ඇමතුම් ලැබෙන අතර එවැනි ඇමතුම්වල සත්යතාව තහවුරු කිරීමෙන් පසු පොලිසිය නීතිමය පියවර ගන්නා බව පොලිස් මාධ්ය ප්රකාශක, සහකාර පොලිස් අධිකාරී එෆ්.යූ. වූට්ලර් සඳහන් කරයි.
“සමහර පොලිස් නිලධාරීන්ට සැක සහිත ඇමතුම් ලැබුණු විට, විධිමත් සටහනක් ගන්නවා. පසුව අමතන්නාගේ අනන්යතාව සහ සත්යතාව තහවුරු කිරීම සඳහා සවිස්තරාත්මක පරීක්ෂණයක් සිදු කරනවා. තහවුරු වූ පසු, කාරණය අදාළ අධිකරණවලට වාර්තා කර, තර්ජන සිදුකිරීමට වගකිව යුතු අයට එරෙහිව නීතිමය පියවර ගන්නවා.” යනුවෙන් ඔහු පැවසීය.
සංවිධානාත්මක අපරාධ සැකකරුවකු වන මන්දිනු පද්මසිරි නොහොත් ‘කෙහෙල්බද්දර පද්මේ’ විසින් බස්නාහිර පළාත් උතුරු අපරාධ කොට්ඨාසයේ ප්රධානී ප්රධාන පොලිස් පරීක්ෂක ලින්ටන් සිල්වාට කරන ලදැයි කියන මරණ තර්ජනයක් සම්බන්ධයෙන් ඔහු මෙම ප්රකාශය සිදු කළේය.
අගෝස්තු 3 වැනිදා රාත්රී 8.45ට පමණ ලැබුණු බව කියන මෙම ඇමතුම, එදින පෙරවරුවේ පද්මසිරිගේ සමීපතමයකු අත්අඩංගුවට ගැනීම හා සම්බන්ධ යැයි සැක පළ කරන අතර ඇමතුම අතරතුර, තර්ජනාත්මක වචන භාවිත කරමින් අනතුරු ඇඟවූ බව කියනු ලැබේ. “ඔයත් සෙල්ලමක් කරනවා… අපිත් සෙල්ලමක් කරනවා. මේක කරන්න නිවැරදි ක්රමය මට කියන්න. ඔයාට දරුවෙක් ඉන්නවා නේද? ඔයා දන්නවා මොකද කරන්න ඕන කියලා. අපි කොහොමත් මරණ සහතිකය අතේ තියාගෙන ඉන්නේ, ඒ නිසා අපි මැරෙන්න බය නැහැ.” යනුවෙන් ඔහු ප්රකාශ කර ඇත.
සංවිධානාත්මක අපරාධ සම්බන්ධයෙන් නඩු කටයුතු මෙහෙයවන පොලිස් නිලධාරීන්ට එම අපරාධ ජාලවලට සම්බන්ධ පුද්ගලයන්ගෙන් මරණ තර්ජන ඇතුළු විවිධ තර්ජන ලැබෙන අතර මෙම තර්ජන විමර්ශකයන් බිය ගැන්වීමට සහ මත්ද්රව්ය ජාවාරම, කප්පම් ගැනීම් සහ කොන්ත්රාත් ඝාතන වැනි අපරාධ මර්දනය කිරීමට බාධා කිරීම සඳහා දරන උත්සාහයන් ලෙස සැළකේ.