කිසිවිටෙක විදේශ සේවා නියුක්ති කාර්යාංශය වහන්නේ නැහැ!

විදේශ සේවා නියුක්ති කාර්යාංශය යනු මෙරට විශේෂ සේවාවක් සපයන ආයතනයකි. මේ ආයතනය පිලිබඳ පහුගියදා මාධ්‍ය වල පළ වුයේ වැටුප් ගෙවීමට මුදල් නොමැති වීම නිසා වසා දැමීමට කටයුතු කරන බවය. විදේශ සේවා නියුක්ති කාර්යාංශයෙන් බොහෝ විට පිලිසරණ ලබා ගත්තේ විදෙස්ගත ශ්‍රමිකයින්ය. මේ පුවතත් සමඟ ඔවුන් දැඩි කනස්සල්ලට පත් විය. ඒ ඔවුන් වෙනුවෙන් පෙනී සිටීමට සිටි එකම රාජ්‍ය ආයතනයත් අහිමිව යන බැවිනි.

නමුත් විදේශ සේවා නියුක්ති කාර්යාංශය කිසිදු විටක වසා දැමීමට කටයුතු නොකරන බව විදේශ රැකියා ප්‍රවර්ධන හා වෙළඳපල විවිධාංගීකරණ රාජ්‍ය අමාත්‍ය පියංකර ජයරත්න මහතා පවසයි.

විවිධ සමාජ ජාලා මඟින් මේ දිනවල කාර්යාංශය වසා දැමීමට ආසන්න බවට සාවද්‍ය කරුණු ඇතුළත් පුවත් පළ කළ ද එවායේ කිසිදු සත්‍යතාවයක් නොමැති බවත් ජනාධිපතිතුමා හෝ අගමැතිතුමා කාර්යාංශය වසා දැමීමේ ස්ථාවරයක නොසිටින බවද ඔහු පවසයි.

ඔහු මෙම අදහස් ප්‍රකාශ කළේ බස්නාහිර පළාත් විදේශ රැකියා නියෝජිත ආයතන හිමියන් සමඟ ඊයේ පැවති සාකච්ඡාවකට විදේශ සේවා නියුක්ති කාර්යාංශයේදී එක්වෙමිනි. විදේශ රැකියා ක්ෂේත්‍රය කොවිඩ් වසංගතය හේතුවෙන් පසුබෑමකට පත්වීම හේතුවෙන් අපහසුතාවයට පත් විදේශ රැකියා නියෝජිත ආයතන වල ගැටළු පිලිබඳව සාකච්ඡා කිරීමට මෙය සංවිධානය කර තිබුණි. මෙහිදී විදේශ රැකියා නියෝජිතායතන හිමියන් විසින් යෝජනා 34 ක් රාජ්‍ය අමාත්‍යවරයා වෙත ඉදිරිපත් කළ අතර මූල්‍ය අපහසුතාවයට පත් රැකියා නියෝජිතායතන පවත්වාගෙන යාම සදහා 4% ක පොළී යටතේ රජයෙන් ණය මුදල් ලබා ගැනීමට වූ යෝජනාවක් ද ඊට ඇතුළත් වේ.

මෙහිදී අදහස් දැක්වූ අමාත්‍යවරයා වැඩිදුරටත් සඳහන් කළේ පවුල් පසුබිම් වාර්තාව ලබා දීම සදහා එකිනෙකට වෙනස් නිර්නායක භාවිතා කරන බැවින් ඉදිරියේදී සෑම ප්‍රාදේශීය ලේකම් කොට්ඨාශයකටම බලපාන එකම නිර්නායක ඛාණ්ඩයන් ප්‍රකාශයට පත් කරන බවයි. එමඟින් විදේශ රැකියාලාභීන්ට මෙන් රැකියා නියෝජිතායතන වලටද පහසුවක් වන බව සඳහන් කළේය.

විදේශ රැකියා සඳහා පිරිස් යොමු කිරීමේදී විවිධ ජාවාරම් සිදු වන අතර, සංචාරක වීසා මඟින් රැකියා සඳහා ශ්‍රමිකයන් යොමු කිරීමේ ජාවාරමද ඉතාම ඉක්මණින් නතර කරන බවත්, ඊට සම්බන්ධ වූවන්ට එරෙහිව නීතිය ක්‍රියාත්මක කරන බවද සඳහන් කළේය.

-ශානිකා-

Social Sharing
නවතම