ඉඩම් අල්ලා ගැනීමට එරෙහිව කෝකිලායි වැසියෝ විරෝධතාවේ!

දෙමළ ජනතාවගේ පාරම්පරික වාසභූමි හා ගොවිබිම් ආරක්ෂක හමුදා ඇතුළු රජයේ ආයතන  කිහිපයක් විසින් අත්පත් කරගනිමින් සිටීමට එරෙහිව කෝකිලායි ගම්වැසියන් විසින් 14 සිකුරාදා මුලතිව් අධිකරණය ඉදිරිපිටින් ආරම්භ කළ විරෝධතා පා ගමන මුලතිව් දිස්ත්‍රික් ලේකම් කාර්යාලය දක්වා ගමන් කර තිබේ.

තම පාරම්පරික භුමිය ආපසු ලබා ගැනීම සඳහා මැදිහත්වන ලෙස ඉල්ලා සිටින සංදේශයක් අතිරේක  දිස්ත්‍රික් ලේකම් කේ. කනේෂ්වරන් වෙත බාර දෙමින් ගම්වැසියන් පෙන්වා දී ඇත්තේ සිය පාරම්පරික භූමිය පිටස්තරයන් විසින් අත්පත් කරගැනීම නිසා සිය ජීවනෝපායද අහිමිව ගොස් ඇති බවයි.

ඉඩම් අල්ලා ගැනීමට එරෙහිව කෝකිලායි වැසියෝ විරෝධතාවේ!

යුද්ධය හේතුවෙන් අවතැන් වීමෙන් පසු නැවත තම මුල් ගම් බිම් වල පදිංචියට පැමිණියත් සිය කුඹුරු  සහ කෘෂිකාර්මික ඉඩම් පිටස්තරයන් විසින් අත්පත්කරගෙන ඇති බව පෙන්වා දෙන කෝකිලායි ගම් වැසියන් රජයෙන් ඉල්ලා සිටින්නේ වහාම සිය ඉඩම් ආපසු ලබා දෙන ලෙසයි.

ඉල්මානයිට් කැණීමේ කටයුතු සදහා කෝකිලායි ගම් වැසියන්ට අයත් ඉඩම් අක්කර 50 ක පමණ ප්‍රමාණයක් ඛනිජ සම්පත් දෙපාර්තමේන්තුව විසින් සීමා මායිම් කරමින් සිටින බවට චෝදනා නගන ගම්වැසියන් පෙන්වා දෙන්නේ නාවික හමුදාව විසින් ද ගම් වැසියන්ට අයත් අක්කර පහක පමණ භූමියක නාවික හමුදා කදවුරුක් ගොඩ නගා ඇති බවයි.

නාවික හමුදා කඳවුර ඉදි කර තිබෙන ගම් වැසියන්ට අයත්  භූමිය ආපසු ලබා දෙන ලෙස අවස්ථා කිහිපයකදීම ඉල්ලීම් කළත් මේ දක්වා එය සිදු නොවු අතර  කඳවුරු භූමියත් ඉල්මනයිට්  කැණීමේ කටයුතු සදහා පවරා ගැනීමේ සුදානමක් පවතින බවට ගම් වැසියන් සැක පළ කරන බව උතුරේ වාර්තාකරුවෝ වැඩි දුරටත් පවසති.

කෘෂිකාර්මික ඉඩම් අහිමි වීමෙන් සිය ජීවනෝපාය අහිමිව සිටින කෝකිලායි  ගම්වැසියන්ගේ පාරම්පරික භූමියේ,  දකුණින් පැමිණි ධීවරයන්ද නිවාස සහ අට්ටාල ඉදිකරගනිමින් අක්කර 50 ක පමණ භූමි භාගයක් බලහත්කාරයෙන් අත්පත් කරගෙන සිටින බව කෝකිලායි වැසියෝ පෙන්වා දෙති.

රජය සහ නාවික හමුදාව එක්ව තමන්ට එරෙහිව කටයුතු කරමින් සිටින බව චෝදනා නගන  කෝකිලායි ගමැවැසියන් පෙන්වා දෙන්නේ  පරම්පරා තුනකට වඩා වැඩි ඉතිහාසයකට උරුමකම් කියන සිය පාරම්පරික භූමිය අහිමි වීමෙන් තමන් මහත් දුෂ්කරතාවයකට පත්ව ඇති බවයි.

තම පාරම්පරික භුමිය ආපසු ලබා ගැනීම සදහා මැදිහත්වන ලෙස කෝකිලායි ගම් වැසියන් වැඩි දුරටත් අතිරේක  දිස්ත්‍රික් ලේකම් කේ. කනේෂ්වරන් වෙතින් ඉල්ලා තිබේ.

Social Sharing
නවතම