රජයේ වෛද්‍ය නිලධාරීන්ගේ සංගමය වෛද්‍යවරුන්ගේ සංගමය පවසන පරිදි ෆයිසර් එන්නත් ව්‍යාපෘතිය හමුදාවට මුළුමනින්ම භාරදී නැතැයි ශ්‍රී ලංකා යුද හමුදාව ප්‍රකාශ කරයි.
හමුදා මාධ්‍ය ප්‍රකාශක බ්‍රිගේඩියර් නිලන්ත ප්‍රේමරත්න මාධ්‍ය වෙත මේ බව ප්‍රකාශ කර තිබුනේ ෆයිසර් එන්නත ලබා දීම හමුදාවට පමණක් පවරා ඇති බවට හමුදාපති ශවේන්ද්‍ර සිල්වා මාධ්‍යයට ප්‍රකාශ කිරීමෙන් අනතුරුවය.
සෞඛ්‍ය වෛද්‍ය නිලධාරීන්ගේ මුලිකත්වයෙන් පැවති හලාවත කොකාවිල මධ්‍යස්ථානයේ දී පිටස්තර අයට ෆයිසර් එන්නත ලබා දී ඇති බවට අනාවරණය වීමෙන් පසුව “ෆයිසර් එන්නත මින් ඉදිරියට යුද හමුදාවේ මුලිකත්වයෙන් ලබා දෙනවා“ යැයි හමුදාපති මාධ්‍යයට ප්‍රකාශ කර තිබුණි.
ෆයිසර් එන්නත ලබා දීම හමුදාවට පැවරීම ගැන විරෝධය දක්වන රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය නවින් ද සොයිසා පවසන්නේ “ හලාවත දී කිසියම් වැරැද්දක් වුයේ නම් එය නිවැරදි කරනවා හැර ෆයිසර් එන්නත විදීම යුද හමුදාවට පමණක් බාර දීම වැරදි“ බවය.
“ ගාල්ලේදී ඇස්ට්‍රොසනිකා එන්නත විදීමේදී හලාවත වැනිම ප්‍රශ්නයක් මතු වුවද, ඇස්ට්‍රොසනිකා විදීමේ සම්පුර්ණ වගකීම හමුදාවට නොදුන්නේ මන්ද“ යැයි වෛද්‍ය ද සොයිසා ප්‍රශ්න කර සිටී.
එන්නත්කරණයට අදාළ වගකීම ඇත්තේ සෞඛ්‍ය අමාත්‍යංශයට බව පෙන්වා දෙන ජනාධිපති ගෝඨාභය රාජපක්‍ෂ හිතවාදී රජයේ වෛද්‍ය නිලධාරින්ගේ සංගමය ෆයිසර් එන්නත විදීම හමුදාවට පැවරීම ගැන විරෝධය හා දැඩි අප්‍රසාදය පළ කරමින් සෞඛ්‍ය ඇමැති කෙහෙළිය රඹුක්වැල්ලට ලිපියක් යොමු කොට තිබුණි.
මේ ගැන අදහස් දක්වන හමුදා මාධ්‍ය ප්‍රකාශක බ්‍රිගේඩියර් නිලන්ත ප්‍රේමරත්න පවසන්නේ “ ෆයිසර් එන්නත විදීම හමුදාවට පමණක් ලබා දී ඇති බවට නිල වශයෙන් දන්වා නැහැ“ යැයි යනුවෙනි.