වත්මන් ජනාධිපති අනුර කුමාර දිසානායකගේ රජය, පාලන සමයේ මුල් මාස 18 තුළ පාර්ලිමේන්තුවේ පනත් සම්මත කිරීමේ කාර්යක්ෂමතාව අතින් හිටපු ජනාධිපති මෛත්රීපාල සිරිසේනගේ රජය අභිබවා ගොස් ඇති බව වෙරිටේ රිසර්ච් ආයතනය නිකුත් කළ නවතම අධ්යයන වාර්තාවක සඳහන් වේ.
දූෂණ විරෝධී සහ යහපාලන ප්රතිසංස්කරණ පොරොන්දු මත බලයට පත් වූ මෙම ජනාධිපතිවරුන් දෙදෙනාගේ පාලන සමයන්හි මුල් මාස 18 තුළ සිදු වූ ව්යවස්ථාදායක ක්රියාකාරිත්වය සංසන්දනය කරමින් මෙම අධ්යයනය සිදුකර තිබේ.
වාර්තාවට අනුව, පාලන සමයේ මුල් මාස 6 අවසන් වන විට මෛත්රීපාල සිරිසේනගේ රජය පැහැදිලි පෙරමුණක් ගෙන සිටියේය. එම කාලය තුළ වත්මන් රජයට වඩා තුන් ගුණයකින් වැඩි පනත් ප්රමාණයක් ගැසට් කර තිබූ අතර, දෙගුණයක පමණ පනත් සංඛ්යාවක් නීති බවට පත් කර තිබුණි.
කෙසේ වෙතත්, මාස 9ක් ගතවන විට වත්මන් රජය නීති සම්මත කිරීමේ වේගය වැඩි කරමින් මෛත්රීපාල සිරිසේනගේ රජය සමඟ සම මට්ටමකට පැමිණ ඇති බව වාර්තාව පෙන්වා දෙයි.
පාලන සමයේ මුල් මාස 18 අවසන් වන විට ජනාධිපති අනුර කුමාර දිසානායකගේ රජය පනත් 32ක් නීති බවට පත් කර තිබූ අතර, මෛත්රීපාල සිරිසේනගේ රජයට එම කාලය තුළ සම්මත කිරීමට හැකි වී තිබුණේ පනත් 20ක් පමණි.
එමෙන්ම, මෛත්රීපාල සිරිසේනගේ රජය මුල් මාස 18 තුළ පනත් 54ක් ගැසට් කර තිබූ අතර, වත්මන් රජය ගැසට් කර තිබුණේ පනත් 50ක් පමණි. එහෙත් ගැසට් කළ පනත් අතරින් වැඩි ප්රතිශතයක් නීති බවට පත් කිරීමට වත්මන් රජය සමත් වී ඇති බව වාර්තාවේ අවධාරණය කර ඇත.
පාර්ලිමේන්තු ක්රියාකාරිත්වය සම්බන්ධයෙන් ද සසඳන විට, මෛත්රීපාල සිරිසේන පාලන සමයේ මුල් මාස 18 තුළ පාර්ලිමේන්තුව දින 126ක් රැස්වී තිබූ අතර, අනුර කුමාර දිසානායක පාලන සමයේ එය දින 136ක් දක්වා ඉහළ ගොස් තිබේ.
මෙම කරුණු සැලකිල්ලට ගනිමින් වෙරිටේ රිසර්ච් ආයතනය නිගමනය කරන්නේ, ව්යවස්ථාදායක යෝජනා නීති බවට පත් කිරීමේ ක්රියාවලියේදී වත්මන් රජය වඩාත් ඉහළ කාර්යක්ෂමතාවක් පෙන්නුම් කර ඇති බවයි.