අඟුණකොළපැලැස්ස බන්ධනාගාරයේ රක්ෂිත බන්ධනාගාරගතව සිටියදී සිදු වූ පුද්ගලයෙකුගේ මරණය පිළිබඳ නිවේදනයක් නිකුත් කරමින් ශ්‍රී ලංකා නීතීඥ සංගමය පවසන්නේ එය හුදෙක් පුද්ගලයකුගේ ඛේදවාචකයක් නොව, ගැඹුරු ආයතනික අසාර්ථකත්වයක් පිළිබඳ ප්‍රකාශනයක් බවයි. “නීති වෘත්තියේ සාමාජිකයන් සහ නීතියේ ආධිපත්‍යයේ ආරක්ෂකයින් ලෙස, යුක්තිය සැමවිටම මනුෂ්‍යත්වය සමඟ ගලපාගත යුතු බවත්, කෙතරම් දුබල පුද්ගලයකු වුවත්, කිසිදු පුරවැසියෙකුගේ ප්‍රාණ හානි කළ නොහැකි බවත් අපි සියලු රාජ්‍ය බලධාරීන්ට මතක් කරන්නෙමු,” යි ද නිවේදනයේ දැක්වේ.
එම නිවේදනයේ වැඩිදුරටත් මෙසේ ද දැක්වේ:
“මියගිය පුද්ගලයා සැකකරුවෙකුගේ ඇපකරුවෙකු ලෙස ඇඹිලිපිටිය මහේස්ත්‍රාත් අධිකරණය හමුවේ පෙනී සිට ඇත. අධිකරණ මැදිරිය තුළ සිදු වූ සිදුවීමක් හේතුවෙන් පොලිසිය විසින් ඔහු රඳවාගෙන උගත් මහේස්ත්‍රාත්වරයා හමුවට ඉදිරිපත් කර ඇති අතර, ඊට පසු දින උගත් මහේස්ත්‍රාත්වරයා අධිකරණයට අපහාස කිරීමේ චෝදනාව මත ඔහු රක්ෂිත බන්ධනාගාරගත කරන ලෙස නියෝග කර ඇති බව වාර්තා වේ.
“මෙම අවස්ථාවේදී අපහාසය සම්බන්ධ විධිවිධාන අධිකතර ලෙස භාවිතා කර තිබීම සම්බන්ධයෙන් අපි දැඩි ලෙස කනස්සල්ලට පත්ව සිටින අතර, අපගේ ස්ථාවරය සවිස්තරාත්මකව අධිකරණ සේවා කොමිෂන් සභාවට නිසි පරිදි දැනුම් දෙන්නට නියමිතය.
“ඊටත් වඩා කනස්සල්ලට කරුණ නම්, රිමාන්ඩ් භාරයට පත් කර පැය 48 කටත් අඩු කාලයකදී චූදිතයා මිය ගොස් ඇති බවට වාර්තා වීමයි. පශ්චාත් මරණ පරීක්ෂණයේදී හෙළි වූ හිසට සිදු වූ තුවාල පිළිබඳ වාර්තා ඇතුළුව මේ දක්වා ලබා ගත හැකි තොරතුරු හේතුවෙන්, පොලිස් සහ බන්ධනාගාර බලධාරීන්ගේ භාරයේ සිටියදී ඔහුට ලැබුණු සැලකීම් පිළිබඳව බරපතල ප්‍රශ්න මතු වේ.
“නිදහස අහිමි වූ සියලුම පුද්ගලයින්ගේ ජීවිතය, ගෞරවය සහ ශාරීරික ඒකාග්‍රතාව ආරක්ෂා කිරීම සඳහා රජය සතුව මූලික හා අත්හළ නොහැකි වගකීමක් ඇති බව ශ්‍රී ලංකා නීතීඥ සංගමය අවධාරණය කරයි. තම භාරයේ සිටින පුද්ගලයින්ගේ අයිතිවාසිකම් ආරක්ෂා කිරීමට සහ කිසිදු පුද්ගලයෙකුට කුරිරු, අමානුෂික හෝ අවමන් සහගත සැලකිලි හෝ දඬුවම්වලට ලක් නොවන බව සහතික කිරීමට අධිකරණය සහ බන්ධනාගාර බලධාරීන් නීතියෙන් බැඳී සිටී.
ශ්‍රී ලංකා නීතීඥ සංගමය පහත දැක්වෙන ඉල්ලීම් ඉදිරිපත් කරයි:
1. අත්අඩංගුවේ සිටියදී සිදු වූ මෙම මරණයට හේතු වූ කරුණු පිළිබඳව කඩිනම්, අපක්ෂපාතී සහ ස්වාධීන පරීක්ෂණයක්;
2. යුක්තිය පසිඳලීමේ මෙම බරපතල අවප්‍රමාණයට හේතු වූ සියලු දෙනාගේ ක්‍රියාවන් හෝ අතපසුවීම් සම්බන්ධයෙන් වගවීම; සහ
3. අපහාස බලතල සහ රිමාන්ඩ් ක්‍රියා පටිපාටි ක්‍රියාත්මක කිරීම පිළිබඳ ක්‍රමානුකූල සමාලෝචනයක් ඔස්සේ ව්‍යවස්ථාපිත සහතික කිරීම්, මානව හිමිකම් ප්‍රමිතීන් සහ සාධාරණත්වය සහ සමානුපාතිකත්වය පිළිබඳ මූලික මූලධර්මවලට අනුකූලව ඒවා ක්‍රියාත්මක වන බව සහතික කිරීම.