ළමයින්ට සහ කාන්තාවන්ට සිදුවන හිංසන සම්බන්ධ පැමිණිලි භාර ගැනීම සඳහා ළමා හා කාන්තා අපයෝජන නිවාරණ කාර්යාංශය තුළ ස්ථාපිත කළ 109 ක්ෂණික දුරකතන අංකය ඔස්සේ පැමිණිලි 1,077ක් වාර්තා වී ඇති බවත් ඉන් පැමිණිලි 477ක් විමර්ශන අවසන් කර ඇති අතර පැමිණිලි 42ක් සඳහා නඩු පැවරීමට කටයුතු කර ඇති බව ද පොලිසිය පවසයි. එමෙන්ම පැමිණිලි 08ක් සමථ මණ්ඩලය වෙත යොමු කර ඇති අතර පැමිණිලි 550කට අදාළව විමර්ශන කටයුතු ද සිදු කරමින්ද පවතී.
ළමයින්ට හා කාන්තාවන්ට සිදුවන හිංසන සම්බන්ධ පැමිණිලි භාර ගැනීම සඳහා පැය 24 පුරා ක්‍රියාත්මක වන පරිදි විශේෂිත ඒකකයක් පසුගියදා ස්ථාපිත කළ අතර පසුගිය ජනවාරි මස 4 වැනිදා සිට මේ මස 10 වැනිදා දක්වා කාලය තුළ පැමිණි පැමිණිලි මේ සඳහා ඇතුළත් වේ.
මෙහි දී [email protected] යන විද්‍යුත් ලිපිනය හරහා සහ ක්ෂණික ඇමතුම් අංක 109 හා 0112444444 මඟින් ජනතාවට ඉතා පහසුවෙන් හා සෘජුවම පැමිණිලි ඉදිරිපත් කළ හැකි අතර ළමයින්ට හා කාන්තාවන්ට එරෙහිව සිදුවන අපරාධ, එම අපරාධ නිවාරණය සිදු කිරීම, ළමයින්ට හා කාන්තාවන්ට එරෙහිව සිදු කරන ලිංගික හිංසන හෝ වෙනත් ඕනෑම ආකාරයේ හිංසනයන්, ගෘහස්ථ ප්‍රචණ්ඩත්වය, ළමයින් අනාරක්ෂිත වීම, ළමා මෙහෙකාර සේවය හා කෲරත්වයට පත් කිරීම සහ අන්තර්ජාලය හරහා සිදුවන අපරාධ සම්බන්ධ පැමිණිලි සම්බන්ධයෙන් විමර්ශන කටයුතු සිදු කරනු ලබයි.