හිරගෙවල් 28 ක සිට සාක්කි දීමට වීඩියෝ පහසුකම් ඇති බව රජය කියයි!

The government says it has video facilities to testify in 28 prisons

වීඩියෝ තාක්ෂණය මඟින් අභියාචනාධිකරණයේ නඩු කටයුතු සිදු කිරීම ආරම්භ කළ බව රජය නිවේදනය කර තිබේ.

ජාතික චිත්‍රපට සංස්ථාවේ දෙමළ අංශයේ හිටපු අධ්‍යක්ෂවරයකුද වන දේවදාසන් කනගසබේ දින දහයක් තිස්සේ ආහාර වර්ජනයක නිරත වෙමින් රජයට බල කර තිබුනේ පසුගිය වසරේ ශ්‍රී ලංකාවට බල පෑ කොරෝනා වසංගත ව්‍යාප්තිය හමුවේ මේ වන විට අභියාචනාධිකරනයේ විභාග වන තම  නඩු කටයුතු නතර වී ඇති  අතර ඒවා  කඩිනමින් අවසන් කිරීමට නොහැකිනම් තමන්ට ඇප ලබා දෙන ලෙසයි.

බන්ධනාගාර අධිකාරීගේ පොරොන්දුව අනුව  පළමු සති 3 සඳහා සිය විරෝධය අත්හිටුවීමට පසුව ඔහු ක්‍රියා කර තිබුනි.

කොවිඩ් වෛරසය හමුවේ වුවද රට තුළ අධිකරණ කටයුතු විධිමත්ව පවත්වා ගැනීමේ අරමුණ හා ඩිජිටල් තාක්ෂණය ඒ සඳහා යොදා ගැනීමේ ආරම්භයක් වශයෙන් වීඩියෝ තාක්ෂණය ඔස්සේ අභියාචනාධිකරණයේ නඩු කටයුතු සිදු කිරීම සිදු වන බවයි රජයේ ප්‍රවෘත්ති දෙපාර්තමේන්තුව පවසන්නේ.

ඒ අනුව අභියාචනාධිකරණයේ අංක  205, 110, 107 යන කාමර වලදී මෙම කටයුතු ආරම්භ කළ බව රජය පවසයි.

මේ සදහා වැලිකඩ සහ අඟුණකොළපැලැස්ස යන බන්ධනාගාර වල සිට අන්තර්ජාලය හරහා අවශ්‍ය සම්බන්ධතා සිදුකළ බව රජයේ ප්‍රවෘත්ති දෙපාර්තමේන්තුව වැඩි දුරටත් පවසයි.

“මෙම ක්‍රියාවලිය Lanka Government Network යටතේ බන්ධනාගාර ස්ථාන 28 ක දැනටමත් ආරම්භ කර ඇත. මෙම නව පහසුකම මඟින් එම බන්ධනාගාරවල සිටින රැඳවියන් අභියාචනාධිකරණයට ඩිජිටල් තාක්ෂණය ඔස්සේ ඉදිරිපත් කිරීමට හැකි වනු ඇත”.

වර්තමාන කොවිඩ් 19 වසංගත තත්ත්වය සැලකිල්ලට ගනිමින් මෙම පහසුකම දිවයින පුරා උසාවි වෙත ව්‍යාප්ත කිරීමට අපේක්ෂා කරන බවද රජය නිවේදනය කර තිබේ.

මෙරට තුළ දැනට පවතින වසංගත තත්වය හමුවේ අධිකරණ පද්ධතිය තුල කඩිනමින් නඩු විසඳිමට විකල්පයක් ලෙස අන්තර්ජාලය යොදා ගනිමින් On Line ක්‍රමයට නඩු පවත්වාගෙන යාමේ ක්‍රමය ආරම්භ කර ඇති බව රජය තව දුරටත් පවසයි.

රජයේ ප්‍රවෘත්ති දෙපාර්තමේන්තුව පවසන පරිදි මෙම කටයුතු සිදුකරනු ලබන්නේ අධිකරණ සේවා කොමිෂන් සභාවේ පූර්ණ අධික්ෂණය යටතේය.

“මෙම ක්‍රියාවලියට සමගාමීව දිවයිනේ සියලුම අධිකරණ ආවරණය වන පරිදි පුළුල් අධිකරණ ස්වයංක්‍රීයකරණ ව්‍යාපෘතියක් ක්‍රියාත්මක කිරීමට පියවර ගනිමින් සිටී”.

මෙම යෝජිත පද්ධතියට ස්වයංක්‍රීය නඩු ගොනු කිරීමේ පද්ධතියක්, උසාවි කළමනාකරණ පද්ධතියක් සහ උසාවි පටිගත කිරීමේ පද්ධතියක් ඇතුළත් බව රජය පවසයි.

මෙම ව්‍යාපෘතිය සඳහා උපදේශක ලෙස ශ්‍රී ලංකාවේ තොරතුරු හා සන්නිවේදන තාක්‍ෂණ ඒජන්සිය පත් කර ඇති බව ප්‍රවෘත්ති දෙපාර්තමේන්තුව තව දුරටත් සඳහන් කරයි.

ශ්‍රී ලංකාවේ රජයට එල්ල වන යුද අපරාධ සහ මානව හිමිකම් උල්ලංඝන චෝදනා සම්බන්ධයෙන් විදේශගතව සිටින සාක්ෂිකරුවන්ගෙන් නඩු විභාග වලට දායක

කරගැනීමට වීඩියෝ තාක්ෂණය යොදා ගන්නා ලෙස ජාත්‍යන්තර මානව හිමිකම් සංවිධාන කලෙක පටන් ඉල්ලා තිබේ.

ඒ සඳහා පසුගිය රජය යෝජනා කර තිබුනේ විදේශ දූත මණ්ඩල කාර්යාල වල එම පහසුකම් සැපයිය හැකි බවයි.

Social Sharing

Related posts