වෘත්තීයවේදීන්ගේ සේවාදායක දත්ත ඇතුළත් දුරකථන, පරිගණක ඇතුළු වෙනත් තොරතුරු පොලිසිය විසින් නීතියට පිටින් ගොස් වෘත්තීයවේදීන්ගෙන් ඉල්ලා සිටීම, නීතීඥයන් ද ඇතුළු, සියලු පුරවැසියන්ට සහතික කර ඇති ව්‍යවස්ථාපිත අයිතීන්ගේ ආරක්ෂාවට තර්ජනයක් බව ශ්‍රී ලංකා නීතීඥ සංගමය නිවේදනයක් නිකුත් කරමින් කියා සිටී.
ඉකුත්දා, නීතීඥ උපදේශන සේවාවකට සහභාගී වී ආපසු පැමිණෙමින් සිටියදී තුසිත හල්ලොලුවගේ වාහනයට වෙඩි තැබීමේ සිද්ධියක් සම්බන්ධයෙන් විමර්ශන පවත්වන කොළඹ අපරාධ විමර්ශන අංශය විසින් හල්ලොලුවගේ නීතීඥවරයා වන දිනේෂ් දොඩම්ගොඩගේ දුරකථනය භාර දෙන ලෙස වාචිකව ඉල්ලා තිබූ අතර, අධිකරණ නියෝගයක් නොමැතිව, එසේ කළ නොහැකි බව නීතීඥවරයා විසින් කොළඹ අපරාධ විමර්ශන කොට්ඨාශයට දැනුම් දී තිබුණි.
මේ සම්බන්ධයෙන් නීතීඥ දිනේෂ් දොඩම්ගොඩ ශ්‍රී ලංකා නීතීඥ සංගමයෙන් වෘත්තීය උපදෙස් ඉල්ලා සිටින ලද අතර, අධිකරණ නියෝගයක් නොමැතිව එසේ කළ නොහැකි බව නීතීඥ සංගමය විසින් බැඩබලන පොලිස්පතිවරයාට දන්වා යැවීමට පියවර ගෙන තිබුණි.
ඉන් අනතුරුව, නීතීඥ සංගමය මහජන නිවේදයක් නිකුත් කිරීමට ද පියවර ගෙන තිබුණි. මතු දැක්වෙන්නේ එම නිවේදනයේ සිංහල පරිවර්තනයි.
නීතිඥ සංගමයේ ප්‍රකාශය: නිදහස් හා සාධාරණ ආකාරයකින් තම වෘත්තීය රාජකාරි ඉටු කිරීමට නීතිඥවරයාට ඇති අයිතිය
මෑත වකවානුවේදී, නීතිය ක්‍රියාත්මක කරන ආයතන සහ නඩු පවරන බලධාරීන් නීතිඥවරුන් ඉටු කරන වෘත්තීය රාජකාරිවලට අදාළව ඔවුන් සතුව ඇති තොරතුරු ලබා ගැනීමට උත්සාහ කළ අවස්ථා කිහිපයක් පිළිබඳ වාර්තා නීතිඥ සංගමයට ලැබී තිබේ.
නීති වෘත්තිකයන් තම සේවාදායකයින්ගේ නීත්‍යානුකූල උපදෙස් මත ක්‍රියා කරන බව නීතීඥ සංගමය අවධාරණය කරයි. රහස්‍යභාවය සඳහා වෘත්තීය රාජකාරිවලින් බැඳී සිටින මෙම රාජකාරි ශ්‍රේෂ්ඨාධිකරණ නීති සහ සාක්ෂි ආඥා පනත යටතේ ස්ථිරව ස්ථාපිත කර ඇති අතර, සේවාදායකයින්ගේ කැමැත්ත ඇතිව හෝ නීතියෙන් ප්‍රකාශිතව අවශ්‍ය පරිදි හැර, පුද්ගලික සන්නිවේදනයන් හෙළිදරව් කිරීම තහනම් කරයි.
නීතිය ක්‍රියාත්මක කරන ආයතන සහ නඩු පවරන බලධාරීන් තම වෘත්තීය රාජකාරි ඉටු කිරීමට අදාළව පැන නගින කරුණු සම්බන්ධයෙන් ප්‍රකාශ නිකුත් කිරීම සඳහා නීතිඥවරුන්ගෙන් ඉල්ලා සිටීම නුසුදුසු බව නීතීඥ සංගමය සලකයි. එවැනි ක්‍රියා සදාචාරාත්මක ප්‍රමිතීන් උල්ලංඝනය කිරීමේ සහ නීති වෘත්තියේ ස්වාධීනත්වය අවදානමට ලක් කිරීමේ අවදානමක් ඇත.
යුක්තිය පසිඳලීමේ ක්‍රමය තුළ නීතිඥයින්ගේ කාර්යභාරයට හානි කරන එවැනි ක්‍රියාවලින් වැළකී සිටින ලෙස නීතීඥ සංගමය එවැනි සියලුම බලධාරීන්ගෙන් සහ ආයතනවලින් ඉල්ලා සිටී.
මෙවැනි මැදිහත්වීම් නීතියේ ආධිපත්‍යයට සහ ආණ්ඩුක්‍රම ව්‍යවස්ථාවේ 14(1)(g) වගන්තිය යටතේ, නීතීඥයින්ද ඇතුළුව, සියලුම පුරවැසියන්ට සහතික කර ඇති ව්‍යවස්ථාපිත ආරක්ෂාවන්ට තර්ජනයක් වේ. යුක්තිය පසිඳලීමේ නිදහස් හා සාධාරණ පද්ධතියක් පවත්වා ගැනීම සඳහා අත්‍යවශ්‍ය අංගයක් වන ශ්‍රේෂ්ඨාධිකරණ රීති ඇතුළුව, නීතියේ විධිවිධානවලට යටත්ව, නීති ක්ෂේත්‍රයේ සාමාජිකයින්ට කිසිදු බියකින් හෝ සීමාවකින් තොරව තම වෘත්තීය රාජකාරි ඉටු කිරීමට හැකි විය යුතු බව නීතිඥ සංගමය නැවත අවධාරණය කරයි.
නීතිඥවරුන්ට සේවාදායකයෙකු සම්බන්ධයෙන් තම වෘත්තීය රාජකාරි ඉටු කිරීම සඳහා පනවා ඇති ඕනෑම සීමාවක්, රටේ අධිකරණ පද්ධතියේ අත්‍යවශ්‍ය අංගයක් වන යුක්තිය පසිඳලීම සඳහා නියමිත සහ නිසි ප්‍රවේශයක් ලබා ගැනීමට පුරවැසියන්ට ඇති අයිතිය කප්පාදු කරනු ඇති බව නීතීඥ සංගමය තවදුරටත් අවධාරණය කරයි.
නීති වෘත්තිකයන්ගේ අයිතිවාසිකම් සහ නිදහස ආරක්ෂා කිරීමට සහ ශ්‍රී ලංකාවේ නීතිඥ වෘත්තියේ අඛණ්ඩ ස්වාධීනත්වය, නිර්ව්‍යාජත්වය, සහ ගෞරවය ආරක්ෂා කිරීමට නීතීඥ සංගමය දැඩි ලෙස කැපවී සිටී.
theleader.lk