නවක වදය නිසාවෙන් විශ්වවිද්‍යාල සිසුවෙකු සිය දිවි හානි කරගත් පුවතක් වාර්තා වේ. මෙලෙසින් සියදිවි හානිකරගෙන ඇත්තේ සබරගමුව විශ්වවිද්‍යාලයේ තාක්ෂණික ඉංජිනේරු පීඨයේ දෙවැනි වසරේ අධ්‍යාපනය හැදෑරු චරිත් දිල්ශාන් නම් 23 හැවිරිදි සිසුවෙකි.
ඉකුත් 27 වන දා විශ්වවිද්‍යාලයේ පැවැති අවුරුදු උත්සවයක් නිමවීමෙන් අනතුරුව ඊට පසුදින එනම් 28 වැනි දින ඔහු ගම්පොල ඉහළගම පිහිටි සිය නිවස වෙත පැමිණ ඇති බවට වාර්තා වේ. පසුව ඔහු 29 වන දා සවස මේ අයුරින් සිය නිවස පසුපස ගෙල වැළලාගෙන සියදිවි නසාගෙන තිබුණි.
ඔහුගේ මිතුරන් හා ඥාතීන් පවසන ආකාරයට විශ්ව විද්‍යාලයේ පැවැති අවුරුදු උත්සවයේදී ඔහුට දරාගත නොහැකි ලෙස නවකවධයට මුහුණ දීමට සිදුවූ බවත් ඒ අනුව සිත් තැවුලට පත් වූ ඔහු මේ අයුරින් සියදිවි නසා ගත් බවයි.
මේ සම්බන්ධව මියගිය චරිත්ගේ මව පවසා සිටියේ,
“එයාට ගියාට පස්සේ වධ දීලා මගේ පුතාට, යට කළිසමත් ගැලෙව්වාලු, බිත්තියේ ඔළුව වැද්දෙව්වාලු, මගේ හැට්ට කට්ටෙන් මගේ පුතාට ඇන්නාලු. ඒ කරලා කබඩ් එකක් ඇතුළට තල්ලු කරලා. ගෙදර ආවට පස්සේ අම්මිට මුහුණ දුන්නෙත් නෑ. මගේ දරුවා ඒ පීඩනේ මගෙත් එක්ක කියුවා…. ආයෙත් මේ වගේ දුකක් වෙන දරුවොන්ට දෙන්න එපා…..”
මේ අතර පසුගිය අවුරුදු දෙක පුරාවටම තම පුතාට විවිධ හිරිහැර සබරගමුව විශ්වවිද්‍යාලයේ සිසුන් විසින් සිදුකළ බව චරිත්ගේ පියා චෝදනා කළේය.
“පසුගිය අවුරුදු දෙක පුරාවටම මගේ පුතාට සීනියර් බැජ් එකේ ඉන්න අය නවකවධය දීලා තියෙනවා. මගේ පුතා මට නැතිවුණා.. මම කාරුණිකව ඉල්ලා සිටින්නේ අදාළ බලධාරීන්ගෙන් ඉදිරියට විශ්වවිද්‍යාලයට තේරි පත්වන ළමයින්ට මේ වගේ නවකවධයක් දීලා මේ දරුවන් අපහසුතාවට පත්වෙන්න නොදී බළධාරීන් නිසි පියවරක් ගෙන නීතිය ක්‍රියාත්මක කරන ලෙස මම කාරුණිකව ඉල්ලා සිටිනවා. “