විනිශ්චයකාරවරුන් සහ නීතිඥයන් අතරින් බහුතරයක් දූෂිත බව පැවසීමෙන් අධිකරණයට අපහාස කළ බවට වරදකරු වීමෙන් බරපතල වැඩ සහිතව සිව් වසරක සිර දඬුවම් නියම වු ජනප්‍රිය නළුවකු ද වන විපක්ෂයේ පාර්ලිමේන්තු මන්ත්‍රීවරයාගේ මන්ත්‍රී ධූරය සම්බන්ධයෙන් පරස්පර අදහස් මතුවෙමින් තිබේ.
පාර්ලිමේන්තු මන්ත්‍රී රන්ජන් රාමනායකගේ මන්ත්‍රී ධූරය අහෝසි වන බව අධිකරණ අමාත්‍යාංශයේ ප්‍රධාන නීති උපදේශක ජනාධිපති නීතිඥ යූ. ආර්. ද සිල්වා පවසද්දී විපක්ෂ නායකයාගේ මතය වී ඇත්තේ ආණ්ඩුක්රම ව්‍යවස්ථාවට අනුව මන්ත්‍රීවරයාගේ මන්ත්‍රී භාවය අහෝසි වන්නට කිසිදු අවස්ථාවක් නොමැති බවයි.
අධිකරණයට අපහාස කිරීම සම්බන්ධයෙන් දිය යුතු දඬුවම හා එහි කාලසීමාව නීර්ණය කර නොමැති බැවින් ඔහුගේ ප්‍රජා අයිතිය අහිමි නොවන බව නීතිඥ සුරේන් ප්‍රනාන්දු සමාජ මාධ්‍ය ඔස්සේ අදහස් පළ කර තිබේ.
භාෂණයේ නිදහස උදෙසා නිදහස් චතුරස්‍රය අසලදී ජනවාරි 13 බදාදා විපක්ෂය සංවිධානය කළ නිහඩ විරෝධතාවයකට එක්වෙමින් විපක්ෂ නායක සජිත් ප්‍රේමදාස පවසා සිටියේ මොනම ආකාරයකින්වත් අධිකරණය ලබා දුන් තීන්දු විවේචනයට ලක් කිරීමට හා අභියෝගයට ලක් කිරීමට තමන් සුදානම් නොමැති බවයි.
නමුත් වෙනමම නීති මණ්ඩල හරහා ගත යුතු නීති ක්‍රියාමාර්ගයන් ගන්නට මේ වන විටත් රටේ ප්‍රවීණතම ජනාධිපති නීතිඥවරුන් ගණනාවක් කටයුතු කරමින් සිටින බව පසුගිය ජනාධිපතිවරනයේදී ජනාධිපති අපේක්ෂකකු ලෙස තරඟ වැදුනු වත්මන් විපක්ෂ නායකයා සදහන් කළේය.
ඔහු එහිදී වැඩි දුරටත් සදහන් කළේ ආණ්ඩුක්රම ව්‍යවස්ථාවට අනුව රන්ජන් රාමනායක මන්ත්‍රීවරයාගේ මන්ත්‍රීධුරය සුරක්ෂිත බවයි.
“නමුත් මට එක දෙයක් කියන්නට තිබෙනවා. ආණ්ඩුක්රම ව්‍යවස්ථාවේ 89, 91, 105 යන ව්‍යවස්ථාවන් හොදින් කියවලා බලනකොට අපිට තේරෙන දේ තමයි රන්ජන් රාමනායක මැති තුමාගේ මන්ත්‍රී භාවය අහෝසි වෙන්නට කිසි සේත්ම ව්‍යවස්ථානුකුලව, ඒ වගේම නෛතික අවස්ථාවක් නෑ. ”
භාෂණයේ නිදහස තහවුරු කරන ලෙසත් ප්‍රජාතන්ත්‍රවාදය ශක්තිමත් කරන ලෙසත් ඔවුහූ ආණ්ඩුවට බලකොට ඉල්ලා සිටියහ.
ස්වාධීන වාර්තාකරණය තහනම් කළාවූද, යුද කලාපයේ තොරතුරු හෙළි කළ වෛද්‍යවරුන් කණ්ඩායමක් යුද්ධාවසානයේ සිරගත කළ හමුදාවකට අණ දුන්නාවුද ෆීල්ඩ් මාර්ෂල් සරත් ෆොන්සේකාත් “භාෂණයේ නිදහස සුරකිමු” යනුවෙන් මුද්‍රණය කෙරුණු පුවරුවක් ඔසවාගෙන සිටිනු දකින්නට ලැබුණි.
අධිකරණයට අපහාස කිරීමේ චෝදනාවට වැරදිකරු වී සිව් වසරක බරපතළ වැඩසහිතව සිර දඬුවම් නියම වූ රන්ජන් රාමනායක ගේ මන්ත්‍රී ධූරය අහෝසි වන බව අධිකරණ අමාත්‍යාංශයේ ප්‍රධාන නීති උපදේශක යූ. ආර්. ද සිල්වා ජනවාරි 12 අඟහරුවාදා ජනමාධ්‍ය හමුවේ ප්‍රකාශ කර තිබුනි.
“සාමාන්‍ය අධිකරණයෙන් දඬුවමක් දුන් පසු එයට අභියාචනා කිරීමේ හැකියාවක් තිබෙනවා. මේ නඩුවේදී එසේ කිරීමට හැකියාවක් නැහැ. මොකද ශ්‍රේෂ්ඨාධිකරණය විසින් තමයි සලකා බැලීමක් සිදුකරනු ලැබුවේ, අධිකරණයට අපහාසවීමක් සිදුවූණාද කියන එක සම්බන්ධයෙන්. ඒ අනුව රන්ජන් රාමනායකට මන්ත්‍රී ධුරය අහෝසි වෙනවා. ඔහුට මන්ත්‍රීවරයෙක් ලෙස පාර්ලිමේන්තුවට ඒමට, ඒ සම්බන්ධයෙන් කටයුතු කිසිදෙයක් කරන්නට හැකියාවක් නැහැ. ඒ අනුව ඔහු අවුරුදු 4 කින් පසුව හෝ ඊට පෙර ජනාධිපතිවරයා යම්කිසි සමාවක් දුන්නහොත් පමණක් ඒ පිළිබඳ කටයුතු කරන්න පුළුවන් වෙන්නේ.“
ඒ අනුව, රන්ජන් රාමනායකගේ මන්ත්‍රීධුරය අහිමිවන අතර සිර දඬුවම අවසන් වන දින සිට තවත් වසර 7ක් දක්වා ඔහුගේ ඡන්ද අයිතියද අහිමිවනු ඇති බවටත් ඇතැම් ජනමාධ්‍ය ආයතන වාර්තා කර තිබුනි.
පසුගිය වසරේ පැවති පාර්ලිමේන්තු මැතිවරණයේදී “සමගි ජන බලවේගය” පක්ෂයෙන් ගම්පහ දිස්ත්‍රික්කයට තරඟ කළ රන්ජන් රාමනායක මනාප ලැයිස්තුවේ දෙවැනි ස්ථානය හිමිකරගත්තේ සමගි ජනබල වේගයට ගම්පහ දිස්ත්‍රික්කයෙන් ආසන 4ක් හිමිකර දෙමිනි.
සමාජ මාධ්‍ය ඔස්සේ අදහස් දක්වමින් නීතිඥ සුරේන් ප්‍රනාන්දු පෙන්වා දී ඇත්තේ අධිකරණයට අපහාස කිරීම සම්බන්ධයෙන් දිය යුතු දඬුවම හා එහි කාලසීමාව නීර්ණය කර නොමැති බැවින් රන්ජන් රාමනායකගේ ප්‍රජා අයිතිය අහිමි නොවන බවයි.
“සමහරුන් අදහස් පළ කරන්නේ රන්ජන් රාමනායක ගේ මන්ත්‍රී කම අහෝසි වෙන්නේ ආණ්ඩුක්රම ව්‍යවස්ථාවේ 89 (ඈ) වගන්තිය 91 (1) (ඈ) සමඟ කියවා බලන විට එම ව්‍යවස්ථාව අනුව උසාවියට අපහාස කිරීම සම්බන්ධයෙන් වරදකරු වූ විට/ අවුරුදු 4 කට වසරක සිර දඩුවම් නියම වූ මන්ත්‍රීවරයා “නුසුදුස්සකු” වන බැවින් මන්ත්‍රීවරයාට ඔහුගේ ආසනය අහිමි වනු ඇත කියන ස්ථාවරය මත ඉඳල,”
“නමුත් ඡන්දදායකයින් නුසුදුස්සන් කිරීම සම්බන්ධයෙන් කටයුතු කරන්නේ 89 ව්‍යවස්ථාව. ව්‍යවස්ථාවේ 91 (1) (ඈ) ව්‍යවස්ථාවල නුසුදුසුකම් අදාළ වෙන්නේ මැතිවරණයක් අපේක්ෂා කරන අයට සහ / හෝ මන්ත්‍රීවරුන් ලෙස කටයුතු කිරීම සඳහා.”
අධිකරණයට අපහාස කිරීම “වසර දෙකකට වඩා අඩු නොවන කාලයක් සඳහා සිර දඬුවම් ලැබිය හැකි වරදක්” බව ආණ්ඩුක්රම ව්‍යවස්ථාවෙන් අර්ථ දක්වා නොමැති බවත් නීතිඥ සුරේන් ප්‍රනාන්දු තව දුරටත් පෙන්වා දී තිබේ.