වසංගතයෙන් මියයන මුස්ලිම්වරුන් තමන්ගේ මාතෘභූමිය තුල භූමදානයට අවසර නොදෙන තත්වයක් තුල ජනාධිපති ගෝඨාභය රාජපක්ෂ මහතා ඒ සඳහා අවස්ථාව ලබාදෙන ලෙස විශේෂ ඉල්ලීමක් මාලදිවයින් රජයෙන් කර තිබේ.
“කොවිඩ් 19 න් මියයන ශ්‍රී ලාංකික මුස්ලිම්වරුන්ගේ ඉස්ලාමීය අවසන් වතාවත් මාලදිවයිනේ පැවැත්වීමට සහාය දෙන ලෙස ශ්‍රී ලංකාවේ ජනාධිපති ගෝඨාභය රාජපක්ෂ විසින් කරන ලද විශේෂ ඉල්ලීමක් අනුව ජනාධිපති මොහමඩ් ඉබ්‍රාහිම් සොලී ආණ්ඩුවේ අදාළ පාර්ශව සමග සාකච්ඡා ආරම්භ කර තිබේ,” යි මාලදිවයින් විදේශ අමාත්‍ය අබ්දුල්ලා ෂාහිඩ් ට්විටර් මගින් නිවේදනය කර තිබේ.
කෙසේවෙතත්, රජය මැදිහත් වී ශ්‍රී ලාංකිකයන් වෙනත් රටක භූමදානය කිරීම ඔවුන්ගේ මානව හිමිකම් උල්ලංඝනයක් බව ශ්‍රී ලංකා මුස්ලිම් කොන්ග්‍රස් නායකයා මාලදිවයින් ආණ්ඩුවට පෙන්වා දී තිබේ.
“මේ සංඥාව සම්බන්ධයෙන් සර්වබලධාරී දෙවියන් වහන්සේ ඔබටත් ඔබේ දේශයටත් ආශිර්වාද කරත්වා. එසේ වෙතත්, අපේ ආදරණීය දේශයේ ජීවත්වී අභිමානයෙන් යුතුව භූමදානය වීමේ අයිතිය ප්‍රතික්ෂේප කිරීමට ආණ්ඩුව මෙම පොරොන්දුව ප්‍රයෝජනයට ගන්නට දරන කිසියම් උත්සාහයක් වේනම් අපි ඊට විරුද්ධ වන්නෙමු,” යි රවුෆ් හකීම් මන්ත්‍රීවරයා කොළඹ මාලදිවයින් මහකොමසාරිස් වෙත ලියා ඇති ලිපියකින් කියා සිටී.
මුස්ලිම් නායකයා එම ලිපිය ලියා තිබුනේ මාලදිවයින ශ්‍රී ලාංකිකයන් වල දැමීමට ඉඩම් සෙවීම සඳහා මැදිහත්වී ඇත්තේ ඔවුන්ගේ උවමනාවෙන්ම බවයි සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය හේමන්ත හේරත් උපුටා දක්වන ඩේලි මිරර් පුවත් වාර්තාවක් දැකීමෙන් පසුවයි.
ශ්‍රී ලංකාවේ ජනාධිපතිවරයා තම ඉල්ලීම කර ඇත්තේ කෝවිඩ් ආසාදනයෙන් මියගිය සිඟිති දරුවකු ඇතුළු ඉස්ලාම් භක්තිකයන්ගේ සිරුරු බලහත්කාරයෙන් පිළිස්සීමට විරුද්ධව රට තුලත් ඉන් පිටතත් මතුවන විරෝධතා මධ්‍යයේ අගමැතිවරයා ලංකාවේ ඉඩම් සොයන්නට උපදෙස් දී තිබියදීය.
අගමැති මහින්ද රාජපක්ෂ මීට මාසයකට ඉහතදීත් එම උපදේශයම දී තිබුනත් එයින් ප්‍රතිපලයක් අත් වූ බවක් දැනගන්නට නැත.
