රාජ්‍ය මාධ්‍ය ආයතනයක මාධ්‍යවේදියකුටත් කොරෝනා

දෙවැනි කොරෝනා  වසංගත රැල්ල වාර්තා කිරීමේ යෙදෙන මාධ්‍යවේදීන් නිසා වයිරසය පැතිරීමේ අවදානමක් මතු විය හැකි බවට රජය අනතුරු අඟවා තිබියදී, රාජ්‍ය මාධ්‍ය ආයතනයක පිරිමියකු  කොවිඩ් 19  ට ගොදුරු  වී තිබේ.

කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය ඒ බව තහවුරු කර තිබෙන අතර  රජයේ ප්‍රවෘත්ති දෙපාර්තමේන්තුවෙන් දැනගන්නට ලැබුනේ  ITN නාලිකාවේ කැමරා ශිල්පියකු  ට  වෛරසය ආසාදනය වී ඇති බවයි.

ඔහු පසුගිය දා පැවැති රජයේ කැබිනට් තීරණ දැනුම් දීමේ මාධ්‍ය හමුව සදහා සදභාගී වී ඇති බැවින් ගත යුතු සෞඛ්‍ය ආරක්ෂිත පියවර සම්බන්ධයෙන් රජයේ ප්‍රවෘත්ති දෙපාර්තමේන්තුවේ නිලධාරීන් අද දිනයේ සාකච්ඡා කළ බව  නම හෙළි නොකරන ලෙස ඉල්ලා සිටි එම ආයතනයේ ඉහළ නිලධාරියකු මාධ්‍යවේදීන් හා කියා තිබේ.

ශ්‍රී  ජයවර්ධනපුර විශ්ව විද්‍යාලය අසල පිහිටි ස්ථානයක නවාතැන් ගෙන සිටි වෛරසය ආසාදනය වී සිටින ITN නාලිකාවේ සාමාජිකයා බලංගොඩ ප්‍රදේශයේ පදිංචිකරුවෙක් බව මාධ්‍ය වාර්තා කර තිබේ.

ශ්‍රී ලංකාව තුළ කොරෝනා වසගතය ව්‍යාප්ත වීමට පටන් ගැනීමෙන් පසු මාධ්‍යවේදියකුට වෛරසය ආසාදනය වූ පළමු අවස්ථාව ලෙස මෙය වාර්තා වන අතර එම අනාවරණය සිදුව ඇත්තේ නව නිරෝධායන නීති ඇතුළත් අතිවිශේෂ ගැසට් නිවේදනයක් රජය විසින් නිකුත් කර දිනක් ගතවීමටත් පෙරය.

මේ වන විට කොවිඩ් 19 වෛරසය හා සම්බන්ධ නවතම තත්වයන් පිළිබද ප්‍රවෘත්ති වාර්තාකරණයේදී, මාධ්‍යවේදීන් එම ආසාදිතයන් හා ඔවුන්ගේ ආශ්‍රිතයන් ප්‍රතිකාර ලබන රෝහල්, නිරෝධායන මධ්‍යස්ථාන හා එම පුද්ගලයන්ගේ වාසස්ථාන ආදී ආශ්‍රීත පරිශ්‍රයන් පසුබිම් කරගනිමින් ප්‍රවෘත්ති වාර්තා කිරීමට කටයුතු කිරීම අන්තරාදායක බවට  රජයේ ප්‍රවෘත්ති දෙපාර්තමේන්තුව පසුගියදා අනතුරු අගවා තිබුනි.

“මෙම තත්ත්වය තුළ මාධ්‍යවේදීන්ගේ හා ඒ මගින් අදාළ මාධ්‍ය ආයතනයන්හි සේවය කරන සෙසු කාර්යය මණ්ඩලයන්හීද සෞඛ්‍යාරක්ෂාව සම්බන්ධව යම් අවදානමක් මතුවිය හැකිය,” යි රජයේ ප්‍රවෘත්ති අධ්‍යක්ෂ ජනරාල් නාලක කළලුවැව ඔක්තෝබර් 5  නිකුත් කළ නිවේදනයක දැක්වේ.

මේ නිසා සෑම විටම තම සෞඛ්‍යාරක්ෂාවට ප්‍රමුඛත්වය දෙන ලෙසත්  සෞඛ්‍ය අංශ විසින් නිකුත් කර ඇති සෞඛ්‍ය මාර්ගෝපදේශ උපරිම ලෙස සහ අනිවාර්යෙන්ම අනුගමනය කිරීමට කටයුතු කරන ලෙසත්  කොව්ඩ් 19 සම්බන්ධව වාර්තාකරණයේ යෙදෙන මාධ්‍යවේදීන්ට උපදෙස් හා නියෝග ලබා දෙන්නැයි රජයේ  ප්‍රවෘත්ති අධ්‍යක්ෂ ජනරාල්,  ප්‍රවෘත්ති අංශ ප්‍රධානීන්ගෙන් ඉල්ලා තිබුනි.

“විශේෂයෙන්ම, අත්‍යාවශ්‍ය කරුණක් සදහා නොවේ නම් කොවිඩ් 19 වෛරසය ආසාදිත වුවකුගේ හෝ සැක කටයුතු තැනැත්තකුගේ ආශ්‍රිත පරිසරයකට පිවිසීම හැකිතාක් අවම කිරීමට කටයුතු කරන මෙන් අදාළ මාධ්‍යවේදීන්ට උපදෙස් ලබාදෙන්නේ නම් මැනවි. ” එම නිවේදනයේ වැඩි දුරටත් සදහන්ව තිබේ.

Social Sharing
නවතම