“20 ට විරුද්ධව පෙනී සිටීම නීතිඥයින්ගේ යුතුකමක්!” – ජනතා නීතිඥයෝ වීදි බසී

” නීතිය හදාරලා වසර ගණනාවක් නීතිය පිළිබද පළපුරුද්ධ සහ අධ්‍යාපනය ලබපු මිනිස්සු විදිහට රටක ප්‍රජාතන්ත්‍රවාදය අහෝසි වෙනවානම් සහ ප්‍රජාතන්ත්‍රවාදයට විරුද්ධව යම් හෝ සිදු වීමක් සිද්ධ වෙනවානම් එයට විරුද්ධව කටයුතු කිරීම අපේ යුතුකමක් විදියට සලකනවා පුරවැසියෝ සහ නීතිඥවරුන් වශයෙන්.”

"20 ට විරුද්ධව පෙනී සිටීම නීතිඥයින්ගේ යුතුකමක්!" - ජනතා නීතිඥයෝ වීදි බසී

නීතිඥ අචලා සෙනවිරත්න ඒ සිහිපත් කිරීම කළේ ආණ්ඩුව විසින් පාර්ලිමේන්තුවට ඉදිරිපත් කර තිබෙන 20 වැනි ආණ්ඩුක්‍රම ව්‍යවස්ථා සංශෝධනයට පරාජය කිරීම සඳහා ඔක්තෝබර් 6 අඟහරුවාදා ශ්‍රේෂ්ඨාධිකරණය  ඉදිරිපිටදී පැවැත්වු නිහඩ විරෝධතාවයෙන් පසු මාධ්‍ය වෙත අදහස් දක්වමිනි.

විසි වැනි ආණ්ඩුක්‍රම ව්‍යවස්ථා සංශෝධනය සම්මත වූවහොත් එය රටේ ප්‍රජාතන්ත්‍රවාදයට සහ මිනිස් අයිතිවාසිකම් වලට විශාල අනිටු බලපෑමක් සිදු කරන බව පැවසු ඇය එහිදී වැඩි දුරටත් අවධාරණය කළේ ආණ්ඩුවේ සැලසුම සාර්ථක වුවහොත් ඒකාධිපති ජනාධිපතිවරයකු නිර්මාණය වන බවයි.

ජනතා නීතිඥයෝ සංවිධානය සහ 20ට එරෙහි වෘත්තිය සමිති ව්‍යාපාරය ඒකාබද්ධව සංවිධානය කර තිබු මෙම විරෝධතාවයේදී වෘත්තිය සමිති නායක ජෝසප් ස්ටාලින් චෝදනා  කළේ විසි වැනි සංශෝධනය හරහා අධිකරණයේ ස්වාධීනත්වය බරපතල  ලෙස හෑල්ලු කිරීමට ආණ්ඩුව  සුදානම් වන බවටයි.

"20 ට විරුද්ධව පෙනී සිටීම නීතිඥයින්ගේ යුතුකමක්!" - ජනතා නීතිඥයෝ වීදි බසී

“අපි දන්නවා දැන් අග්‍රවිනිශ්චකාරතුමා ඇතුලු සියලුම විනිශ්චකාරවරු පත් කිරීමේ බලය තිබුනේ ව්‍යවස්ථා දායක සභාවට. විසි වැනි සංශෝධනය හරහා  ඒ සමස්ත බලයම ජනාධිපතිවරයාට අරගෙන තියෙන්නේ. එතකොට ජනාධිපතිවරයා තමයි පත් කරන්නේ. ඊලගට අපි දන්නවා දැන් පාර්ලිමේන්තු සභාවෙන් නිර්දේශය පමණයි ලබා ගන්නේ. අනුමැතිය ඕනත් නැ. එතකොට අග්‍රවිනිශ්චකාරතුමා පත් කරන්නෙත් ජනාධිතිවරයා, ශ්‍රේෂ්ඨාධිකරණයේ විනිසුරුවරුන් පත් කරන්නෙත් ජනාධිපතිවරයා. ඒ වගේම අධිකරණ සේවා කොමිෂන් සභාවේ ලේකම් පත් කරන්නෙත් ජනාධිපතිවරයා.”

මෙම තත්වය මෙරටේ  ව්‍යවස්ථාව ප්‍රජාතන්ත්‍රවාදයේ සිට ඒකාධිපතිත්වය දක්වා ගමන් කිරීමක් බවයි ජ්‍යෙෂ්ඨ වෘත්තිය සමිති නායකයා එහිදී වැඩි දුරටත් සදහන් කළේ.

විසි වැනි ආණ්ඩුක්‍රම ව්‍යවස්ථා සංශෝධනයට දැඩි විරෝධය පළ කළ ලංකා ගුරු සංගමයේ ප්‍රධාන ලේකම් ජෝසප් ස්ටාලින් එහිදී තවදුරටත් අවධාරණය  කළේ රටේ ජනතාව දැනුවත් කරමින් වැඩ කරන පංතිය සහ නීතිඥ ප්‍රජාව ඒකාබද්ධ වූ අරගලයක් අනිවාර්යෙන්ම සිදු කරන බවයි.

Social Sharing
නවතම