පොලීසියේ බලපෑම් නොතකා උතුර නැගෙනහිර හර්තාල්!

දෙමළ නිජභූමියේ  බලහත්කාරයෙන් වාඩි ලා සිටි ඉන්දීය හමුදාවට ඉවත් වන ලෙස බල කරමින්  33 වසරකට  ඉහතදී මාරාන්තික උපවාසයක නියැලුණු තිලීපන් ලෙසින් ප්‍රචලිත,  රාසයියා පාර්තීපන් අනුස්මරණය කිරීම වළක්වාලමින් අධිකරණයේ ද සහායෙන් රජය විසින් පසුගිය දිනවල පනවා තිබු තහනමට විරෝධය  පාමින් සැප්තැම්බර් 28 සඳුදා උදෑසන සිට හර්තාල් ව්‍යාපාරය සාර්ථක දියත් කොට තිබුණි.

සියලු දෙමළ දේශපාලන පක්ෂ විසින් කරන ලද ඉල්ලීමකට අනුව අද (28)  දිනයේ ක්‍රියාත්මක වූ හර්තාලය සදහා මුස්ලිම් ප්‍රජාවගේ සහ බහුජන සංවිධාන වල විශාල සහායක් ලැබුනු අතර  බැංකු සහ රජයේ කාර්යාලද වසා දමා තිබේ.

පොලීසියේ බලපෑම් නොතකා උතුර නැගෙනහිර හර්තාල්!

හර්තාලයට දායක වෙමින් වව්නියාවේ වසා දමා තිබූ ව්‍යාපාරික ස්ථාන අරින ලෙස පොලීසිය කළ බලපෑම් වලට විරෝධතා කරුවන්  ඇහුන්කම් නොදුන් බව පවසන පළාත් බද මාධ්‍යවේදීන් වැඩි දුරටත් අවධාරණය කරන්නේ පසුව පොලීසිය ශබ්ද විකාශන යන්ත්‍ර භාවිත කරමින් කඩ සාප්පු විවෘත කරන ලෙස ජනතාවගෙන් ඉල්ලා සිටි බවයි.

එම ඉල්ලීමටද සාර්ථක ප්‍රතිචාරයක් ලැබී නොමැත.

යාපනය දිස්ත්‍රික්කයේ ආපනශාලා සහ ඖෂධහල් පමණක් අද දිනයේ  විවෘතව තබා ඇති  අතර අනෙක් සියලුම වෙළඳසැල් වසාදමා තිබේ.

එමෙන්ම  දිස්ත්‍රික්කයේ  සියලුම පෞද්ගලික බස් රථ  ධාවනයෙන් ඉවත්ව හර්තාලයට සහය ලබා දී ඇත.

නැගෙනහිර පළාතේ මඩකලපුව, වාලච්චේන, චෙංකලඩි, එරාවුර්, කලවංචිකුඩි සහ  කොක්කඩිචෝලෙයි ප්‍රදේශවාසී ජනතාව සක්‍රීයව හර්තාල් ව්‍යාපාරය සදහා සහාය දැක්වූ බව  පළාත් බද වාර්තාකරුවෝ වැඩි දුරටත් පවසති.

මඩකලපුව නගරයේ සියලුම කඩසාප්පු වසා දමා හර්තාලයට දායක වී ඇති බව සහතික කරන මංගලාරාමාධිපති අම්පිටියේ සුමනරතන හිමි ඒ සම්බන්ධයෙන් ප්‍රශ්න කරන ලෙස ආරක්ෂක අංශ වලට යෝජනා කළේය.

රජයේ නිලධාරීන්ට පහර දී මරණීය තර්ජනය කිරීම නිසා අධිකරණයට කැඳවා තිබෙන සුමන හිමි කඩ සාප්පු වැසීමට විරුද්ධව “නීතිය ක්‍රියාත්මක කරන” ලෙසද බලධාරීන්ගෙන් ඉල්ලා සිටියේය.

“සිංහල හමුදා කඳවුරු දෙමළ පළාත්වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් නිර්මාණය කරන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථානවල සිටින දේශපාලන රැඳවුම්කරුවන් වහා නිදහස් කළ යුතුයි” ආදී ඉල්ලිම් ඉදිරිපත් කරමින් යාපනය විශ්වවිද්‍යාලය ඉදිරිපිට එකොලොස් දිනක් උපවාසයක යෙදී සිටි දිලීපන් මිය ගියේ 1987 සැප්තැම්බර් 26 වෙනිදා ය.

උතුරු නැගෙනහිර පුරා සංවිධානය කර තිබු දීලීපන්ගේ 33 වන  සමරු නැවැත්වීම සඳහා ආණ්ඩුව විසින්  අධිකරණ නියෝග ලබා ගනිමින් ක්‍රියා කර තිබු පසුබිමක් යටතේ, ආගමික සිද්ධස්ථාන වල උපවාස සංවිධානය කිරීමට දෙමළ ජනයා කටයුතු කර තිබු නමුත් එයටත් පොලිස් ඔත්තු කරුවන් දැඩි බාධා පමුණුවා තිබුනි.

 

Social Sharing
නවතම