ඒ රූප ඡායා … ඔබගේ නොවේදෝ ..!

– සහන් කසීර වික්‍රමසිංහ –

ඩබ්ලිව් ජයසිරි විසින් එක්තරා මොහොතක සිනමා නිළි අනූෂා සොනාලිව හඳුන්වාදෙන ලද්දේ රේල් පීල්ලක පිපුණු මලක් ලෙසිනි. එයාකාරයෙන් ම නුවන් ගුණවර්ධන පිළිබඳ සිතන්නේ නම් මා හට පවසන්නට ඇත්තේ නුවන් ගුණවර්ධන යනු නිවෙසක් තුළ ඉදි කළ රේල් පීල්ලක් ලෙසිනි. සෙල්ලම් කෝච්චි දුවනු පිණිස විනා සැබෑ දුම්රිය ධාවනය කරනු පිණිස භාවිත නොකළ රේල් පීල්ල වන්නේ නුවන් ගුණවර්ධනය.

ලාංකේය සංගීත ඉතිහාසය තුළ නිසි ප්‍රයෝජනයක් නොගෙන වෙනත් නානාවිධ දෑ වෙනුවෙන් අපතේ යැවූ කටහඬකට නිදසුන් දක්වන්නටයැයි කිවහොත් අපට අත් දෙක ම ඔසවා මේ ගායකයාගේ නම පැවසිය හැකිය. එක්තරා යුගයක මෙරට සංගීත ක්ෂේත්‍රයේ ප්‍රධාන ධාරාවක් වූ හින්දි ගී නම් බොරු වළට වැටී ඉන් ගොඩ එන්නට නොහැකි වූ පිරිස අතර නුවන් ගුණවර්ධන, චම්පා කල්හාරි වැන්නන් ප්‍රධාන වන අතර ඉන් මිදී ගොඩට ඒමට වාසනාවන්ත වූ පිරිස ලෙස නිරෝෂා විරාජිනී, උරේෂා රවිහාරි වැන්නන් නම් කළ හැකිය. නුවන් ගුණවර්ධනගේ පෞරුෂය සහ ජවය පිරි ගැඹුරු කටහඬ හින්දි ගීත අතර ම දියව යාම අභාග්‍යකි.

1994 වසරේ තිරගත වූ ‘අභියෝගය’ චිත්‍රපටයට ගයන ‘කිරි මුහුදු වෙරළේ නැළවී තරංගා’ නම් ගීතය ද Shreeman Funtoosh චිත්‍රපටයට කිෂෝර් කුමාර් ගායනා කළ හින්දි ගීතයක තනුවට ගයන ‘කඳුලින් ම ගැයූ පෙම් ගීතේ’ වැනි අවස්ථා කීපයක් හැරෙන්නට නුවන් ගුණවර්ධන නම් ගායකයාට සිය මධුර හඬ නිසි ලෙස භාවිතයට ගන්නට ලැබෙන්නේ ම නැත. සුවිශේෂී ලක්ෂණය වන්නේ ඒ ගීත ද්විත්වය ම රචනා කරනු ලබන්නේ ආචාර්ය අජන්තා රණසිංහ විසින් වීමය. ඒ අනුව අජන්තා රණසිංහයන්ගේ ගේය පද ඔස්සේ සිය ගායන දිවියේ කූඨප්‍රාප්තිය දැක ඉන් ඔබ්බට දිගු ගමනක් නොගොස් අතරමග නැවතුණු ඩබ්ලිව්.ඩී. ආරියසිංහ, ප්‍රියන්ත ප්‍රනාන්දු, මෙරිල් ප්‍රනාන්දු වැනි ගායකයින්ගේ ලැයිස්තුවට නුවන් ගුණවර්ධනගේ නම ද එක් කිරීමට සිදු වනු ඇත.

Underrated,
Misread,
Wronged !

ඉහත දැක්වෙන්නේ ; ඩබ්ලිව්.ඩී. ආරියසිංහ සංගීතවේදියාණන්ගේ අභාවයෙන් පසුව Ceylon Today පුවත්පතට Priyangwada Perera සම්පාදිත ලිපියට ඇය විසින් යෙදූ සිරස්තලයයි.

ලාංකේය ගායන අවකාශය තුළ නුවන් ගුණවර්ධනගේ හඬ භාවිතය අරභයා ද එම සිරස්තලය ම වදනකුදු නොවෙනස්ව යොදන්නට අපට නොහැකි මන්දැයි මා මේ මොහොතේ කල්පනා කරමි. ඔහුට සුබ ගමන් පතමි.

නුවන් ! 
ඒ රූප ඡායා …..! ඔබගේ නොවේදෝ …!

 

 

Social Sharing
අවකාශය නවතම