මාධ්‍යවේදී නිලක්ෂන් සමරුවක්!

උතුරේ මහමගදී වෙඩිතබා ඝාතනය කරන ලදුව මේතාක් යුක්තිය ඉටුවී නැති තරුණ දෙමළ මාධ්‍යවේදියකු වන  සහදේවන් නිලක්ෂන්ගේ දහතුන්වැනි ගුණානුස්මරණය යාපනයේදී පවත්වා තිබේ. යාපනය මාධ්‍ය සමාජයේ ප්‍රධාන ශාලාවේ නිලක්ෂන්ගේ ඡායාරූපයක් තබා පුෂ්පෝපහාර පවත්වා ඉටි පහන් දල්වමින් උපහාර දක්වා තිබේ.

නිදහස් මාධ්‍යවේදියකු සහ යාපනය විශ්ව විද්‍යාලයේ ජනමාධ්‍ය පර්යේෂණ සහ පුහුණු මධ්‍යස්ථානයේ විද්‍යාර්ථියකු වූ සහදේවන් නිලක්ෂන් නිවසේ සිටියදී යතුරුපැදියකින් පැමිණි සන්නද්ධ පුද්ගලයන් විසින් වෙඩිතබා ඝාතනය කරන ලද්දේ 2007 අගෝස්තු 1 දාය.

අපරාධකරුවන් විසින් ඔහු නිවසින් පිට කරවා ගෙන ඇත්තේ බියවද්දා ගත් මිතුරකු ලවා කැඳවා ගැනීමෙනි.

“මගේ පුතා නිර්දෝෂයි,” යනුවෙන් නිලක්ෂන් මාතාව සෙල්වරානි සහදේවන් පවසන්නීය.

නිලක්ෂන් මරා දමන ලද්දේ ඔහුගේ ඝාතනයෙන් දෙවසරකට ඉහත කොළඹදී පැහැර ගෙන ගොස් මරා දමන ලද ටැමිල්නෙට් පුරෝගාමී කතුවර ධර්මරත්නම් සිවරාම්ගේ සමරුවකට සහභාගී වීමෙන් අනතුරුව බව නිලක්ෂන් මාතාව සිහිපත් කළාය.

“සමහරවිට සිවරාම් සිහිපත් කිරීම සුදුසු වැඩක් නෙවෙයි කියා ඒ ය හිතනවා ඇති.”

යාපනය සරසවිය විසින් ප්‍රකාශයට පත් කරන ලද “චාලරම්” ශිෂ්‍ය වාර ප්‍රකාශනයේ කතුවරයකු වූ නිලක්ෂන්ගේ  ඝාතනය සම්බන්ධයෙන් මේතාක් කිසිවකු අත් අඩංගුවට ගෙන නැත.

Social Sharing
නවතම