English      |      සිංහල      |      Articles      |      Interviews      |      Features      |      Foreign      |      Videos      |      Contact Us
කොරෝනා මර්දනයට ආණ්ඩුව පාර්ලිමේන්තුවෙන් සල්ලි ඉල්ලා නෑ: රනිල්
(2020-03-24)

<< Go Back
Share |   


නව පාර්ලිමේන්තුව රැස් වන දිනයක් සම්බන්ධයෙන් අවිනිශ්චිත තත්වයක් ඇති වී තිබෙන බැවින් රට තුළ  ඇති විය හැකි ආර්ථික  අර්බුදයට විසදුම් සොයා ගැනීම සදහා පැරණි පාර්ලිමේන්තුව රැස්කර අවශ්‍ය මුදල් ප්‍රමාණය සම්මත කර ගත යුතු බවට ශ්‍රී ලංකාවේ වැඩිම වාර ගණනක් අගමැති ධුරය දරා ඇති එක්සත් ජාතික පක්ෂයේ නායකයා යෝජනා කරයි.

කොරෝනා වෛරසය සම්බන්ධයෙන් පසුගිය දෙසැම්බර් මාසයේදී මුල් වරට වාර්තා වුවත් පාර්ලිමේන්තුව විසුරුවන අවස්ථාව දක්වාම වෛරසය මැඩ පැවැත්වීමේ කටයුතු වෙනුවෙන් අතිරේක මුදල් වෙන් කිරීමට ආණ්ඩුව පාර්ලිමේන්තුවෙන් ඉල්ලීමක් සිදු නොකළ බවයි රනිල් වික්‍රමසිංහ පවසන්නේ.

පාර්ලිමේන්තුවට මුදල් සම්බන්ධ ඉල්ලීම් කළේ ඉදිකිරීම් කොන්ත්‍රාත් සම්ගම්වලට ගෙවීම සදහා පමණක්යැයි රනිල් වික්‍රමසිංහ චෝදනා කර ඇත්තේ 2020 මාර්තු මස 23 වන දින සමාජ මාධ්‍ය ජාල වෙත නිකුත් කළ විශේෂ ප්‍රකාශයක් මගිනි.

අතුරු සම්මත ගිනුමෙන් අප්‍රේල් 30 වන දා දක්වා මුදල් වෙන් කර ඇති බව පෙන්වා දෙන හිටපු අගමැතිවරයා අවධාරණය කරන්නේ එදා සිට නව පාර්ලිමේන්තුව රැස් කරන දිනය දක්වා කිසිදු මුදලක් වියදම් කිරීමට ජනාධිපතිවරයාට බලයක් නොමැති බවයි.

"අලුත් පාර්ලිමේන්තුව කවදා රැස්කරන්නට හැකිවේදැයි කියන්නට බැහැ. මෙය අර්බුදකාරී තත්වයක්. මේ අර්බුදය විසදා ගත හැක්කේ පැරනි පාර්ලිමේන්තුව යළි  රැස් කර අවශ්‍ය මුදල් ප්‍රමාණය සම්මත කර ගැනීමෙන්."

කෙසේවෙතත්, ජනාධිපතිවරයා පවසා තිබුනේ සුළුතර ආණ්ඩුවක බලය ලැබුණු තමන්ට මුදල් සම්මත කරගැනීමට බාධා පැමිණි හෙයින් තිබුණු පාර්ලිමේන්තුව විසුරුවා හරින්නට තීරණය කළ බවයි.

ඒ නිසා තමයි මට ලැබුණු පලමු අවස්ථාවෙන්ම පාර්ලිමේන්තුව විසුරුවා හැර ස්ථාවර නව රජයක් පිහිටුවා ගැනීමට මැතිවරණයක් කැඳවනු ලැබුවේ,” යි ජනාධිපති ගෝඨාභය රාජපක්ෂ සතියකට ඉහතදී රූපවාහිනිය  ඔස්සේ ප්‍රකාශ කර සිටියේය.

පාර්ලිමේන්තුව විසිරවීමත් සමගව්‍යවස්ථාවෙන් ලැබුන බලතල අනුව මා අතුරු සම්මත ගිණුමක් අනුමත කලා. ඒ අනුව අත්‍යාවශ්‍ය වියදම් සඳහා මුදල් ගෙවීම ආරම්භ කළා. වත්මන් ආපදා තත්වයට මුහුණ දීමටත් අපට හැකි වුනේ ඒ නිසායි.”

කොරෝනා අර්බුදය හේතුවෙන් රටට විදේශ විනිමය ගලා එන මාර්ග සියල්ලම ඇණ හිට ඇති බව පෙන්වා දෙන එක්සත් ජාතික පක්ෂයේ නායකයා වැඩි දුරටත් පෙන්වා දෙන්නේ අපනයන කටයුතු අඩපන වී රුපියලද බාල් දු වී ඇති බවයි.

මේ තත්වය තුළ ජීවන වියදම ඉහළ   යන අතර ජනතාවගේ ආදායම අඩුවන බවත් රනිල් වික්‍රමසිංහ සිය ප්‍රකාශය මගින් පෙන්වා දී තිබේ.

එහිදී ඔහු වැඩි දුරටත් අවධාරණය කර ඇත්තේ රජයේ ආදායම පහළ වැටීම නිසා සෞඛ්‍ය ආදී අත්‍යවශ්‍ය කටයුතු සදහා වියදම් සීමා කිරීමට සිදු වන  බවයි.

මේ සියල්ල මැද වෙනත් සමාජීය ගැටළු ගණනාවක්ද උත්සන්න වන බව පෙන්වා දෙන රනිල් වික්‍රමසිංහ මැතිවරණය කල් දැමීමට මැතිවරණ කොමිසම ගත් පියවර පැසසුමට ලක් කර තිබේ.

ලෝකය පුරා පැතිර යමින් තිබෙන කොරෝනා වෛරසය පාලනය සදහා ලංකාව තුළ අවශ්‍ය පියවර නිසි වේලාවට නොගත් බවට බලධාරීන්ට චෝදනා කරන හිටපු අගමැතිවරයා කොරෝනා මර්දන කටයුතු සදහා දැනට පිහිටුවා ඇති සම්බන්ධීකරණ  කමිටුව ප්‍රමාණවත් නොවන බවද පෙන්වා දී තිබේ.

කොරෝනා වෛරසය මර්දනය සදහා අවංක චේතනාවෙන් සිදු කරන සියළු කාර්යන් සදහා කොන්දේසි විරහිතව සහාය දෙන්නට සුදානම් බව පවසන එක්සත් ජාතික පක්ෂයේ නායක රනිල් වික්‍රමසිංහ සිය විශේෂ ප්‍රකාශය හරහා ආණ්ඩුවට තව දුරටත් චෝදනා කර ඇත්තේ සිංහල හා දෙමළ අලුත් අවුරුද්ද, පාස්කු සහ රාමසාන් උත්සව සම්බන්ධයෙන් අනුගමනය කරන්නට බලාපොරොත්තු වෙන වැඩ පිළිවෙළ සම්බන්ධයෙන් ආණ්ඩුව තවම වචනයක් හෝ ප්‍රකාශයට පත් කර නොමැති බවයි.







Share |   


Advertisments
Facebook
© www.aithiya.lk

අප වෙබ් අඩවියේ පළකරනු ලබන යම්කිසි දෙයකින් කිසිවෙකුට යම් අගතියක් සිදුවන බවට පැමිණිලි ලැබේ නම්. තම අනන්‍යතාවය පළකරමින් එම තැනැත්තා විසින් ඉදිරිපත් කරනු ලබන පිළිතුරු අප වෙබ් අඩවියේ පළකිරීමට බැදී සිටී.