English      |      සිංහල      |      Articles      |      Interviews      |      Features      |      Foreign      |      Videos      |      Contact Us
හිරගෙදර “කොරෝනා” විරෝධතාවට වෙඩිතබා දෙදෙනෙක් මරුට. තුනක් රෝහලේ
(2020-03-22)

<< Go Back
Share |   


අනුරාධපුර හිරගෙදර  තුළ කොරෝනා වයිරසය පැතිරීමේ අවදානම වැලැක්වීම වෙනුවෙන්  බලකරමින් පවත්වන ලද උද්ඝෝෂණයකට බන්ධනාගාර නිලධාරීන් වෙඩි තැබීමෙන් දෙදෙනෙක් මරුමුවට පත් වීමෙන් අනතුරුව විශේෂ කාර්ය සාධක බලකාය සහ කැරලි මර්දන පොලිසිය කැඳවා තිබේ.

තුවාල ලද තවත් තුන් දෙනකු මේ වනවිට අනුරාධපුර මහ රෝහලට ඇතුල් කර ඇත.

මුළු දිවයිනටම ඇඳිරි නීතිය දමා ඇති අවස්ථාවක රැඳවියන් විසින් තමන්ගේ සෞඛ්‍යාරක්ෂාව වෙනුවෙන් පවත්වන ලද උද්ඝෝෂණයට වෙඩි තැබූවේ “විරෝධතාව පාලනය කිරීමට” ගිය බන්ධනාගාර නිලධාරීන් බව පොලිසිය විසින් තහවුරු කර ඇත.

“අද දින සවස් කාලයේ අනුරාධපුර බන්ධනාගාරය තුළ සිටි රැඳවියන් විසින් සිදුකරන ලද විරෝධතාවක් හේතුවෙන් බන්ධනාගාර නිලධාරීන් විසින් එය පාලනය කිරීමට යාමේදී නොසන්සුන්තාවක් හටගෙන ඇත,” යි පොලිස් මුලස්ථානය නිකුත් කළ නිවේදනයක දැක්වේ.

“එම අවස්ථාවේදී බන්දනාගාර තුළ සිටි රැඳවියන් ඉන් මිදී පලා යාමට උත්සාහ කර ඇති අතර,  එය වැලැක්වීම සඳහා බන්ධනාගාර නිලධාරීන් විසින් වෙඩි තැබීමක් සිදු කර ඇත.”

ඉන් අනතුරුව රැඳවියන් පිටතට ඒම වැලැක්වීම සහ ආරක්ෂාව සඳහා පොලිසිය, විශේෂ කාර්ය සාධක බලකාය හා කැරලි මර්දන ඒකකය යොදවා තිබෙන බව පොලිසිය නිවේදනය  කර තිබේ. යුද හමුදා භටයන්ද බන්ධනාගාර පරිශ්‍රයට ඇතුල්වනු දැකගන්නට ලැබුණි.

කොරෝනා රෝගියකු බවට සැක කොට අනුරාධපුර බන්ධනාගාරයේ  රැඳවියකු රෝහල් ගත කිරීමෙන් අනතුරුව බියට පත්ව නිදහස ඉල්ලා සිටි  උද්ඝෝෂකයන්ට වෙඩි තබන ලද   බව සිරකාර අයිතිවාසිකම් සඳහා වන ලාංකික සංවිධානය කියා සිටී. 

ඇප ලබා දිය හැකි සිරකරුවන්ට හා සුළු වැරදි මත රදවා සිටින්නන්ට සිරගෙදර තුලදී කොරෝනා රෝගය වැළඳීමේ අවදානම වලක්වා ගැනීම සඳහා ඔවුන්  කොන්දේසි මත හෝ නිදහස් කරන ලෙස රැඳවියන් කළ ඉල්ලීම ජනාධිපතිවරයාටත් ඉදිරිපත් කළ බව සිරකරු අයිතීන් සුරැකිමේ කමිටුවේ සුදේශ් නන්දිමාල් කියා සිටියේය.

"අනුරාධපුර හිරගෙදර හිටපු කෙනෙක් කොරෝනා කියලා සැක කරලා ඉස්පිරිතාලේ නවත්තලා තියෙනවා. අද අනුරාධපුර රෝහලෙන් කොරෝනා හැඳුන කීප දෙනෙක් හොයා ගත්තා අපි ජනාධිපති තුමාටත් කිව්වා නිදහස් කරන්න පුලුවන් අය ඕනෙම කොන්දේසියක් දාලා නිදහස් කරන්න කියලා. බන්ධනාගාරය පැතිරුනොත් පාලනය කරන්න බැරිව ලොකු විනාශයක් වෙනවා. දැනටත් හිරගෙදර ප්‍රමාණයට වැඩි අය දාලා තියෙනවා."

සෞඛ්‍ය බලධාරීන් විසින් පසුව දැනුම් දී තිබුනේ අනුරාධපුර බන්ධනාගාරයේ සිට රෝහල් ගතකරන ලද පුද්ගලයා කොරෝනා රෝග ආසාදිතයකු නොවන බවයි.

දිවයින පුරා පැතිර යන කොරෝනා රෝගය හේතුවෙන් සුළු වැරදිවලට සිරගතවූවන් සහ දඩ ගෙවා ගැනීමට නොහැකිව රඳවාගෙන සිටින පුද්ගලයන් නිදහස් කිරීමට කටයුතු කරන්නයි සිරකරු අයිතිවාසිකම් සුරැකීමේ කමිටුව ජනාධිපතිවරයාගෙන් ඉල්ලා තිබුණි.

කොරෝනා ව්‍යසනය පැතිරීම වැලැක්වීම සඳහා ලොව පුරා රටවල් කිහිපයක් මේ වන විට සුළු වැරදි සම්බන්ධව බන්ධනාගාර ගතවුවන් නිදහස් කර දී ඇති ආදර්ශය අනුගමනය කරන ලෙස  තම සංවිධානය විසින් කරන ලද ඉල්ලීමට ජනපති ගෝඨාභය රාජපක්ෂ යහපත් ප්‍රතිචාරයක් දක්වා නැති අවස්ථාවක මෙසේ ඝාතන සිදුවීම කනගාටුදායක බවද සුදේශ් නන්දිමාල් වැඩිදුරටත් කියා සිටියේය.







Share |   


Advertisments
Facebook
© www.aithiya.lk

අප වෙබ් අඩවියේ පළකරනු ලබන යම්කිසි දෙයකින් කිසිවෙකුට යම් අගතියක් සිදුවන බවට පැමිණිලි ලැබේ නම්. තම අනන්‍යතාවය පළකරමින් එම තැනැත්තා විසින් ඉදිරිපත් කරනු ලබන පිළිතුරු අප වෙබ් අඩවියේ පළකිරීමට බැදී සිටී.